Esiteri 8 - Vakavakadewa Makawa

Sa lesi ko Moatekai me turaga; a sa vaka ko Easuerosi me dua tale na lawa, era sa reki kina ko ira na Jiu.

¹ E na siga ko ya sa solia ko Easuerosi na tui na vale i Emani na nodra meca na Jiu vei Esiteri na ranadi. A sa lako mai ki na mata ni tui ko Moatekai; ni sa tukuna ko Esiteri sa wekana ko koya.

² A sa ucuna tale na tui na nona mama sa kauta tani maivei Emani, ka solia vei Moatekai. Ka sa lesi Moatekai ko Esiteri me turaga ni vale i Emani.

³ Sa vosa tale ko Esiteri vua na tui, ka cuva sobu ki na yavana, ka vakamasuta ni sa vakawai na matana, me vakadaroya na vere ca i Emani na luvei Ekaki, kei na nonai naki ca sa nakita ko koya me vakayacora vei ira na Jiu.

⁴ A sa dodoka yani nai titoko koula ko koya na tui vei Esiteri. A sa tu cake ko Esiteri, ka sa tu e matana na tui,

⁵ ka kaya, Kevaka sa vinakata ko koya na tui, ia kevaka ka'u sa kune loloma e matamuni, ka sa dodonu na ka oqo vua na tui, ka sa vinakati au na matamuni, me volai e dua nai vola me vukica nai vola sa cakava ko Emani, na luve i Mitaca, na luve i Ekaki, o koya ka vola ko koya me vakarusai ira na Jiu e na nona veiyasana kecega na tui:

⁶ ni'u na vosota rawa vakaevei me'u raica na ca ena yacovi ira na kai noqu? se me'u vosota rawa vakaevei me'u raica na nodra rusa na wekaqu?

⁷ Sa qai kaya ko Easuerosi na tui vei Esiteri na ranadi, kei Moatekai na Jiu, Raica, ka'u a solia vei Esiteri na vale i Emani, a sa vakalilici ko koya e na kau, ni sa dodoka na ligana vei ira na Jiu:

⁸ mo drau volavola talega e na vukudra na Jiu, e na yaca ni tui, me vaka na ka drau sa vinakata, ka me tabaki na kena drega e na mama ni tui: ni sa tabu ni vukica e dua na tamata nai vola sa volai e na yaca ni tui, ka tabaki na kena drega e na mama ni tui.

⁹ Era sa qai kacivi ko ira na nona vunivola na tui e na siga ko ya, e nai katolu ni vula, na vula ko Saivani, e na kenai karuasagavulu ka tolu ni kena siga; ka sa volai me vaka na ka kecega ka vakarota ko Moatekai, vei ira na Jiu, vei ira talega na turaga sa liu, kei ira na kovana, kei ira na turaga ni veiyasana, sa vakatekivu mai Idia ka yala ki Iciopea, e dua na drau ka ruasagavulu ka vitu na yasana, ki na yasana yadua me vaka na kenai volavola, kei na mataqali yadua me vaka na nodra dui vosavosa, vei ira talega na Jiu e na nodra mata ni vola, ka vaka na nodra vosa.

¹⁰ A sa volavola ko koya ka cavuti Easuerosi na tui, ka tabaka e na mama ni tui, ka vakauta na veivola vei ira era daucicitaka nai vola, kei ira sa vodo ose, kei ira sa vodo meule, kei na kameli, kei na manumanu totolo:

¹¹ ia e nai vola ko ya sa kaya ko koya na tui vei ira na Jiu era tiko e na koro kecega me ra soqoni vata, ka veitotaki vata me ra bula, me ra ia na veivakacacani, kei na veivakamatei, kei na veivakarusai, vei ira na tamata kaukauwa, kei ira na yasana sa via vakacacani ira, kei ira na nodra lalai kei na nodra yalewa, ka me tokitaka na nodra i yau,

¹² e na dua bauga na siga, e na yasana kecega nei Easuerosi na tui, e nai katinikatolu ni siga e na kenai katinikarua ni vula, oqori na vula ko Eta.

¹³ Sa tukuni vei ira na tamata kecega e nai vakaro sa volai me kau ki na veiyasana kecega, ka me ra vakarau ko ira na Jiu ki na siga ko ya, me ra saumi ira na nodra meca.

¹⁴ A ra sa lako yani na tamata daucicitaka nai vola era vodo meule kei na kameli, ni ra sa vakariritaki ka cikevi e na vuku ni vakaro ni tui. Ka sa tukuni yani nai vakaro mai Susani na koro vakaturaga.

¹⁵ Sa qai lako yani mai na mata ni tui ko Moatekai, ka sa vakaisulu e nai sulu vakatui sa pelu ka vulavula, kei nai sala koula levu, kei nai sulu lineni matailalai, ka lokaloka: a sa reki ka marau na koro ko Susani.

¹⁶ Sa nodra na Jiu na rarama, kei na marau, kei na reki, kei na vakarokoroko.

¹⁷ Sa reki ka marau ko ira na Jiu, a ra sa ia na kana vata ka sa dua na siga vinaka, e na yasana kecega, kei na koro kecega, sa yaco kina nai vakaro ni tui kei na nonai lesilesi. Ka ra sa vuki me Jiu e lewe vuqa vei ira na lewe ni vanua; ni sa kani ira na rere e na vukudra na Jiu.