Iperiu 1 - Vakavakadewa Makawa

Sa tukuna ko Paula ni sa uasivi cake ko Jisu vei ira kecega na parofita kei ira na agilose, ni sa Luve ni Kalou, 1-14.

¹ Sai ira na parofita ka vosa kina eliu na Kalou vei ira na qase, e na gauna e vuqa, kei nai valavala e vuqa:

² ia sai koya na Luvena sa vosa kina vei keda ko koya, e na gauna mai ki muri oqo; o koya sa lesia ko koya mei taukei ni ka kecega, o koya sa bulia talega kina na vuravura kecega;

³ o koya sa cila kina na nona serau kei na yaloyalo ni nonai tovo, a sa tokona na ka kecega e na nona vosa mana, a sa tiko sobu e na liga i matau i Koya sa levu sara maicake, ni sa vuya laivi oti vakataki koya na nodai valavala ca;

⁴ ni sa yaco me uasivi cake vei ira na agilose, ni sa taukena na yaca sa uasivia na yacadra.

⁵ Io, ko cei vei ira na agilose sa kaya vua ko koya e na dua na siga, A Luvequ ko iko, au sa vakatuburi iko e na siga oqo? sa kaya tale, Au na Tamana koi au, ena Luvequ ko koya?

⁶ Ia ni sa kauta mai ko koya na Ulumatua ki vuravura, sa kaya, Me cuva vei koya ko ira kecega na agilose ni Kalou.

⁷ Ia e na vukudra na agilose sa kaya ko koya, O koya sa qisi ira na nona agilose me cagi, Kei ira na nonai talatala me yameyame ni buka.

⁸ Ia e na vuku ni Luvena ga, Ena sega ni mudu na nomuni tikotiko-vakaturaga, oi kemuni na Kalou: Sai titoko ni caka dodonu nai titoko ni nomuni matanitu:

⁹ Ni kemuni sa vinakata nai valavala dodonu, ka cata nai valavala ca, Sa lumuti kemuni kina na Kalou, a nomuni Kalou, E na waiwai ni reki mo ni uasivi cake kina vei ira na nomuni tokani.

¹⁰ Ia, Oi kemuni Turaga, ko ni a tauyavutaki vuravura e nai vakatekivu; Ia na cakacaka ni ligamuni ko lomalagi:

¹¹ Ena rusa oqori; ia koi kemuni ena tiko ga: Ia ena madra mai oqori kecega me vaka nai sulu:

¹² O ni na lobia talega me vaka nai tutuvi, ka na vakaisosomitaki: Ia koi kemuni sai kemuni tikoga, Ia ena sega ni bau mudu na nomuni veiyabaki.

¹³ Ia ko cei vei ira na agilose sa kaya vua ko koya e na dua na siga, Mo tiko e na ligaqu i matau, Ka me'u qisi ira oti mada na nomu meca mei tutu-ni-yavamu?

¹⁴ Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?