Esiteri 7 - Vakavakadewa Makawa

Sa bula ko Esiteri kei ira na kai nona; a sa vakalilici ko Emani.

¹ A rau sa lako na tui kei Emani me kania na magiti sa cakava ko Esiteri na ranadi.

² A sa taroga tale na tui vei Esiteri, e nai karua ni siga, ni ia na gunu waini, A cava na ka ko sa masuta, i Esiteri na ranadi? ena soli ga vei iko: ka cava na ka ko sa kerea? ena vakayacori ga, ke sa wase rua kina na matanitu.

³ Sa qai vosa ko Esiteri na ranadi, ka kaya, Kevaka ko ni sa vinakati au, koi kemuni na tui, ia kevaka sa vinakata ko koya na tui, au sa masuti kemuni me'u bula ga, kei ira talega na kai noqu e na noqu kerekere:

⁴ ni keimami sa volitaki, koi au kei ira na kai noqu, me keimami vakacacani, me vakamatei, ka me rusa sara. Ia kevaka keimami sa volitaki me tagane bobula, ka yalewa bobula walega, au sa galu ga, ia ka sa dredre vua na meca me sauma tale na ka ena vakayalia ko koya vua na tui.

⁵ Sa qai vosa ko Easuerosi na tui, ka taroga vei Esiteri na ranadi, Ko cei ko koya? ka sa tiko evei ko koya sa bolea e na lomana me kitaka na ka vakaoqo?

⁶ A sa kaya ko Esiteri, A tamata ca kei na meca ko ya ko Emani na yaloca oqo. Sa qai rere ko Emani e na matadrau na tui kei na ranadi.

⁷ A sa tu cake mai na gunu waini na tui ni sa cudru, ka lako ki na were mai na vale vakatui: a sa tu cake ko Emani me kerea na nona bula vei Esiteri na ranadi; ni sa kunea sa nanuma ca vua ko koya na tui.

⁸ A sa lesu mai ko koya na tui mai na were ni vale vakatui ki na yasana ka ia kina na gunu waini, ka sa cuva no ko Emani ki nai davodavo sa tiko kina ko Esiteri. A sa kaya na tui, Ena kucuva talega na ranadi beka e mataqu e vale? Ni sa vosataka na vosa oqo na tui, era sa ubia na mata i Emani.

⁹ Sa qai kaya vua na tui ko Apona, e dua vei iratou na nona mata na tui, Raica talega, sa tu mai na vale i Emani na kau sa limasagavulu na kiupiti na kena cecere, sa cakava ko Emani me lili kina ko Moatekai, ko koya ka tukutuku vinaka e na vukuna na tui. A sa kaya na tui, Vakalilici koya kina.

¹⁰ A ra sa vakalilici Emani e na kau sa cakava ko koya me lili kina ko Moatekai. Sa qai malumu na cudru ni tui.