Esiteri 5 - Vakavakadewa Makawa

Sa lako na tui kei Emani me kana magiti vei Esiteri, 1-8. A sa rarawa ga ko Emani ni sa sega ni vakarokorokotaki koya ko Moatekai, 9-14.

¹ Ia e na kenai katolu ni siga sa vakaisulu vakaranadi ko Esiteri, ka la'ki tu e na rara eloma ni nona vale na tui, o koya ka donuya na nona vale na tui: a sa tiko na tui e na nona vale ka e nonai tikotiko vakatui, sa donuya na matamata ni vale.

² Ia ko koya na tui ni sa raici Esiteri na ranadi ni sa tu e na rara, sa lomani koya: a sa dodoka vei Esiteri ko koya na tui nai titoko koula sa taura e ligana. A sa toro voleka ko Esiteri, ka tara na mua ni titoko.

³ Sa qai kaya vua ko koya na tui, A cava ko sa vinakata, Esiteri na ranadi? ka cava na ka ko sa mai kerea? ena soli ga vei iko, kevaka ka'u na wasea rua kina na noqu matanitu.

⁴ A sa kaya ko Esiteri, Kevaka sa vinaka vua na tui, me lako mai e na siga oqo na tui kei Emani me kania na magiti ka'u sa vakarautaka vua.

⁵ Sa qai kaya na tui, Me vakusarawataki ko Emani, me caka na ka sa kaya ko Esiteri. A rau a lako yani na tui kei Emani me kania na magiti sa vakarautaka ko Esiteri.

⁶ A sa kaya vei Esiteri na tui ni sa ia na gunu waini, A cava na ka ko sa via kerea? ena soli ga vei iko: ka cava na ka ko sa masuta? ena vakayacori ga ke wase rua kina na matanitu.

⁷ Sa qai kaya ko Esiteri, Oqo na noqu masumasu kei na noqu kerekere:

⁸ Kevaka sa vinakati au na tui, a sa vinakata na tui me solia na ka ka'u sa masuta, ka vakayacora na ka ka'u sa kerea, mo drau lako mai koi kemuni na tui kei Emani ka kania na magiti ka'u na vakarautaka vei kemudrau, au na qai kitaka e na mataka me vaka sa kaya na tui.

⁹ Ni sa qai lako yani ko Emani e na siga ko ya sa marau ka reki na lomana: ia ni sa raici Moatekai ko Emani e na matamata-ni-koro ni tui, ni sa sega ni vakarokorokotaki koya, sa qai cudru sara vei Moatekai ko koya.

¹⁰ A sa kinoca ga ko Emani: ia ni sa yaco ki nona vale, sa talaki me kacivi ira na wekana, kei Seresi na watina.

¹¹ A sa tukuna vei ira ko Emani na nona totoka e na vuku ni nonai yau, kei na kena lewe vuqa na luvena, kei na ka kecega sa vakalevulevui koya kina ko koya na tui, kei na nona toroi koya cake me uasivi vei ira na turaga kei ira na nona tamata na tui.

¹² Sa kaya talega ko Emani, Ko Esiteri talega na ranadi, sa sega ni kaya me lako vata kei na tui e dua tani tale me kana e na magiti sa cakava ko koya, koi au duaduaga; a sa kaya ko koya me'u lako vata kaya na tui e na mataka talega.

¹³ Ia sa ka wale vei au na ka kecega oqo, ni'u sa raici Moatekai na Jiu ni sa tiko e na matamata-ni-koro ni tui.

¹⁴ Sa qai kaya vei koya ko Seresi na watina kei ira kece na wekana, Me caka mada e dua na kau me limasagavulu na kiupiti na kena cecere, ia e na mataka mo vosa vua na tui me vakalilici kina ko Moatekai: mo qai marau ni ko sa lako kaya na tui ki na magiti. A sa vinakata ko Emani na ka oqo, a sa kaya me vakaduri cake na kau.