Esiteri 9 - Vakavakadewa Makawa

Sa gumatua ko ira na Jiu vei ira na nodra meca, 1-19. Sa ra kana magiti ko ira na Jiu, 20-32.

¹ Ia e nai katinikarua ni vula, na vula ko Eta, e nai katinikatolu ni siga ni vula ko ya, ni sa voleka ni vakayacori nai vakaro ni tui kei na nonai lesilesi, e na siga era a nakita me rawai ira kina na Jiu ko ira na nodra meca, ia sa vuki me dua tani, a ra sa lewai ira era cati ko ira na Jiu;

² era sa soqoni vata ko ira na Jiu e na nodra veikoro e na yasana kecega nei Easuerosi na tui, me vakamatei ira era via vakacacani ira: ka sa sega na tamata sa gumatua vei ira, ni sa kani ira kecega na tamata na rere e na vukudra.

³ Ia ko ira kecega era turaga ni veiyasana, kei ira na turaga sa liu, kei ira na kovana ni veiyasana, kei ira na ovisa ni tui, era sa vukei ira na Jiu; ni sa kani ira na rere e na vuku i Moatekai:

⁴ ni sa yaco ko Moatekai e na vale ni tui, a sa kuruvaki ki na veiyasana kecega na nona totoka: ni sa veiyasana kecega na nona totoka: ni sa tubu me levu cake tikoga na tamata ko Moatekai.

⁵ Ka ra sa yaviti ira kece na nodra meca ko ira na Jiu e nai seleiwau, ka ia na veivakamatei, kei na veivakarusai, ka ra veitalia e na ka era cakava vei ira era sa cati ira.

⁶ Ka ra sa vakamatea ka vakarusa ko ira na Jiu, e le lima na drau na tagane mai Susani na koro vakaturaga.

⁷ Ka ra sa vakamatei Parisadaca, kei Talifoni, kei Asepaca,

⁸ kei Poraca, kei Atelia, kei Aritaca,

⁹ kei Pamasita, kei Arisai, kei Aritai, kei Vaisaca,

¹⁰ eratou lewe tini na tagane na luve i Emani na luve i Mitaca ka tagane, na nodra meca na Jiu; ia era sa sega ni kovea e dua na nodra ka.

¹¹ E na siga ko ya sa kaya vua na tui na kedrai wiliwili era sa vakamatei mai Susani na koro vakaturaga.

¹² A sa kaya na tui vei Esiteri na ranadi, Sa vakamatea ka vakarusa ko ira na Jiu e le lima na drau na tagane e Susani na koro vakaturaga, kei iratou na luve i Emani eratou lewe tini; ia ka cava beka era sa kitaka e na veiyasana ni tui sa vo? Ia ka cava ko sa masuta? ena soli ga vei iko: se cava tale na ka ko sa kerea? ena vakayacori ga.

¹³ A sa kaya ko Esiteri, Kevaka sa vinaka vua na tui, me soli ga vei ira na Jiu era sa tiko e Susani me ra kitaka talega e na mataka me vaka na ka sa lesi me caka edaidai, ia me vakalilici e na kau na luve i Emani eratou lewe tini.

¹⁴ Sa qai kaya ko koya na tui me caka vakakina: a sa tukuni nai vakaro mai Susani; ka ra sa vakalilici iratou na luve i Emani eratou lewe tini na tagane.

¹⁵ Ka ra sa soqoni vata ko ira na Jiu mai Susani e nai katinikava ni siga talega ni vula ko Eta, ka vakamatea e lewe tolu na drau na tagane mai Susani; ia era sa sega ni kovea e dua na nodra ka.

¹⁶ Ia ko ira na Jiu sa vo e na veiyasana ni tui, era sa soqoni vata, ka veitotaki me ra bula, ka vakacegu e na vuku ni nodra meca, ka vakamatea e le vitusagavulu ka lima na udolu, ka ra sa sega ni kovea e dua na nodra ka,

¹⁷ e nai katinikatolu ni siga ni vula ko Eta; ia e nai katinikava ni siga ni vula ko ya era sa vakacegu, ka lokuca me siga ni kana magiti kei na marau.

¹⁸ Ia ko ira na Jiu mai Susani era sa soqoni vata e nai katinikatolu ni siga, kei na kenai katinikava; ia na kenai katinikalima era sa vakacegu, ka lokuca me siga ni kana magiti kei na marau.

¹⁹ Ia ko ira na Jiu mai na veikoro lalai, era sa tiko e na veikoro sa sega ni vakabai, era sa lokuca nai katinikava ni siga ni vula ko Eta me siga ni marau kei na kana magiti, kei na siga vinaka, kei na veisoliyaka na ka.

²⁰ A sa vola na veika oqo ko Moatekai, ka sa vakauta na veivola kivei ira kece na Jiu e na veiyasana kecega ni tui ko Easuerosi, vei ira era voleka kei ira era yawa,

²¹ me vakataudeitaka vei ira, me ra vakabauta nai katinikava ni siga ni vula ko Eta, kei na kenai katinikalima talega, e na veiyabaki,

²² me kena siga era vakacegu kina ko ira na Jiu maivei ira na nodra meca, kei na vula sa vukici kina na nodra rarawa me reki, kei na nodra tagi me siga vinaka: me ra lokuca me siga ni kana magiti kei na reki, kei na veisoliyaka na ka, kei na soli ka-ni-loloma vei ira na dravudravua.

²³ A ra sa bolea ko ira na Jiu me ra cakava na ka era sa vakatekivuna, ka me vaka sa vola vei ira ko Moatekai;

²⁴ ni sa nakita na ca vei ira na Jiu, io me vakarusai ira, ko Emani na luve i Mitaca ka tagane, na luve i Ekaki, na nodra meca na Jiu, a sa ia na Puri, oqori na vakawiri madigi, me vakaoti ira, ka vakarusai ira;

²⁵ ia ni sa lako mai ko Esiteri vua na tui, sa vakarota ko koya e nai vola, me lesu ki na uluna na vere ca sa bukiveretaki ira kina na Jiu, ka me ratou vakalilici e na kau ko koya kei iratou na luvena tagane.

²⁶ O koya sa vakatokai kina na siga oqori na Purimi, me muria na yaca ni Puri. O koya e na vuku ni vosa kecega ni vola oqo, kei na ka era sa kunea e nai valavala oqo, kei na ka sa yacovi ira,

²⁷ era sa lesia ko ira na Jiu, ka bolea e na vukudra, kei na vukudra na nodra kawa, kei na vukudra kecega era sa mai kabiti ira, me kakua kina ni mudu, ka me ra vakabauta ga na siga ruarua oqo me vaka na vosa sa volai kina; kei na kenai lokuloku e na veiyabaki kecega;

²⁸ ia me daunanumi ka me vakabau na siga ruarua oqo e nai tabatamata kecega, vei ira na mataqali kecega, e na veiyasana kecega, kei na veikoro kece; ka me kakua ni mudu na siga ni Purimi oqo vei ira na Jiu, se me oti na kenai vakananumi vei ira na nodra kawa.

²⁹ A sa volavola vakaturaga sara ko Esiteri na ranadi, na luve i Epaieli, kei Moatekai na Jiu, me vakataudeitaka nai karua ni vola oqo e na vuku ni Purimi.

³⁰ A sa vakauta nai vola vei ira kecega na Jiu, ki na yasana e dua na drau ka ruasagavulu ka vitu e na matanitu i Easuerosi, a sa kau vata kei na vosa ni veivakacegui kei na vosa dina,

³¹ me vakataudeitaka na siga ruarua ni Purimi me ia kina e na kena gauna, me vaka sa vakadreta vei ira ko Moatekai na Jiu kei Esiteri na ranadi, me vaka talega na nodraui lesilesi e na vukudra, e na vukudra talega na nodra kawa, io e na vuku ni lolo kei na tagi.

³² Ka sa vakataudeitaka na ka oqo e na vuku ni Purimi na lewa i Esiteri; a sa volai e nai vola.