Esiteri 4 - Vakavakadewa Makawa

Sa tagi ko Moatekai; ka sa vaka ko koya me la'ki vakamamasu vua na tui ko Esiteri.

¹ Ni sa kila ko Moatekai na ka kecega sa caka, sa dresulaka na nonai sulu ko Moatekai, ka vakaisulutaka nai sulu taga ka sa vakadravusa, ka lako yani ki loma ni koro, ka tagi vakadomoilevu ka vakararawa;

² ka lako sara mai ki na nona matamata-ni-koro na tui: ni sa tabu me curu e dua ki na matamata-ni-koro ni tui ni sa vakaisulu taga.

³ Ia e na veiyasana kecega, sa yaco kina nai vakaro ni tui kei na nonai lesilesi, sa ra tagi vakalevu kina ko ira na Jiu, ka ra sa lolo, ka tagi yaso, ka qoqolou; ka lewe vuqa era sa davo e nai sulu taga kei na dravusa.

⁴ A ra sa mai tukuna vei Esiteri ko ira na nona vada kei ira na nona mata. Sa qai rarawa vakalevu na yalona na ranadi; a sa vakauta ko koya nai sulu me vakasulumi Moatekai, ka me kau tani maivua na nonai sulu taga: a sa sega ni taura ko koya.

⁵ Ia ko Esiteri sa qai kacivi Etaki, e dua vei ira na nona mata na tui, ka lesia ko koya me qaravi koya na ranadi, a sa tukuna vua me la'ki taroga vei Moatekai, na ka oqo, ka cava na vuna.

⁶ A sa lako yani ko Etaki vei Moatekai ki na salatu ni koro, e donuya na matamata-ni-koro ni tui.

⁷ A sa tukuna vua ko Moatekai na ka kecega sa yaco vua, kei na levu ni lavo sa yalataka ko Emani me solia ki na nona vale ni yau na tui me kenai sau ni nodra vakarusai na Jiu.

⁸ Sa solia talega vua nai vola ni vakaro sa caka mai Susani me vakarusai ira, me vakatakila vei Esiteri, ka me sereka vua, me vakaroti koya talega me la'ki curu vua na tui, me vakamasuti koya, ka kerekere vua e na vukudra na kai nona.

⁹ A sa lako ko Etaki ka tukuna vei Esiteri na vosa i Moatekai.

¹⁰ A sa vosa vei Etaki ko Esiteri, ka tauca vua e dua nai vakaro vei Moatekai, ka vaka:

¹¹ Era sa kila ko ira kece na nona tamata na tui, kei ira na tamata e nona yasana kece na tui, kevaka sa lako vua na tui ki nona yasana eloma e dua, se tagane se yalewa, ni sa sega ni kacivi, sa dua ga na kena lewa e na vukuna, me sa vakamatei, sa bula ga ko koya sa dodoka vua ko koya na tui nai titoko koula: ia koi au, sa qai bogi tolusagavulu ka'u sa sega kina ni kacivi me'u lako vua na tui.

¹² A sa tukuni vei Moatekai na vosa i Esiteri.

¹³ A sa kaya ko Moatekai me tukuni vei Esiteri, Mo kakua ni nanuma ko na bula e na vale ni tui, ka mo sega kina ni vakataki ira kece na Jiu.

¹⁴ Ia kevaka ko sa galu sara e na gauna oqo, ena qai yaco na veisereki kei na bula vei ira na Jiu, mai na dua na yasana tani; ia ena vakarusai ga ko iko kei na mataqali ni tamamu: ia ko cei e kila, de ko sa yaco beka mo ranadi e na vuku ni gauna oqo?

¹⁵ Sa qai kaya ko Esiteri me ra vaka vei Moatekai,

¹⁶ Mo lako, mo vakasoqoni ira vata kece na Jiu era tiko e Susani, ka mo dou lolovaki au, ia mo dou kakua ni kana se gunu e na bogi se na siga, ka bogi tolu: koi au talega kei iratou na noqu goneyalewa keitou na lolo talega; ia ka'u na qai lako ga vua na tui, ia sa sega ni vaka na lawa: ia kevaka ka'u sa mate, au sa mate ga.

¹⁷ A sa lako yani ko Moatekai, ka kitaka me vaka na ka kecega ka vakarota vua ko Esiteri.