Iperiu 12 - Vakavakadewa Makawa

E vinaka me da nanumi Jisu me da gumatua kina, 1-3. Me da kakua ni yalolailai ni da sa vakararawataki, 4-13. Me da yalosavasava sara, 14-17. Sa vosa vakabibi na vunau eliu, sa vosa vinaka sara nai tukutuku kei Jisu; e vinaka me da vakarogoca, de sa yacovi keda na ca, 18-29.

¹ E na vuku ni ka oqo, ni sa vakavolivoliti keda talega e lewe vuqa e vaka na o era sa vakaraici keda, me da biuta laivi tu na ka bibi kece kei nai valavala ca eda sa tao rawarawa kina, ka me da ciciva tikoga na cere sa tu e matada,

² ka me da vakaraici Jisu, o koya sa vakatekivuna ena sauma talega na noda vakabauta; o koya, e na vuku ni marau sa viritu e matana, sa vosota na kauveilatai, ka sa sega ni madua ni sa vakalialiai kina, a sa qai tiko sobu ko koya e na liga i matau ni tikotiko-vakaturaga ni Kalou.

³ Dou qai vakananumi koya sa vosota ni sa vosavakacacataki koya vakalevu ko ira na tamata ca, de oca ka waicala na lomamudou.

⁴ Dou sa sega tu ni vorata mo dou vakamatei, e na nomudou veivala kei nai valavala ca:

⁵ ia dou sa guilecava nai vakavuvuli sa vosa kivei kemudou me vaka kivei ira na gone, Na luvequ, mo kakua ni beca ni sa cudruvi iko ko Jiova, Se yalowai ni sa vunauci iko ko koya:

⁶ O koya sa lomana ko Jiova, sa cudruva ko koya, Ka sa yaviti ira kecega na luvena sa vinakata ko koya.

⁷ Kevaka dou sa cudruvi, sa qai kitaka vei kemudou na Kalou me vaka vei ira na luvena; io, ko cei na gone sa sega ni cudruvi koya ko tamana?

⁸ Ia kevaka dou sa sega ni cudruvi, sa dauia vei ira kecega, dou sa qai vaka na gone e sega ni vakatamani, ka sega ni vaka na luvena dina.

⁹ Ia sa daucudruvi keda na tamada vakayago, ia eda a daudoka: ena sega li ni levu cake sara na noda talairawarawa vei koya na Tama ni yaloda, ka da na bula kina?

¹⁰ Ia ko ira oqori era a daucudruvi keda e na veisiga eso me vaka era sa vinakata; ia ko koya me bau yaga vei keda, me da vakataki koya kina e na yalosavasava.

¹¹ Ia ka sega ni ka ni marau na dauveicudruvi ni sa ia tiko, a ka rarawa ga: ia emuri sa qai vuataka na vua ni yalododonu era sa vakacegui kina ko ira sa caka vei ira.

¹² O koya oqo mo dou qai vakaukauwataka na liga sa wadamele, kei na duru sa malumalumu;

¹³ ka vakadodonutaka na sala ki na yavamudou, me kakua ni vakasesei ko koya sa gera, me vakabulai ga.

¹⁴ Dou segata mo dou veivinakati kei ira na tamata kecega, kei na yalosavasava, ni sa sega e dua ena raica na Turaga kevaka e sega vua na ka oqo:

¹⁵ ka dou qarauni kemudou vinaka de bale e dua mai na loloma ni Kalou; de dua na waka gaga e tubu cake ka ia kina na rarawa, ka vaqeleqelewataki kina na lewe vuqa;

¹⁶ de dua na daudara, se dua sa beca na ka tabu, me vakataki Iso, o koya ka volitaka na nona ulumatua e na kakana e dua bau:

¹⁷ ni dou sa kila, sa gadreva emuri ko koya me vosavakalougatataki; ia sa bureitaki vua: (ni sa sega ni kunea na ka e rawa kina na vuki me duatani,) ia ka sa vakasaqara matua, ka vakawai na matana.

¹⁸ Ni dou sa sega ni lako mai ki na ulu-ni-vanua sa tarai rawa, a sa caudre e na buka, kei na o loaloa, kei na butobuto, kei na cava,

¹⁹ kei na rorogo ni davui, kei na domo ni vosa; ko ya sa masu kina ko ira era a rogoca, me kakua ni vosataki tale vei ira;

²⁰ ni ra sa sega ni vosota rawa na ka sa vakaroti, Kevaka e tara na ulu-ni-vanua e dua na manumanu e yavai va, ena vakaviriki e na vatu;

²¹ ia sa ka rerevaki sara na kenai rairai ni ka ko ya, ka sa kaya kina ko Mosese, Au sa domobula ka sautaninini vakalevu:

²² ia dou sa lako mai ki na ulu-ni-vanua ko Saioni ga, kei na koro ni Kalou bula, ki Jerusalemi vakalomalagi, kei na nodra i soqosoqo na agilose e sega ni wili rawa,

²³ kei na nodra i soqosoqo na ulumatua, sa volai mai lomalagi, vua talega na Kalou sa lewai ira kecega na tamata, kei na yalodra na tamata yalododonu sa yaco kece kina na nodra vakalougatataki,

²⁴ kivei Jisu talega na dautataro ni veiyalayalati vou, kei na dra sa kureitaki, oqori ga sa cavuta tiko na ka vinaka, sa cavuta na ka ca na dra i Epeli.

²⁵ Dou raica, mo dou kakua ni bese vua sa vosa. Ia kevaka era a sega ni dro bula ko ira era a bese vua sa vosa e vuravura, ena dredre vakalevu cake vei keda, kevaka eda sa vuki tani mai vua sa vosa mai lomalagi:

²⁶ o koya sa vakayavalataki vuravura e na domona e na gauna ko ya: a sa qai yalataka, ka kaya, Sa vakadua tale, ka'u na sega ni vakayavalataki vuravura ga, ko lomalagi talega.

²⁷ Ia oqo, Sa vakadua tale, sa vakatakilai mai kina ni na kau tani yani na veika sa vakayavalataki, me vaka na veika sa caka, me tu dei kina na veika sa sega ni vakayavalataki rawa.

²⁸ Ia ni da sa rawata na matanitu sa sega ni vakayavalati rawa, me da taura matua na loloma sa soli, eda sa qarava vinaka kina na Kalou e na yalomatua kei na rere:

²⁹ ni sa bukawaqa caucaudre na noda Kalou.