Esiteri 2 - Vakavakadewa Makawa

Sa digitaki ko Esiteri me ranadi, 1-20. Sa vakavotuya ko Moatekai ni sa bukiveretaki na tui, 21-23.

¹ Ni sa oti na veika oqo, a sa malumu na cudru i Easuerosi na tui, sa qai nanumi Vasitai ko koya, kei na ka sa cakava ko koya, kei na ka sa lewai e na vukuna.

² Sa qai kaya ko ira na nona tamata na tui era sa dauqaravi koya, Me vakasaqarai mada eso na goneyalewa matavinaka me nomuni na tui:

³ ka me lesia ko koya na tui eso na tamata e na veiyasana kecega ni nona matanitu, me ra vakasoqona vata na goneyalewa matavinaka kecega ki Susani na koro vakaturaga, ki na nodra vale na yalewa, me vakatawai ira ko Ikai, na nona mata na tui, ko koya sa dauvakatawai ira na yalewa; ka me soli vei ira na nodra ka ni veivakasavasavataki:

⁴ ia na goneyalewa sa vinakata na tui me ranadi, mei sosomi kei Vasitai. A sa vinaka vua na tui na ka oqo; a sa kitaka vakakina.

⁵ Sa tiko mai Susani na koro vakaturaga e dua na Jiu, na yacana ko Moatekai, na luve i Jairi ka tagane, na luve i Semeai ka tagane, na luve i Kisi ka tagane, na Penijamini;

⁶ ko koya ka kau tani vata mai Jerusalemi kei ira na bobula era a vakabobulataki vata kei Jekonaia na tui Juta, ko koya ka kauta tani ko Nepukanesa na tui Papiloni.

⁷ Ia ko koya oqo sa susugi Etasa, ko ya ko Esiteri, na luve i tamana lailai: ni sa sega na tamana se tinana, a sa matavinaka ka rairai vinaka na goneyalewa ko ya; ia ni sa mate na tamana kei tinana, sa susugi koya me luvena ko Moatekai.

⁸ A sa yaco, ni sa rogo nai vakaro ni tui kei na nona sau, a sa soqoni vata ki Susani na koro vakaturaga ko ira na goneyalewa era lewe vuqa, me vakatawai ira ko Ikai, sa qai kau talega ko Esiteri ki na vale ni tui, me vakatawai koya ko Ikai, ko koya sa dauvakatawai ira na yalewa.

⁹ A sa vinakata na goneyalewa oqo ko koya, a sa caka vinaka vua; a sa solia sara vua na nona ka ni veivakasavasavataki, kei na nona ka tani e yaga vua, ka le vitu na goneyalewa sa kilikili me soli vua mai na vale ni tui: a sa lewa me tiko ko koya kei iratou na nona goneyalewa e na nodra vale vinaka sara na yalewa.

¹⁰ Ia sa sega ni vakatakila ko Esiteri se yalewa ni vei se ko cei na wekana: ni sa vakaroti koya ko Moatekai me kakua ni tukuna.

¹¹ A sa daulako voli e na veisiga kecega ko Moatekai e na mata ni bai ni nodra vale na yalewa, me kila se sa vakaevei ko Esiteri, kei na ka sa yaco vua.

¹² A ra sa veitaravi na yalewa kecega ka me ra dui curu yadua vua na tui ko Easuerosi, ni ra sa tiko mada ka vula tinikarua, me vaka na kenai valavala vei ira na yalewa, (ni sa oti vakakina na nodra siga ni veivakasavasavataki, ka me ono na vula e na waiwai mura, ka ono na vula e nai saluaki boi vinaka, kei na veika me ra vakasavasavataki kina na yalewa;)

¹³ era sa qai curu vakaoqo vua na tui ko ira yadua na goneyalewa; a ka kece sa gadreva ko koya sa soli vua me kauta vata kaya mai na nodra vale na yalewa ki na vale ni tui.

¹⁴ Sa lako e na yakavi, ka lesu mai e na mataka ki nai karua ni nodra vale na yalewa, sa vakatawa kina ko Seasikasi, na nona mata na tui, ko koya ka vakatawai ira na watina lalai: sa sega tale ni curu vua na tui ko koya, kevaka sa sega ni vinakati koya na tui, ka sa cavuti na yacana.

¹⁵ Ia ni sa yaco na siga me curu vua na tui ko Esiteri na luve i Epaieli na tamana lailai i Moatekai, ko koya ka susugi koya me luvena, sa sega ni taroga e dua na ka, oqori ga ka lesia ko Ikai na nona mata na tui, ko koya sa dauvakatawai ira na yalewa. A sa vinakati Esiteri ko ira kecega era sa raici koya.

¹⁶ A sa kau ko Esiteri vua na tui ko Easuerosi ki na vale ni tui e nai katini ni vula, na vula ko Tipeci, e nai kavitu ni yabaki ni nona lewa.

¹⁷ A sa ka levu na loloma ni tui vei Esiteri, ka lailai vei ira kecega na yalewa tani, a sa vinakati koya ka lomani koya vakalevu cake vei ira kecega na goneyalewa; a sa vakaisalataki koya e nai sala vakaranadi, ka buli koya me ranadi mei sosomi kei Vasitai.

¹⁸ Sa qai cakava ko koya na tui e dua na magiti vakaidina, vei ira kecega na nona tamata turaga kei ira na nona tamata, io na magiti kei Esiteri; a sa vakaceguya na veiyasana, ka soli ka-ni-loloma, me vaka sa dausolia vakaturaga na tui.

¹⁹ Ia ni sa qai soqoni vata vakarua ko ira na goneyalewa, sa qai tiko ko Moatekai mai na matamata-ni-koro ni tui.

²⁰ Ia sa sega ni tukuna na wekana ko Esiteri se na nona mataqali; me vaka ka vakarota vua ko Moatekai; ni sa muria nai vakaro i Moatekai ko Esiteri, me vaka e na gauna ka susugi tiko kina vua.

²¹ E na gauna oqori, ni sa tiko mai na matamata-ni-koro ni tui ko Moatekai, erau sa cudru e lewe rua vei iratou na nona mata na tui, io e le rua vei iratou sa vakatawa na katuba, ko Pikicani kei Teresi, a rau sa segata me rau vakamatea na tui ko Easuerosi.

²² Ka sa kila ko Moatekai, a sa tukuna ko koya vei Esiteri na ranadi; ka sa vakatakila vua na tui ko Esiteri nai tukutuku i Moatekai.

²³ Ia ni sa qaqai na ka oqo, sa kilai; a rau sa vakalilici ruarua e na kau: a sa volai e matana na tui e nai vola ni veika sa caka.