Filimoni 1 - Vakavakadewa Makawa

Sa reki ko Paula ni sa lotu dina ko Filimoni, 1-7. Sa masuti koya me lomani Onesimo tale e na vukuna, ni sa qai lotu dina, 8-21. Sa kaya ni na laki raici koya ko Paula, a sa tinia na nonai vola, 22-25.

¹ Koi au ko Paula, sa vesu tu e na vuku i Karisito Jisu, kei Timoci na wekada, vei Filimoni o koya keirau sa daulomana, kei na neirau i tokani,

² vei Afia talega na wekada yalewa, vei Akipo talega na neirau i tokani e nai valu oqo, vei ira talega nai soqosoqo lewe ni lotu era sa tiko e na nomu vale:

³ Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

⁴ Au sa vakavinavinaka vua na noqu Kalou, ni'u sa cavuti iko e na veisiga e na noqu masu;

⁵ ni'u sa rogoca na nomu loloma kei na nomu vakabauta vua na Turaga ko Jisu, kivei ira kece talega era sa lotu;

⁶ me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu.

⁷ Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakaceguya na lomadra era sa lotu.

⁸ E dina ga sa rawa me'u doudou vakalevu e na vuku i Karisito me'u vakarota vei iko na ka e kilikili;

⁹ ia e na vuku ni nodaru veilomani ga ka'u sa vinakata cake me'u vakamamasu ga, ni'u sa vakaoqo koi au ko Paula na qase, ia ka'u sa vesu talega edaidai e na vuku i Jisu Karisito.

¹⁰ Au sa vakamasuti iko e na vuku ni luvequ ko Onesimo, o koya ka'u sa vakatubura ni'u sa vesu tu:

¹¹ (o koya sa sega ni yaga eliu vei iko, ia sa qai yaga vei iko, vei au talega:)

¹² au sa qai tala tale vei iko: o koya oqo mo vakacegui koya, ni sa vaka na lewequ dina sara:

¹³ au sa via taura ga me tiko vei au, me kemui sosomi me sa qaravi au ni'u sa vesu tu e na vuku ni tukutuku-vinaka:

¹⁴ ia ni'u sa sega ni kila na yalomu, au sa sega ni via cakava e dua na ka: me kakua ni vaka na ka ni vakasaurara na nomu loloma, me sa lomamu ga kina.

¹⁵ Ni sai koya beka oqo sa lako tani vakalekaleka kina, mo tauri koya tale ka tawa mudu;

¹⁶ me kakua ni vaka na tamata walega, me sa uasivi cake e na tamata walega, me wekamu lomani, e vakalevu vei au, ia ka vakaevei vei iko, e na ka vakavuravura, kei na ka ni Turaga talega?

¹⁷ Ia oqo, kevaka ko sa vakasami au ni'u sai tokani, mo vakacegui koya me vakataki au.

¹⁸ Kevaka sa vakacacani iko ko koya e na dua na ka, se sa dua na ka sa dinau kina vei iko, mo volai au kina;

¹⁹ oi au ko Paula, au sa vola e na ligaqu dina, au na sauma; ia ka'u sa sega ni kaya vei iko ni sa dodonu ga mo noqu talega ko iko.

²⁰ Io, noqu i tokani, me'u rekitaki iko mada e na Turaga: vakaceguya na lomaqu e na vuku i Karisito.

²¹ Ni ka'u sa vakadinata ko na talairawarawa, ka'u sa vola kina vei iko, ni'u sa kila ko na kitaka na ka ka'u sa kaya, ka uasivi cake kina.

²² Mo vakarautaka talega e dua na vale me'u moce kina: ni'u sa dinata ka'u na soli vei kemudou e na vuku ni nomudou masu.

²³ Eratou sa loloma yani vei iko ko Epafira, keirau sa vesu vata kaya e na vuku i Karisito Jisu;

²⁴ kei iratou talega na noqu i tokani, ko Marika, ko Arisitako, ko Timasa, ko Luke.

²⁵ Me tiko kei na yalomudou na loloma ni noda Turaga ko Jisu Karisito. Emeni.