Esiteri 3 - Vakavakadewa Makawa

Sa cudru ko Emani; ka sa rawata nai vakaro me ra vakawabokotaki ko ira na Jiu.

¹ Ia ni sa oti na veika oqo sa qai vakaceceretaki Emani na luve i Mitaca ka tagane, na luve i Ekaki, ko Easuerosi na tui, a sa vueti koya cake, ka vakatikora na nonai tikotiko me cecere cake vei ira kecega na turaga era tiko vata kaya.

² A ra sa cuva sobu ka rokovi Emani ko ira kece na nona tamata na tui, e na matamata-ni-koro ni tui: ni sa vakakina nai vakaro ni tui e na vukuna. Ia sa sega ni cuva ko Moatekai, se vakarokoroko vua.

³ Era sa qai kaya vei Moatekai ko ira na nona tamata na tui era sa tiko e na matamata-ni-koro ni tui, A cava ko sa bese kina ki nai vakaro ni tui?

⁴ Ia ni ra sa vosa vua e na veisiga, a sa sega ni vakarorogo vei ira ko koya, era sa qai tukuna vei Emani, me ra kila se na donu na ka e kitaka ko Moatekai, se segai: ni sa tukuna oti vei ira ko koya ni sa Jiu ko koya.

⁵ Ia ni sa kunea ko Emani ni sa sega ni cuva ko Moatekai, se vakarokoroko vua, sa qai cudru vakalevu ko Emani.

⁶ Ia sa nanuma ni ka wale me vakamatei Moatekai duaduaga: o koya sa segata kina ko Emani me vakarusai ira kecega na Jiu e na matanitu taucoko i Easuerosi, io ko ira era kai vata kei Moatekai ni sa tukuni oti vua ni ra kai vata kei Moatekai.

⁷ E nai matai ni vula, na vula ko Naisani, e nai katinikarua ni yabaki i Easuerosi na tui, era sa cakava na Puri, oqori na vakawiri madigi, e na mata i Emani e na veisiga, kei na veivula, me yacova nai katinikarua ni vula, io ko Eta.

⁸ A sa kaya ko Emani vua na tui ko Easuerosi, Sa dua na matanitu era sa dui veiseyaki ka dui tikotiko kei ira na tamata, e na veiyasana kecega ni nomuni matanitu; a sa dua tani na nodra lawa ka sa dua tani na nodra na matanitu kecega; era sa sega talega ni vakabauta na nona lawa na tui: o koya sa sega kina ni yaga vei kemuni na tui mo ni vosoti ira.

⁹ Kevaka sa vinaka vei kemuni na tui, me volai mada me ra vakawabokotaki: ia koi au, au na solia e dua na oba na taledi siliva ki na ligadra era sa lesi me vakayacora na ka oqo, ka me kau ki na nona vale ni yau na tui.

¹⁰ A sa ucuna na mama mai na ligana ko koya na tui, ka solia vei Emani na luve i Mitaca, na luve i Ekaki, na nodra meca na Jiu.

¹¹ A sa kaya vei Emani na tui, Sa soli vei iko na siliva, ko ira talega na tamata, mo kitaka vei ira na ka e vinaka vei iko.

¹² Era sa qai kacivi ko ira na nona vunivola na tui, e nai katinikatolu ni siga e nai matai ni vula, a sa volai, me vaka na vosa kece i Emani, vei ira na nona tamata turaga na tui, kei ira na kovana ni veiyasana kecega, kei ira na turaga ni tamata kecega e na veiyasana, me vaka na kenai volavola, vei ira talega na mataqali kecega e na nodra dui vosavosa; sa volai e na yaca ni tui ko Easuerosi, a sa tabaki na kena drega e na nona mama na tui.

¹³ A sa kauta na veivola ko ira na tamata era sa daucicitaka nai vola ki na veiyasana kecega ni tui, ka me vakarusai ira na Jiu, ka vakamatea, ka vakaoti ira kecega, ko ira na gone kei ira na qase, na gone lailai kei ira na yalewa, e na dua bauga na siga, e nai katinikatolu ni siga e nai katinikarua ni vula, na vula ko Eta, me taura talega na nodra i yau mei toki ni valu.

¹⁴ Sa qai lavetaki nai vola ka sa kau ki na veiyasana kecega me tukuni kina vei ira na tamata kecega nai vakaro ni tui, ka me ra vakarau tu ka waraka na siga ko ya.

¹⁵ Era sa qai lako yani na tamata era daucicitaka nai vola, ni ra sa vakariritaki e na vosa ni tui, a sa soli nai vakaro mai Susani na koro vakaturaga. A rau sa tiko sobu me gunu vata ko koya na tui kei Emani; ia sa kidroa ga na koro ko Susani.