Esera 4 - Vakavakadewa Makawa

Sa ra gumatua ko ira na kai Samaria, me tarova na kena tara na vale ni soro mai Jerusalemi.

¹ Ia ni ra sa rogoca ko ira na nodra meca na Juta kei ira na Penijamini, ni ra sa tara tiko na vale vei Jiova na nodra Kalou na Isireli ko ira era a vakabobulataki;

² era sa lako mai kivei Serupapeli, kei ira era liu vei ira na qase, ka kaya vei ira, Me da tara vata kei kemudou: ni keimami sa qarava na nomudou Kalou, me vakataki kemudou; ia keimami sa soro vua mai na gauna i Esa-atoni na tui Asiria, ko koya ka kauti keimami mai ki ke.

³ A sa kaya vei ira ko Serupapeli, kei Jesua, kei ira sa vo vei ira era liu vei ira na qase ni Isireli, Dou sa sega ni vakaitavi vata kei keimami e na tara vale vua na neimami Kalou; koi keimami ga ena tara vakataki keimami vei Jiova na Kalou ni Isireli, me vaka ka vakaroti keimami na tui ko Sairusi na tui Perisia.

⁴ Sa qai vakamalumalumutaki ira na tamata ni Juta ko ira na lewe ni vanua, ka vakararawataki ira ni ra tara vale,

⁵ ka volia na tamata vuku e na veileti, me ra tarova na ka era nakita, e na gauna kecega i Sairusi na tui Perisia, ka yacova na gauna i Taraiase na tui Perisia.

⁶ Ia ni sa lewa ko Easuerosi, ni sa qai vakatekivu na nona lewa, era sa vola e dua nai vola era beitaki ira kina na kai Juta kei ira na kai Jerusalemi.

⁷ Ia e na gauna i Atakisekise, eratou sa vola vei Atakisekise na tui Perisia, ko Pisalami, ko Miciritaci, ko Tapeli, kei ira na tamata tani sa nodratou i tokani; a sa volai nai vola e na vosa vaka-Siria, ka tukuni na kenai balebale e na vosa vaka-Siria.

⁸ Sa vola nai vola ko Riumi na turaga ni lewa, kei Simisei na vunivola, kivei Atakisekise na tui, me beitaki Jerusalemi, ka vaka,

⁹ Ko Riumi na turaga ni lewa, kei Simisei na vunivola, kei ira kece na nodraui tokani; ko ira na Tainaiti, kei ira na Efasacekaiti, kei ira na Tapilaiti, kei ira na Efasaiti, kei ira na Akevaiti, kei ira na kai Papiloni, kei ira na kai Susa, kei ira na Tiaiti, kei ira na kai Ilama,

¹⁰ kei ira na veimatanitu sa vo, ko ira ka kauta mai ko Osinapa, ko koya ka turaga ka rogo, ka lesia me ra tiko e na veikoro ni Samaria, kei ira na kena vo e na tai ni uciwai oqo, ia me vaka sa dauvolai.

¹¹ Oqo nai vola era sa vakauta vua, io vei Atakisekise na tui: O ira na nomuni tamata era tiko e na tai ni uciwai oqo, ia me vaka sa dauvolai.

¹² Mo ni kila na tui, ni ra sa lako mai ki Jerusalemi, ko ira na Jiu era lako maivei kemuni vei keimami, a ra sa tara tiko na koro dauvere ka ca, ka ra sa viria na kena bai, ka veiuturitaka na kena yavu.

¹³ Ia mo ni kila mada na tui, kevaka sa tara oti na koro oqo, ka viri oti na kena bai, era na sega ni soli vakacavacava, se soli kamunaga, se na ka sa daucaka vua na tui, ka na qai yali kina vei kemuni na tui eso na nomuni yau oqo.

¹⁴ Ia ni keimami sa vakani mai na vale ni tui, a sa sega ni kilikili kei keimami me raica ni kemuni sa beci na tui, o koya keimami sa talaki kina me vakatakila vei kemuni na tui;

¹⁵ me sa qarai e nai vola ni kedrai tukutuku na nomuni qase: ko ni na kunea kina e nai vola ni tukutuku, ka kila ni sa koro dautalaidredre na koro oqo, ka dauvakacacani ira na tui kei ira na veiqali, ka ni ra sa buki vere talega kina eliu: e na vuku ni ka oqo sa vakarusai kina na koro oqo.

¹⁶ Keitou sa vakatakila vei kemuni na tui, kevaka sa tara tale na koro oqo, ka viri oti na kena bai, ena qai sega kina na nomuni qali e na tai ni uciwai oqo.

¹⁷ Sa qai volavola ko koya na tui kivei Riumi na turaga na lewa, kei Simisei na vunivola, kei ira kece na nodraui tokani era sa tiko mai Samaria, kei ira kece era tiko mai tai kadua ni uciwai, ka vaka, Sa loloma; ia me vaka sa dauvolai.

¹⁸ Ai vola dou a vakauta vei keitou sa wili vakamacala vei au.

¹⁹ Ia ka'u a vakarota, ka sa ia oti na vakasaqaqara, a sa kune ni sa vere makawa vei ira na tui na koro oqo, a sa dauia kina na talaidredre kei na vere.

²⁰ Ka so talega na tui era turaga yaco mai Jerusalemi, era sa lewa kece e na yasana kadua ni uciwai; ka sa dausoli vei ira nai vakacavacava, na kamunaga, kei na ka e daucaka vua na tui.

²¹ Ia dou vakarota me cegu mada ko ira na tamata oqo, ka me kakua ni tara na koro oqo ka me'u solia mada nai vakaro.

²² Dou raici kemudou vinaka, mo dou kitaka na ka oqo: a cava me tubu kina na ka me ca kina ko ira na tui?

²³ Ia ni sa wili nai vola i Atakisekise na tui vei Riumi, kei Simisei na vunivola, kei ira na nodraui tokani, era sa qai lako vakusakusa ki Jerusalemi vei ira na Jiu, ka vakasaurarataki ira vakaukauwa me mudu na nodra cakacaka.

²⁴ Sa qai mudu na cakacaka ni vale ni Kalou mai Jerusalemi: ka sa mudu ka yacova nai karua ni yabaki ni lewa i Taraiase na tui Perisia.