Esera 7 - Vakavakadewa Makawa

Sa vakarau ko Esera kei ira na lewe vuqa na Jiu me lako ki Jerusalemi, a sa soli vua nai vakaro i Atakisekise na tui.

¹ Sa oti na veika oqo, e na gauna sa lewa kina ko Atakisekise na tui Perisia, ko Esera na luve i Siraia ka tagane, na luve i Asaraia ka tagane, na luve i Ilikaia ka tagane,

² na luve i Salumi ka tagane, na luve i Setoki ka tagane, na luve i Eitupi ka tagane,

³ na luve i Amaraia ka tagane, na luve i Asaraia ka tagane, na luve i Miraioci ka tagane,

⁴ na luve i Seraia ka tagane, na luve i Usai ka tagane, na luve i Puki ka tagane,

⁵ na luve i Episua ka tagane, na luve i Finiase ka tagane, na luve i Eliesa ka tagane, na luve i Eroni na bete levu ka tagane:

⁶ sa lako cake ko Esera oqo mai Papiloni; a sa vunivola uasivi ko koya e na vunau i Mosese, ka solia ko Jiova na nodra Kalou na Isireli: a sa solia vua ko koya na tui na ka kecega ka kerea ko koya, me vaka na liga i Jiova na nona Kalou sa tiko vua.

⁷ A sa lako cake ki Jerusalemi eso vei ira na Isireli, ka so na bete, kei na Livai, kei na dausere, kei nai vakatawa ni katuba, kei na Necinimi, e nai kavitu ni yabaki ni lewa i Atakisekise na tui.

⁸ A sa yaco ki Jerusalemi e nai kalima ni vula, e nai kavitu ni yabaki ni tui.

⁹ Ni sa cavu tu ko koya me lako cake mai Papiloni e nai matai ni siga e nai matai ni vula, a sa yaco ki Jerusalemi e nai matai ni siga e nai kalima ni vula, ka ni sa tiko vua na liga vinaka ni nona Kalou.

¹⁰ Ni sa vakarautaka oti na lomana ko Esera me vakasaqaqara e na vunau i Jiova, ka me cakava talega, ka me vakavulica e Isireli nai lesilesi kei na lewa.

¹¹ A sa vakaoqo nai vola sa solia ko Atakisekise, na tui kivei Esera na bete, na vunivola, io na vunivola e na vosa ni vunau i Jiova, kei na nonai vakaro vei ira na Isireli:

¹² Koi au ko Atakisekise, na nodra tui na tui, kivei Esera na bete, na vunivola vuku e na vunau ni Kalou ni lomalagi, me nomu na vakacegu vakaidina, ia me vaka sa dauvolai.

¹³ Au sa vakarota, e na vukudra kecega na Isireli, kei ira na nodra bete, kei ira na Livai, e na noqu matanitu, me ra lako vata kei iko ki Jerusalemi ko ira kece era vinakata e lomadra vakataki ira.

¹⁴ Ni sa talai iko na tui, kei na nona lewe ni bose eratou le vitu, me taroga e na vuku i Juta kei Jerusalemi, me vaka na vunau ni nomu Kalou sa tu e ligamu;

¹⁵ ka me kauta na siliva kei na koula, eratou sa vinakata me ratou vakacabora ko koya na tui kei iratou na nona lewe ni bose vua na nodra Kalou na Isireli, sa tiko mai Jerusalemi na nona vale,

¹⁶ kei na siliva kei na koula kecega ko sa kunea rawa e na veiyasana kece vaka-Papiloni, kei na ka era vinakata me ra vakacabora ko ira na tamata, kei ira na bete, ni sa lomadra me vakacabora e na vuku ni vale ni nodra Kalou mai Jerusalemi:

¹⁷ mo volia mada ga e nai lavo oqo, na pulumokau eso, na sipi tagane eso, na lami eso, kei na kedrai madrali laukana, kei na kedrai madrali gunuvi, ka vakacabora e dela ni cabocabo-ni-soro e na vale ni nomudou Kalou mai Jerusalemi.

¹⁸ Ia na ka kecega sa vinaka vei iko kei ira na wekamu, me caka e na siliva kei na koula sa vo, mo kitaka ga, me vaka na loma ni nomudou Kalou.

¹⁹ Ai yaya talega sa soli vei iko me ia kina na cakacaka e na vale ni nomu Kalou, mo solia e na mata ni Kalou ni Jerusalemi.

²⁰ Kei nai kuri ni ka sa yaga ki na vale ni nomu Kalou, sa yaga mo solia, mo solia ga mai na nona vale ni yau na tui.

²¹ Ia koi au ko Atakisekise na tui, au sa vakaroti ira kecega na dau-ni-yau mai tai kadua ni uciwai, me caka vakariri na ka kecega sa na kerea vei kemudou ko Esera na bete, na vunivola ni vunau ni Kalou ni lomalagi,

²² ke sa yacova e dua na drau na taledi siliva, ka dua na drau nai vakarau witi, ka vitu na drau ka limasagavulu na kaloni waini, ka vitu na drau ka limasagavulu na kaloni waiwai, kei na masima sa sega ni volai na kena levu.

²³ A ka kecega sa vakarota ko koya na Kalou ni lomalagi, me caka vakavinaka e na vuku ni nona vale na Kalou ni lomalagi: ia ka cava me yaco kina na cudru ki na nona matanitu na tui, vei iratou talega na luvena?

²⁴ Keitou sa tukuna talega vei kemudou, e na vukudra na bete kei ira na Livai, na dausere, nai vakatawa ni katuba, na Necinimi, kei na tamata era qarava na vale ni Kalou oqo, sa sega ni tara me taroga vei ira nai vakacavacava, se na kamunaga, se na ka e daucaka vua na tui.

²⁵ Ia o iko, Esera, me vaka na vuku ni nomu Kalou, sa tu vei iko, mo lesia eso me turaga-ni-lewa lalai ka so me turaga-ni-lewa lelevu, me ra lewai ira kecega na tamata mai tai kadua ni uciwai, o ira kece era kila na vunau ni nomu Kalou; ka vakavulici ira era sega ni kila.

²⁶ Ia ko ira kece sa bese ni muria na vunau ni nomu Kalou, kei na vunau ni tui, me cudruvi vakasauri ko koya, se me mate, se me vakasevi tani, se me kovei na nonai yau, se me biu ki na vale ni veivesu.

²⁷ Me vakavinavinakataki ko Jiova na Kalou ni noda qase, o koya sa vakauqeta na lomana na tui, me vakaiukuukutaka na vale i Jiova, mai Jerusalemi:

²⁸ ka sa vakayacori au me'u lomani e matadra na tui, kei ira na nona lewe ni bose, kei ira kecega na nona tamata turaga qaqa na tui, Ia ka'u a vakaukauwataki ni sa tiko vei au na liga i Jiova na noqu Kalou, ka'u a qai vakasoqona vata na tamata era sa liu maivei ira na Isireli, me ra lako cake vata kei au.