Esera 5 - Vakavakadewa Makawa

Sa tara ga na vale ni soro, a ra sa sega ni tarova rawa ko ira na meca.

¹ Erau sa qai parofisai, ko Akeai na parofita, kei Sakaraia na luve i Ito, vei ira na Jiu, era tiko mai Juta kei Jerusalemi, io vei ira, e na yaca ni nodra Kalou na Isireli.

² Sa qai tu cake ko Serupapeli na luve i Sialitieli, kei Jesua na luve i Josataki, ka vakatekivu me tara na vale ni Kalou mai Jerusalemi: a sa veivuke kei rau koi rau na parofita ni Kalou.

³ E na gauna ko ya, sa lako mai vei ira ko Tatinai, na kovana e na tai mai oqo ni uciwai, kei Sicari-posinai, ko ira kei na nodraui tokani, ka kaya vei ira, O cei sa vakaroti kemudou mo dou tara na vale oqo, ka viria na bai oqo?

⁴ Keitou a qai kaya vei ira vaka, O cei na yacadra na tamata era tara na vale oqo?

⁵ A sa vakaraici ira tiko na nodra qase na Juta na mata ni nodra Kalou, me dredre kina na nodra tarovi, ka me yaco mada na ka oqo vei Taraiase: a ra sa qai vola na kenai sau e na dua nai vola e na vuku ni ka oqo.

⁶ Ai vola era vakauta vei Taraiase na tui ko Tatinai na kovana e na tai ni uciwai oqo, kei Sicari-posinai, kei ira na nonai tokani na Efasakaiti, era tiko e na tai ni uciwai oqo:

⁷ era vakauta nai vola vua, a sa volai vakaoqo: Vei Taraiase na tui, me nomuni na vakacegu vakaidina.

⁸ Mo ni kila mada na tui, ni keitou a lako ki na vanua qali ko Juta, ki na nona vale na Kalou levu, sa tara e na vatu lelevu, a sa toka na kau e na kena lalaga, a sa caka vakusakusa na cakacaka oqo, ka sa yaco e na ligadra.

⁹ Keitou a qai tarogi ira na qase ko ya, ka vosa vakaoqo vei ira, O cei ka vakaroti kemudou mo dou tara na vale oqo, ka viria na bai oqo?

¹⁰ Keitou a taroga talega na yacadra, me vakatakila vei kemuni, me keitou vola na yacadra na tamata era sa liu vei ira.

¹¹ A ra a vosa vakaoqo, ka kaya, Oi keimami na nona tamata na Kalou ni lomalagi kei vuravura, ia keimami sa tara na vale ka tara makawa sa vuqa na kena yabaki, ka tara e dua na tui sa turaga levu vei ira na Isireli, ka vakatura cake.

¹² Ia ni ra sa vakacudruya na Kalou ni lomalagi ko ira na neimami qase, sa qai soli ira ko koya ki na liga i Nepukanesa na tui Papiloni, na kai Kalitia, o koya ka vakarusa na vale oqo, ka kauti ira vakabobula na tamata ki Papiloni.

¹³ Ia e nai matai ni yabaki i Sairusi na tui Papiloni, sa dua na nonai vakaro ko Sairusi na tui ko ya me tara na vale ni Kalou oqo.

¹⁴ Ia nai yaya koula talega kei na siliva ni vale ni Kalou, ka kauta ko Nepukanesa mai na vale ni soro mai Jerusalemi, ka kauta ki na bure kalou mai Papiloni; ia sa kauta tale mai na bure kalou mai Papiloni ko Sairusi, ka sa soli vua e dua, na yacana ko Sesipasa, o koya ka lesia ko koya me kovana;

¹⁵ ka kaya vua, Mo taura nai yaya oqo, mo lako, ka kauta ki na vale ni Kalou mai Jerusalemi, ia me tara mada na vale ni Kalou e na kena yasana.

¹⁶ Sa qai lako mai ko Sesipasa ko ya, ka viritaka na yavu ni vale ni Kalou mai Jerusalemi: ia mai na gauna ko ya ka yacova na gauna oqo, sa tara tiko, a sa sega ni oti.

¹⁷ Ia kevaka sa vinaka vei kemuni na tui, me sa qarai e na nomuni vale ni yau na tui, mai Papiloni, me kilai se sa vakakina se segai, se sa dua nai vakaro i Sairusi na tui me tara na vale ni Kalou oqo mai Jerusalemi; mo ni qai tukuna na lomamuni na tui vei keitou.