Esera 6 - Vakavakadewa Makawa

Sa vakarota ko iratou na tui Perisia me tara na vale ni soro, a sa caka vakaoti, ka sa curumi, ka ia na kana vata ni lako-sivia.

¹ Sa qai vakarota ko Taraiase na tui, ka sa qarai e na vale ni vola, sa maroroi tu kina na ka talei mai Papiloni.

² A sa kune e dua nai vola vivigi mai Akimeca, e na vale vakaturaga mai na vanua ko Mitia, sa volai kina na ka me nanumi, ka sa vaka tu oqo:

³ E nai matai ni yabaki i Sairusi na tui, sa vakarota ko Sairusi na tui e na vuku ni vale ni Kalou mai Jerusalemi, Me tara na vale oqori, na yasana ka vakacabori kina nai soro, ia me viritaki me kaukauwa na kena yavu: a kena cecere me onosagavulu na kiupiti, na kena raraba me onosagavulu na kiupiti;

⁴ me tolu na yatu vatu lelevu, ka dua na yatu kau vou: ia me soli na kenai voli mai na vale ni tui:

⁵ ia me vakasukataki tale nai yaya koula kei na siliva ni vale ni Kalou, ka kauta ko Nepukanesa mai na vale mai Jerusalemi, ka kauta ki Papiloni; ia me kau tale ki na vale ni Kalou mai Jerusalemi, ki na kena yasana yadua, ka me viritu e na vale ni Kalou.

⁶ Ia, ko iko Tatinai, na kovana mai tai kadua, kei Sicari-posinai, kei ira na nomudrau i tokani na Efasakaiti, mai tai kadua ni uciwai, dou tiko tani kina:

⁷ mo dou laiva mada na cakacaka ni vale ni Kalou oqo; me ra tara ga na vale ni Kalou oqo e na kena vanua, na nodra kovana na Jiu, kei ira na nodra qase na Jiu.

⁸ Au sa vakarota talega na ka mo dou cakava vei ira na nodra qase na Jiu, me tara kina na vale ni Kalou oqo: ka me soli nai voli vei ira na tamata oqo mai na nonai yau na tui, io mai nai vakacavacava mai tai kadua, me ra kakua ni tarovi.

⁹ Kei na ka era sa dravudravua kina, na luve ni pulumokau eso, kei na sipi tagane eso, kei na lami eso, mei soro kama vua na Kalou kei lomalagi, na witi, na masima, na waini, kei na waiwai, me vaka na ka era lesia na bete era tiko mai Jerusalemi, me soli vei ira e na veisiga, me soli tikoga:

¹⁰ me ra vakacabora nai soro e boi vinaka vua na Kalou ni lomalagi, ka masulaka me bula na tui, kei iratou na luvena.

¹¹ Au sa vakarota talega, e na vukuna e dua sa vakatanitaka na vosa oqo, me taurivaki na kau ni nona vale, ka vakaduri cake, me qai vakalilici kina ko koya; ia mei sovasova ni benu na nona vale e na vuku ni ka oqo.

¹² Ia na Kalou, ko koya sa vakatikora maikea na yacana, me vakarusai ira kecega na tui kei ira na tamata, era dodoka na ligadra me vakatanitaka ka vakarusa na vale ni Kalou oqo mai Jerusalemi. Oi au ko Taraiase, au sa vakarota; me caka vakusakusa sara.

¹³ Ia ko Tatinai, na kovana e na tai ni uciwai oqo, kei Sicari-posinai, kei ira na nodraui tokani, era sa kitaka vakusakusa na ka ka talaki kina ko Taraiase na tui.

¹⁴ A ra sa tara ko ira na nodra qase na Jiu, ka cakacaka yaco, ni sa parofisai ko Akeai na parofita, kei Sakaraia na luve i Ito. A ra sa tara tiko, ka vakaotia, me vaka nai vakaro ni nodra Kalou na Isireli, ka vaka nai vakaro i Sairusi, kei Taraiase, kei Atakisekise na tui Perisia.

¹⁵ A sa caka vakaoti na vale oqo e nai katolu ni siga ni vula ko Eta, e nai kaono ni yabaki ni lewa i Taraiase na tui.

¹⁶ A ra sa ia na so levu ni curu vale ni Kalou oqo e na marau, ko ira na Isireli, ko ira na bete, kei ira na Livai, kei na kedra vo era vakabobulataki,

¹⁷ a ra sa vakacabora, ni sa curumi na vale ni Kalou oqo, e dua na drau na pulumokau, e rua na drau na sipi tagane, e va na drau na lami; kei nai soro ni valavala ca e na vukudra kecega na Isireli, e tinikarua na me tagane, me vaka nai wiliwili ni nodra mataqali na Isireli.

¹⁸ A ra sa lesia na bete e na kedrai wasewase, kei ira na Livai e na nodra i tavi, ki na cakacaka vua na Kalou, mai Jerusalemi; me vaka sa volai e nai vola i Mosese.

¹⁹ A ra sa ia na kana vata ni lako-sivia ko ira ka vakabobulataki e nai katinikava ni siga ni matai ni vula.

²⁰ Ni ra sa vakasavasavataki vata ko ira na bete kei ira na Livai, era sa savasava kecega, ka ra vakamatea na lami ni lako-sivia e na vukudra kece era a vakabobulataki, e na vukudra talega na wekadra na bete, e na vukudra talega.

²¹ A ra sa kania ko ira na Isireli, era sa lako tale mai na veivakabobulataki, kei ira kece era tawasei ira mai na nodra dukadukali na lewe ni vanua, me ra qarai Jiova na nodra Kalou na Isireli,

²² a ra sa soqoni vata e na marau ka kana madrai sa sega ni vakaleveni, ka bogi vitu: ni sa vakamarautaki ira ko Jiova, ka sa vagolea na lomana na tui Asiria vei ira, me vakaukauwataka na ligadra e na cakacaka ni vale ni Kalou, na nodra Kalou na Isireli.