Iperiu 11 - Vakavakadewa Makawa

Sa tukuna ko koya nai balebale ni vakabauta, 1; a sa qai tukuna na kena yaga, 2-40.

¹ Ia na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.

² Ni sa ka oqo sa rogo vinaka kina eliu ko ira na qase.

³ Na vakabauta eda sa kila kina ni sa ia na veibuli e na vosa ni Kalou, ia sa sega ni caka na veika sa rairai mai e na veika sa kune tiko.

⁴ Ni sa vakabauta sa vakacabora ko Epeli nai soro sa vinaka vua na Kalou ka ca na nei Keni, ka sa rawata kina nai vakadinadina ni sa yalododonu, ni sa vakatakila na Kalou ni sa vinakata na nonai madrali: ia na ka oqo sa vosa tikoga kina ko koya ni sa mate tu.

⁵ Ni sa vakabauta sa kau yani kina ko Inoki ka sega ni mate; a ra sa sega ni kunei koya, ni sa kauti koya yani na Kalou: ia ni sa bera ni kau yani, sa tu ga vua nai vakadinadina ni sa vinakati koya na Kalou.

⁶ Ia kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.

⁷ Ni sa vakabauta sa rere kina ko Noa, ni sa vakasalataka oti na Kalou e na vuku ni veika sa bera ni rairai mai, a sa taya e dua na waqa ko koya me vakabulai ira kina na nona lewe-ni-vale; a sa vakalewai ira kina na kai vuravura, ka yaco mei taukei ni veivakadonui sa yaco e na vakabauta.

⁸ Ni sa vakabauta sa talairawarawa kina ko Eparaama, ni sa kacivi me lako ki na vanua sa bera ni soli vua me taukena; ka sa lako yani, ia sa sega ni kila na vanua sa lako kina.

⁹ Ni sa vakabauta sa laki tiko vulagi kina e na vanua ka yalataki, me vaka sa sega ni nona, ka tiko walega e na veivale laca, ko Aisake talega kei Jekope, eratou taukena vata emuri na ka ko ya ka yalataki:

¹⁰ ni sa nuitaka ko koya na koro sa tauyavutaki, ka tara na Kalou ka cakava.

¹¹ Ni sa vakabauta sa vakaukauwataki kina ko Sera me kunekunetaka na kawa, a sa vakasucu gone ni sa oti na kena gauna, ni sa nanuma ga sa yalodina ko koya ka yalataka:

¹² o koya sa tubu kina mai vua e lewe dua, o koya e vaka sa mate, e lewe vuqa me vaka na veikalokalo ni lomalagi, e vaka talega na nuku mai matasawa e sega ni wili rawa.

¹³ Sa mate e na vakabauta ko ira kecega oqo ia ka sa sega ni nodra dina na veika ka yalataki, era sa raica vakayawa, ka ciqoma, ka tukuni ira ni ra a tiko vulagi ga ka veilakoyaki voli e vuravura.

¹⁴ Ia ko ira sa vosa vakaoqo era sa vakatakila sara ni ra sa vakasaqara na vanua sa nodra.

¹⁵ E dina ga, kevaka era sa nanuma na vanua ko ya era sa biuta laivi tu, sa rawarawa ga me ra lesu tale kina.

¹⁶ Ia era sa qai guta sara e dua na vanua sa vinaka cake, ko ya sa vakalomalagi: o koya ga oqo e sega kina ni madua na Kalou me vakatokai me nodra Kalou: ni sa tara ko koya e dua na koro me nodra.

¹⁷ Ni sa vakabauta sa vakacabori Aisake kina ko Eparaama, ni sa vakatovolei, ia ko koya ka vosataki kina na yalayala sa vakacabori koya na le dua bauga o koya ka vakatubura ko koya

¹⁸ ia ka sa kainaki e na vukuna eliu, Na kawa i Aisake ena vakatokai me nomu kawa:

¹⁹ ni sa vakadinata ko koya sa rawarawa vua na Kalou me vakabulai koya tale mai na mate; a sa tauri koya tale vakakina e nai vakatakarakara.

²⁰ Ni sa vakabauta sa vosavakalougatataki Jekope kei Iso kina ko Aisake e na veika sa bera.

²¹ Ni sa vakabauta sa vosavakalougatataki rau kina na luve i Josefa ko Jekope, ni sa voleka ni mate; a sa cuva sobu e na nonai titoko.

²² Ni sa vakabauta sa tukuna kina ko Josefa, ni sa voleka ni mate, ni na lako tani ko ira na luve i Isireli; a sa tataunaka na suina.

²³ Ni sa vakabauta sa vunitaki Mosese ka vula tolu koi rau na nona qase, ni sa sucu ko koya, ni rau sa raica sa matavinaka na gone; a rau sa sega ni rerevaka nai vakaro ni tui.

²⁴ Ni sa vakabauta sa bese kina ko Mosese, ni sa qai tamata bula mai, me vakatokai me luvena na luve i Fero na goneyalewa;

²⁵ ni sa digitaka me vosota na veivakacacani kei ira na tamata ni Kalou, ia ka cata ni bau marau walega e nai valavala ca e na siga eso;

²⁶ ni sa vakadinata sai yau levu me vakalialiai e na vuku i Karisito, ia na ka lailai nai yau mai Ijipita: ni sa vakaraica tu na kenai sau.

²⁷ Ni sa vakabauta sa biuti Ijipita kina ko koya, ka sega ni rerevaka na cudru ni tui; ni sa gumatua me vaka sa raici koya sa sega ni kune.

²⁸ Ni sa vakabauta sa ia kina ko koya na kana vata ni lako-sivia, kei na kureitaka na dra, me kakua ni tarai ira ko koya sa vakamatei ira na ulumatua.

²⁹ Ni sa vakabauta era sa lako kina eloma ni Wasawasa Damudamu me vaka sa vanua mamaca: ia ni sa vakatovolea ko ira na kai Ijipita me ra bau vakakina, era sa luvu.

³⁰ Na vakabauta sa bale kina na bai mai Jeriko, ni sa buku na druadrua ka bogi vitu.

³¹ Ni sa vakabauta sa sega kina ni rusa vata kei ira sa sega ni vakabauta ko Reapi, na yalewa dautagane, ni sa kauti rau e na veivakacegui erau sa yamata.

³² Ia a cava tale me'u kaya? ni sa dede sara kevaka ka'u sa tukuni Kitioni, kei Peraki, kei Samisoni, kei Jefica, kei Tevita, kei Samuela, kei ira na parofita:

³³ o ira, ni ra sa vakabauta, era sa vakamalumalumutaka na matanitu eso, era sa cakava na ka e dodonu, era sa rawata me nodra na veika ka yalataki, era sa tabonaka na gusu ni laioni,

³⁴ era sa bokoca na bukawaqa rerevaki, era sa bula mai nai seleiwau, era sa vakaukauwataki tale ni ra sa malumalumu, era sa qaqa e nai valu, era vakasavi ira nai valu ni kai tani.

³⁵ Sa tauri ira tale ko ira na yalewa eso na kai nodra, era sa tu cake tale mai na mate: ia ka so sa vakararawataki vakalevu, a ra sa bese ga ni bula; me vinaka cake kina na nodra tu cake tale mai na mate;

³⁶ ia sa vakatovolei eso e na veivakalialiai kei na vakanakuitataki, kei na vesu talega kei na biu ki na vale ni veivesu;

³⁷ era sa lauviri e na vatu, era sa varomusuki rua, era sa dauveretaki, era sa vakamatei e nai seleiwau: era sa veilakoyaki voli ka sa vakaisulu e na kuli ni sipi kei na kuli ni me; era sa dravudravua sara, era sa vakararawataki, era sa vakacacani;

³⁸ (ia sa sega ni yaga ko ira na kai vuravura me ra tiko vata kei ira:) era sa se ki na veivanua liwa lala, ki na veiulu-ni-vanua, kei na qara eso, kei na veiqaravatu e vuravura.

³⁹ Ia ko ira kecega oqo era sa rogo vinaka e na vuku ni vakabauta, ia ka sega ni nodra dina na ka ka yalataki:

⁴⁰ Ia sa vakarautaka na Kalou vei keda na ka e vinaka cake, me ra kakua kina ni vakavinakataki sara duaduaga me da vakavinakataki sara vata ga.