Iperiu 10 - Vakavakadewa Makawa

Sa uasivi cake nai soro sa cabora ko Karisito e nai soro kecega eliu, ni sa kau tani kina nai sau ni valavala ca, 1-18. Sa vakarota kina vei ira ko koya me ra vakabauti Jisu sara, 19-39.

¹ Sa tu ga e na vunau nai vakatakarakara ni veika vinaka me na muri mai, ia ka sega ni koya na yaloyalona dina, ka sega talega ni rawa e nai soro era sa cabora tiko e na veiyabaki, me vakasavasavataki ira era toro tiko kina.

² Ia kevaka sa rawa, sa sega li ni mudu na nodra vakacabori, ni ra sa sega ni beitaki tiko e nai valavala ca ko ira sa dausoro, ni ra sa vakasavasavataki vakadua?

³ ia e nai soro oqori sa vakananumi tale kina nai valavala ca e na veiyabaki.

⁴ Ni sa dredre sara me kauta tani nai valavala ca na dra ni pulumokau kei na me.

⁵ O koya oqo sa kaya kina ko koya ni sa lako mai ki vuravura, Ai soro kei nai madrali ko sa sega ni vinakata, Ia ko sa vakarautaka ga vei au na yago:

⁶ Ai soro kama, kei nai soro talega sa sorovaki kina nai valavala ca, ko sa sega ni reki kina:

⁷ Au sa qai kaya, Raica, au sa lako mai, (Au a volai e nai vola vivigi,) Me'u cakava na ka ko sa vinakata, na Kalou.

⁸ Sa kaya eliu ko koya, Ai soro kei nai madrali kei nai soro kama kei nai soro sa sorovaki kina nai valavala ca, ko sa sega ni vinakata, se rekitaka, (o koya sa vakacabori me vaka na vunau,)

⁹ sa qai kaya ko koya, Raica, au sa lako mai me'u cakava na ka ko sa vinakata, na Kalou. Sa kauta tani ko koya nai matai, me vakayacora na kenai karua.

¹⁰ Ia eda sa vakasavasavataki e na vuku ni lewa oqo, e na yago i Jisu Karisito ni sa cabori vakadua.

¹¹ Ia ko ira kecega na bete era sa tu ka cakacaka e na veisiga, ka vakacabora wasoma nai soro ko ya sa sega ni kauta tani rawa nai valavala ca:

¹² ia ko koya oqo, ni sa vakacabora oti vakadua nai soro e dua ga e na vuku ni valavala ca, sa qai tiko sobu e na liga i matau ni Kalou;

¹³ a sa qai waraka tiko me vakayacori ko ira na nona meca mei tutu-ni-yavana.

¹⁴ Ni sa vakacabora vakadua nai soro sa cakava kina ko koya na ka kecega e yaga vei ira era sa vakasavasavataki tiko.

¹⁵ Ia sai vakadinadina talega vei keda na Yalo Tabu: io, ni sa kaya oti ko koya,

¹⁶ Oqo na veiyalayalati ka'u na cakava vei ira Ni sa oti na gauna ko ya, sa qai kaya na Turaga, Au na tugana na noqu vunau ki na yalodra, Ka vola e na lomadra;

¹⁷ Ia na nodra i valavala ca kei na nodra talaidredre ka'u na sega ni nanuma tale.

¹⁸ Ia kevaka sa bokoci na veika oqori, sa sega ni vakacabori tale nai soro ni valavala ca.

¹⁹ O koya oqo, oi kemudou na veiwekani, ni da sa qai doudou rawa me da curu ki na loqi tabu sara e na vuku ni dra i Jisu,

²⁰ e na sala vou ka bula, o koya sa qai vakatara vei keda ko koya, ia sa ka e curu kina nai lati, oqori na yagona;

²¹ ka ni sa dua talega na noda bete levu e na vale ni Kalou;

²² me da toro voleka yani e na yalo dina kei na vakabauta dina sara, ni sa kureitaki tu na yaloda me da kakua ni beitaki keda e na ca, ka sa vakasilimi tu na yagoda e na wai makare.

²³ Tou taura matua na vakatusa ni noda vakabauta me kakua ni yavala; ni sa yalodina ko koya sa yalataka;

²⁴ me da veivakananumi keda vakai keda me da veivakatakatai me dauloloma kai valavala vinaka:

²⁵ me da kakua ni biuta na vakasoqoni vata, me vaka nai valavala ni tamata eso; me da veivakamasuti tiko: ia me vakalevu, ni dou sa raica sa toro voleka mai na siga.

²⁶ Io, kevaka eda sai valavala ca ka sa yaloda kina, ni da sa kila oti nai vakavuvuli dina, sa qai sega tale e dua tani nai soro ni valavala ca:

²⁷ sa vo ga na noda waraka e na rere na siga ni lewa, kei na cudru waqawaqa talega, oqori ena kani ira na meca.

²⁸ O koya sa beca na vunau i Mosese sa mate ga, sa sega tale ni lomani, ni sa beitaka vei koya e le rua se le tolu nai vakadinadina:

²⁹ dou vakasama se na vakaevei na kena levu cake ni cudruvi, sa dodonu me yaco vua, sa butuka na Luve ni Kalou, a sa vakawaletaka na dra ni veiyalayalati sa vakasavasavataki kina, a sa beci koya na Yalo ni loloma?

³⁰ Ni da sa kilai koya sa kaya, Sa noqu i tavi me'u cudruvaka, au na sauma ga. Ka sa kaya tale, Ena lewai ira na nona tamata ko Jiova.

³¹ Sa ka rerevaki me lutu ki na liga ni Kalou bula.

³² Ia dou vakananuma na veisiga eliu, dou a vakararamataki kina ka dou a qai vosota na veivala e na rarawa vakaidina;

³³ eso, ni dou a vakasesevotuni e na veivakalialiai kei na veivakararawataki; ka so, ni dou a tiko vata kei ira era sa vakakina.

³⁴ Ni dou a lomani ira ga era sa vesuki, ka reki ni sa kovei na nomudou i yau, ni dou sa kila e na lomamudou sa tu ga mai lomalagi na nomudou i yau e vinaka cake kina ka veiqati.

³⁵ O koya oqo mo dou qai kakua ni biuta na nomudou dinata ena levu na kenai sau.

³⁶ Ni sa yaga vei kemudou na vosota, mo dou cakava na ka sa lewa na Kalou, ka me nomudou kina na ka ka yalataki.

³⁷ Ni na dede vakalailai, Ena qai lako mai ko Koya e lako mai, ka na sega ni dede sara.

³⁸ Ia ena bula na tamata yalododonu e na vakabauta: Ia, kevaka sa suka tani tale, ena sega ni vinakati koya na yaloqu.

³⁹ Ia koi keda, eda sega ni vakataki ira sa suka tale yani ki na rusa; eda sa vakataki ira ga era sa vakabauta tiko me bula na yalo.