Filipai 3 - Vakavakadewa Makawa

Sa vakasalataki ira ko koya e na vukudra nai vakavuvuli vakailasu, 111. Sa kaya ni sa cici cere, a sa vakarota vei ira me ra vakakina, 1221.

¹ Meu tinia oi kemudou na wekaqu, mo dou reki e na Turaga. Meu vola vei kemudou na veika kau a vola eliu sa sega dina ni ka rarawa vei au, ia na ka dou sa tu vinaka kina.

² Dou qarauni kemudou vinaka mai na koli, dou qarauni kemudou maivei ira era sa daucaka ca, dou qarauni kemudou maivei ira na cili.

³ Sai keda ga na veicili koi keda sa masu vakayalo vua na Kalou, ka rekitaki Karisito Jisu, ka sega ni vakararavi ki na yago.

⁴ Ia koi au, e dina sa noqu na ka vakayago meu vakararavi kina. Kevaka sa dua tani sa nanuma sa tu vua e dua na ka vakayago me vakararavi kina, au sa uasivi cake kina;

⁵ au a cilivi e nai kawalu ni siga, au a sucu me luve i Isireli, mai na yavusa i Penijamini, oi au na Iperiu maivei rau na Iperiu; e na ka ni vunau au a Farisi;

⁶ e na ka ni lomakatakata au a vakacacana nai soqosoqo lewe ni lotu; e na veivakadonui sa yaco mai na vunau, au a sega ni cala.

⁷ Ia na veika kau a taleitaka au sa vaka me yali vakadua vei au me noqu kina na Karisito.

⁸ Io, e dina ga, niu sa qai vakayalitaka vakadua vei au na ka kecega ni sa uasivi cake kina na veikilai kei Karisito Jisu na noqu Turaga; o koya kau sa vosota kina me yali vei au na ka kecega, ia kau sa vakasama ni sa de-ni-manumanu walega, meu rawai Karisito kina me noqu,

⁹ me keirau kune vata kaya, me kakua ni tu vei au na vakadonui, sa rawa mai na vunau, ko ya ga sa rawa e na vakabauti Karisito, na vakadonui sa mai vua na Kalou e na vuku ni vakabauta:

¹⁰ meu kilai koya, kei na kaukauwa ni nona tu cake tale mai na mate, ka me keirau veitokani vata kaya e na ka rarawa, meu vakatauvatani kaya e na nona mate;

¹¹ deu yacova beka na tu cake tale mai na mate.

¹² Au sa sega ni vaka kau sa rawata kece, seu yaco sara yani: ia kau sa muria tikoga, meu taura dina na ka ka tauri au kina ko Jisu Karisito.

¹³ Oi kemudou na veiwekani, au sa sega ni vakasami au niu sa taura oti; ia sa dua bauga na ka kau sa kitaka, au sa guilecava na ka sa sivi, kau sa kakavaki meu tadolova na ka ki liu,

¹⁴ kau sa ciciva na cere, meu tauca na cere sa kacivi au kina maicake na Kalou e na vuku i Karisito Jisu.

¹⁵ O koya me da qai lomavata e na ka oqo, oi keda kecega sa matua e na lotu; ia kevaka sa dua na ka dou sa sega ni lomavata kina, ena vakaraitaka talega vei kemudou na Kalou na ka ko ya.

¹⁶ Ia, na ka eda sa yacova sara ga, me da muria tiko nai vakarau ko ya.

¹⁷ Oi kemudou na veiwekani, dou muri au vata ga, ka vakaraici ira era sai valavala vakakina, ni keitou sai vakarau vei kemudou.

¹⁸ Ni ra sa lewe vuqa kau sa tukuna wasoma vei kemudou, ia kau sa qai tukuna talega niu sa tagi tiko, ni ra sa meca ni kauveilatai i Karisito e na nodra i valavala:

¹⁹ ia sa kedrai tinitini na rusa, a nodra kalou na ketedra, era sa vakalevulevui e na nodra ka e veivakamaduataki, a ra sa daunanuma na veika ni vuravura.

²⁰ Ia eda sa lewe ni koro mai lomalagi koi keda; eda sa waraka maikina nai Vakabula, na Turaga ko Jisu Karisito:

²¹ o koya ena vakamataliataka na yagoda sa malumalumu, me vakatauvatani kei na yagona sa vakaiukuukutaki, me vaka na kaukauwa sa vakamalumalumutaka rawa kina na ka kecega ko koya.