Esera 3 - Vakavakadewa Makawa

Sa caka nai cabocabo-ni-soro, a sa ia na vakacaboi soro kei na so levu. Sa tauyavutaki na vale ni soro.

¹ Ia ni sa yaco nai kavitu ni vula, a ra sa tiko e na veikoro ko ira na Isireli, era sa soqoni vata ko ira na tamata ki Jerusalemi me vaka era le dua ga na tamata.

² Sa qai tu cake ko Jesua na luve i Josataki ka tagane, kei iratou na bete na tacina, kei Serupapeli na luve i Sialitieli ka tagane, kei iratou na tacina, ka cakava nai cabocabo-ni-soro ni Kalou i Isireli, me vakacabora kina nai soro kama, me vaka sa volai e na vunau i Mosese na tamata ni Kalou.

³ A ra sa cakava nai cabocabo-ni-soro e na kenai tutu; ni ra sa rere e na vuku ni lewe ni veivanua oqori: ka ra sa vakacabora kina nai soro kama vei Jiova, io nai soro kama e na mataka kei na yakavi.

⁴ Ka ra sa ia na so levu ni vale taba ni kau, me vaka sa volai, ka vakacabora na kenai soro kama, io, na kenai wiliwili, me vaka na kenai valavala, ka me vaka na kenai cakacaka ni veisiga;

⁵ ia emuri nai soro kama sa daucaka e na veivula vou talega, kei na so levu sa vakatabui me nei Jiova sa loku tu, kei na nodra yadua era via vakacabora e na yalovinaka vei Jiova.

⁶ Sa vakatekivu e nai matai ni siga ni kenai kavitu ni vula na nodra vakacabora nai soro kama vei Jiova. Ia sa bera ni tauyavutaki na vale i Jiova.

⁷ Era a solia talega nai lavo vei ira na matai ni vatu, kei ira na matai ni kau; kei na kakana, kei na medra, kei na waiwai, vei ira na kai Saitoni, kei ira na kai Taia, me ra kauta mai na vu ni sitari mai Lepanoni ki na wasawasa mai Jopa, me vaka na ka sa solia vei ira ko Sairusi na tui Perisia.

⁸ Ia e nai karua ni yabaki ni nodra lako mai ki na vale ni Kalou mai Jerusalemi, e nai karua ni vula, sa vakatekivu ko Serupapeli na luve i Sialitieli ka tagane, kei Jesua na luve i Josataki ka tagane, kei na wekadra sa vo ko ira na bete kei ira na Livai, kei ira kece era sa lesu mai ki Jerusalemi mai na veivakabobulataki; a ra sa lesi ira na Livai, sa ruasagavulu na nodra yabaki ka qase cake, me vakaraica na cakacaka ni vale i Jiova.

⁹ Era sa qai tu vata ko Jesua kei iratou na luvena tagane kei iratou na wekana, ko Katimieli kei iratou na luvena tagane, ko iratou na luve i Juta era tagane, me vakaroti ira na matai e na vale ni Kalou: ko iratou na luve i Enatati ka tagane, kei ira na luvedra tagane kei ira na tacidra, na Livai.

¹⁰ Ia ni ra sa tauyavutaka na vale i Jiova ko ira na matai, sa lesi ko ira na bete me ra tu e na nodra i sulu vakabete ka taura na davui, kei ira na Livai na luve i Esafa ka tagane ka taura na sibali, me ia na vakavinavinaka vei Jiova, me vaka ka vakarota ko Tevita na tui Isireli.

¹¹ A ra sa sere vata ka veisausau e na vakavinavinaka kei na vakamolimoli vei Jiova; ni sa yalovinaka ko koya, ni sa sega ni mudu na nona yalololoma vei ira na Isireli. A ra sa kailavaka e na domo levu ko ira kecega na tamata, ni ra vakavinavinaka vei Jiova, ka ni sa tauyavutaki na vale i Jiova.

¹² Ia ka lewe vuqa vei ira na bete, kei ira na Livai, kei ira sa liu vei ira na qase, era tamata qase, era a kunea na vale eliu, ni sa tauyavutaki e matadra na vale oqo, era tagi vakadomoilevu; ka lewe vuqa era kaila vakadomoilevu e na marau:

¹³ a ra sa sega ni kila rawa kina ko ira na tamata, na kena duidui na domo ni kaila e na marau, kei na domo ni nodra tagi na tamata: ni ra sa kailavaka e na domo levu ko ira na tamata, a sa rogo vakayawa na kena rorogo.