Esera 10 - Vakavakadewa Makawa

Sa veivutuni ko ira na Jiu, ka ra sa biuta na watidra era sa yalewa tani.

¹ Ia ni sa masu oti ko Esera, ka vakatusa ka tagi, ka cuva vakatoboicu e na mata ni vale ni Kalou, era sa qai soqoni vata vua nai soqosoqo levu maivei ira na Isireli, na tagane, kei na yalewa, kei na gone: ni ra sa tagi vakalevu ko ira na tamata.

² A sa vosa vei Esera ko Sekanaia na luve i Jieli ka tagane, e dua vei ira na tagane na luve i Ilama, ka kaya, Keimami sai valavala ca vua na neimami Kalou, ka bauti ira na yalewa era yalewa tani me wati i keimami maivei ira na lewe ni vanua: ia sa rawa me vinaka tale ko ira na Isireli mai na ka oqo.

³ Ia oqo me da ia na veiyalayalati kei na noda Kalou, me keimami biuti ira tani na wati i keimami kecega, kei ira era sa sucu vei ira, me vaka na vosa ni noqu turaga, kei na nodra vosa era sa sautaninini e na vuku ni vosa ni noda Kalou; ia me vakayacori me vaka na vunau.

⁴ Mo ia, ni sa nomu i tavi na ka oqo: keimami sa loma vata talega kei iko: mo yalo dei ga, ka kitaka.

⁵ Sa qai ia ko Esera, ka vakabubuluitaki ira na bete levu, kei ira na Livai, kei ira kecega na Isireli, me ra kitaka me vaka na vosa oqo. Ka ra sa bubului kina.

⁶ Sa qai tu cake ko Esera mai na mata ni vale ni Kalou, ka curu ki na tiki ni vale sa nei Joenani na luve i Ilaiasipi ka tagane: ia ni sa yaco kina, sa sega ni kana madrai, se gunu wai: ni sa tagicaka na nodra talaidredre era a vakabobulataki.

⁷ A ra sa kacivaka yani e Juta kei Jerusalemi vei ira kece era a vakabobulataki, me ra soqoni vata mai ki Jerusalemi;

⁸ ia ko koya sa na bese ni lako mai e na bogi tolu, me vaka na ka era a bosea na turaga kei ira na qase, me kovei na nonai yau kecega, ka me vakatatabui ko koya mai na nodra i soqosoqo era a kau vakabobula tani.

⁹ Era sa qai soqoni vata ki Jerusalemi ko ira kecega na Juta kei Penijamini ni sa bera ni oti na bogi tolu. Oqori nai kaciwa ni vula, e nai karuasagavulu ni siga ni vula; a sa tiko ko ira kecega na tamata e na salatu mai na vale ni Kalou, ka sautaninini e na vuku ni ka oqo, e na vuku talega ni uca levu.

¹⁰ A sa tu cake ko Esera na bete, ka sa kaya vei ira, Kemuni sa talaidredre, ni kemuni sa kauta na yalewa tani me watimuni, me vakalevutaka na nodra talaidredre na Isireli.

¹¹ Ia oqo mo ni vakatusa vei Jiova na Kalou ni nomuni qase, ka kitaka na ka e vinaka vua: ka tawasei kemuni tani maivei ira na lewe ni vanua, kei ira na watimuni era yalewa tani.

¹² Era sa qai vosa nai soqosoqo taucoko, ka kaya e na domo levu, E dodonu me keimami kitaka me vaka na ka ko sa kaya:

¹³ ia ko ira na tamata era sa lewe vuqa, a sa levu na uca e na veisiga oqo, ka sa dredre me keimami tiko e tautuba, a sa sega ni caka rawa na ka oqo e na bogi dua, se na bogi rua: ni keimami sa lewe vuqa sa talaidredre e na ka oqo:

¹⁴ me ra ia tiko ko ira na noda turaga ni soqosoqo taucoko, ia me ra dui lako mai e na siga sa loku, ko ira kecega e na noda veikoro era sa veiwatini kei ira na yalewa tani, kei ira na qase mai na veikoro, kei ira na mataveilewai, ka me takali tani mada vei keda na cudru waqawaqa ni noda Kalou e na vuku ni ka oqo.

¹⁵ Ia ko Jonacani ga na luve i Asaeli ka tagane kei Jeasaia na luve i Tikiva ka tagane erau sa kitaka na ka oqo: a sa vukei rau ko Mesulame kei Sapicei na Livai.

¹⁶ A ra sa kitaka vakakina ko ira na vakabobulataki. A ra sa lesi, ko Esera na bete, ka so vei ira na qase sa liu, me vaka na mataqali ni nodra qase, me vaka na yacadra yadua, a ra sa tiko sobu e nai matai ni siga e nai katini ni vula, me ra qaqa na ka oqo.

¹⁷ A ra sa tinia vei ira kecega na tamata era a veiwatini kei ira na yalewa tani, a sa yaco nai matai ni siga e na kenai matai ni vula.

¹⁸ A sa kune eso maivei ira na luvedra na bete era a veiwatini kei na yalewa tani: maivei iratou na luve i Jesua na luve i Josataki kei iratou na wekana: ko Meesea, kei Eliesa, kei Jaripi, kei Kitalaia.

¹⁹ A ra sa bubului me ra biuta tani na watidra, ia ni ra sa cala kina, era sa vakacabora e dua na sipi tagane mai na qele ni sipi, e na vuku ni nodra cala.

²⁰ Ia vei iratou na luve i Ima: ko Anani, kei Sepataia.

²¹ Vei iratou talega na luve i Erimi: ko Meesea, kei Ilaija, kei Semaia, kei Jieli, kei Usaia.

²² Vei iratou talega na luve i Pasuri: ko Elioenai, ko Meesea, ko Isimeli, ko Nicaneli, ko Josapati, kei Elasa.

²³ Vei iratou talega na Livai: ko Josapati, kei Semeai, kei Kelaya (ko ya ko Kilita), ko Pecaaia, ko Juta, kei Eliesa.

²⁴ Vei iratou talega na dausere: ko Ilaiasipi; vei iratou talega nai vakatawa ni katuba: ko Salumi, kei Telemi, kei Urai.

²⁵ Ia vei ira na Isireli: vei iratou na luve i Parosi: ko Rimaya, kei Jisaia, kei Malikaia, kei Maijamini, kei Eliesa, kei Malikaia, kei Pinaia.

²⁶ Vei iratou talega na luve i Ilama: ko Matanaia, ko Sakaraia, kei Jieli, kei Apiti, kei Jiremoci, kei Elaija.

²⁷ Vei iratou talega na luve i Satu: ko Elioenai, ko Ilaiasipi, ko Matanaia, kei Jiremoci, kei Sepati, kei Asisa.

²⁸ Vei iratou na luve i Pepai: ko Jioanani, ko Enanaia, ko Sapei, ko Acelai.

²⁹ Vei iratou na luve i Pani: ko Mesulame, ko Maluki, kei Ataia, ko Jasupi, kei Siali, kei Remoci.

³⁰ Vei iratou talega na luve i Peaci-moapi: ko Atina, ko Kilali, ko Pinaia, ko Meesea, ko Matanaia, ko Pisalieli, kei Pinui, kei Manasa.

³¹ Vei iratou na luve i Erimi: ko Eliesa, ko Isaia, ko Malikaia, ko Semaia, ko Simioni,

³² ko Penijamini, ko Maluki, ko Semaraia.

³³ Vei iratou na luve i Asumi: ko Matinai, ko Mataca, ko Sapati, ko Ilifeleti, ko Jiremei, ko Manasa, ko Semeai.

³⁴ Vei iratou na luve i Pani: ko Meatai, ko Amirami, kei Ueli,

³⁵ ko Pinaia, ko Petiya, ko Kiluai,

³⁶ ko Vaniya, ko Meremoce, ko Ilaiasipi,

³⁷ ko Matanaia, ko Matinai, kei Jeesau,

³⁸ kei Pani, kei Pinui, kei Semeai,

³⁹ kei Selemaia, kei Necani, kei Ataia,

⁴⁰ ko Makanatipei, ko Sasei, ko Sarei;

⁴¹ ko Esareli, kei Selemaia, ko Semaraia;

⁴² ko Salumi, ko Amaraia, ko Josefa.

⁴³ Vei iratou na luve i Nipo: ko Jieli, ko Matacaia, ko Sapati, ko Sipina, ko Jatai, kei Joeli, ko Pinaia.

⁴⁴ O ira kecega na tagane oqo era sa vakawati kei na yalewa era sa lewe ni matanitu tani: ka so vei ira sa vakaluveni vei ira na watidra.