Esera 9 - Vakavakadewa Makawa

Sa rarawa ko Esera ni sa veiwatini kei ira na yalewa tani ko ira na Jiu, 1-5; a sa masu ko koya vua na Kalou.

¹ Ia ni sa caka oti na veika oqo, sa lako mai vei au ko ira na turaga, ka kaya, O ira na Isireli, kei ira na bete, kei ira na Livai, era sa sega ni tawasei ira tani maivei ira na lewe ni veivanua, era sa cakacaka me vaka na nodra i valavala vakasisila na kai Kenani, na Itaiti, na Perisaiti, na Jepusaiti, na luve i Amoni, na kai Moapi, na kai Ijipita, kei ira na Amoraiti:

² ni ra sa bauta na luvedra yalewa me watidra, me watidra talega na luvedra tagane: a ra sa dua vata kina na kawa tabu kei ira na lewe ni veivanua oqo; io era sa liu e nai valavala ca oqo ko ira na turaga kei ira na turaga ni veimataqali.

³ Ia ni'u a rogoca na ka oqo, au sa dresulaka na noqu i sulu kei na noqu i tutuvi, ka vutia tani na drau ni uluqu kei na kumiqu, ka'u sa tiko sobu ka sa kidacala.

⁴ Era sa qai soqoni vata mai vei au ko ira yadua era sa sautaninini e na vosa ni nodra Kalou na Isireli, e na vuku ni nodra talaidredre era a vakabobulataki; ia ka'u sa tiko ka kidacala ka yacova na kena vakacabori nai soro ni yakavi.

⁵ Ia ni sa vakacabori nai soro e na yakavi, au sa tu cake e na noqu rarawa; ka sa dresulaki tu na noqu i sulu kei na noqu i tutuvi, ka'u sa qai vakatekiduru, ka dodoka yani na ligaqu vei Jiova na noqu Kalou;

⁶ ka kaya, Kemuni na noqu Kalou, au sa madua ka velavela ni'u tacake vei kemuni na noqu Kalou: ni sa tubu cake na neimami caka cala ka sa sivia na uluimami, a sa tubu na neimami talaidredre me yala ki lomalagi.

⁷ Mai na gauna ni neimami qase, keimami sa talaidredre vakalevu ka yacova na siga oqo; ia e na vuku ni neimami caka cala, keimami sa soli oti yani ki na ligadra na tui ni veivanua, koi keimami kei ira na neimami tui kei ira na neimami bete, ki nai seleiwau, ki na veivakabobulataki, kei na veivakacacani, kei na veivakamaduataki, me vaka e na siga oqo.

⁸ Ia sa qai lomani keimami ko Jiova na neimami Kalou e na dua na gauna lekaleka wale oqo, me vakavoca vei keimami eso me bula, ka me solia vei keimami nai vako e na nona vale tabu, ka me vakararamataka na mata i keimami na neimami Kalou, ka vakaukauwataki keimami vakalailai e na neimami vakabobulataki.

⁹ Ni keimami a tamata bobula; ia sa sega ni biuti keimami na neimami Kalou e na neimami vakabobulataki, ka sa vakayacora vei keimami na yalololoma e na matadra na tui Perisia, me vakaukauwataki keimami, me tara na vale ni neimami Kalou, ka me vakavinakataka na tikina sa ca tu, me solia talega vei keimami e dua na bai e Juta kei Jerusalemi.

¹⁰ Ia koi kemuni na neimami Kalou, a cava me keimami kaya, e na vuku ni ka oqo? ni keimami sa biuta na nomuni vakaro,

¹¹ ko ni sa vakarota e na gusudra na nomuni talatala na parofita, ni kemuni sa kaya, A vanua dou sa lako kina mo dou taukena, sa vanua dukadukali, e na nodra dukadukali na lewe ni veivanua, e na nodra ka vakasisila, sa sinai kina e na nodra dukadukali, mai na kenai yalayala e dua ki na kenai yalayala kadua.

¹² O koya oqo mo dou kakua ni solia na nomudou goneyalewa ki na nodra gonetagane, kakua talega ni kauta na nodra goneyalewa vei ira na nomudou gonetagane, se qara na ka me ra vakacegu kina se vakaiyau kina ka tawa mudu: mo dou kaukauwa kina, ka kania na kena vinaka ni vanua, ka laiva vei ira na luvemudou me ra taukena, ka tawa mudu.

¹³ Ia ni sa yacovi keimami na ka kecega oqo e na vuku ni neimami caka ca, kei na neimami talaidredre levu, ka ni sa sega ni tautauvata kei na neimami valavala ca na cudru ni Kalou vei keimami, sa lailai sobu ga, ka sa vakabulai keimami vakaoqo;

¹⁴ me keimami vakacacana tale li na nomuni vakaro, ka la'ki veiwekani kei ira na tamata era sai valavala vakasisila vakaoqo? ko ni na sega li ni cudruvi keimami kina mo ni vakaoti keimami, me kakua kina e dua sa vo se dro bula?

¹⁵ Ia Jiova na nodra Kalou na Isireli, ko ni sa yalododonu; ni keimami sa vo ka bula, me vaka e na siga oqo: raica, keimami sa tiko e matamuni e na neimami talaidredre: ni keimami sa sega ni tu rawa e matamuni e na vuku ni ka oqo.