Emosi 8 - Vakavakadewa Makawa

Sa tukuna na raivotu ni sova vuata dreu, kei na kenai balebale, 1-3. Sa vunauci ira e na vuku ni nodra yalokocokoco, 4-10. E dua na dausiga ca sa voleka ni yacovi ira, io na dausiga ni vosa ni Kalou, 11-14.

¹ Sa vakaoqo na ka e vakaraitaka vei au na Turaga ko Jiova: ka raica, sa dua na sova vuata dreu.

² A sa tarogi au ko koya, A cava ko sa raica, Emosi? Au a kaya, E dua na sova vuata dreu. Sa qai kaya vei au ko Jiova, Sa yaco mai nai vakataotioti vei ira na noqu tamata na Isireli; au na sega sara ni vosoti ira tale.

³ Ia ena vuki me qoqolou na sere e na vale vakaturaga e na siga ko ya, sa kaya na Turaga ko Jiova: sa na ka levu mai na moku e na veiyasana kecega! era na dui biuta ki tuba ni ra tiko lo ga!

⁴ Dou rogoca na ka oqo, oi kemudou sa tilomi koya sa dravudravua, ka mo dou vakaoti ira sara era yalomalumalumu e na vanua,

⁵ ka sa kaya, Ena oti ninaica na vula vou, me da volitaka na sila? kei na siga tabu, me da dolava na lololo ni witi? ka vakalailaitaka na efa, ka vakalevutaka na sikeli, ka vakatanitaka nai vakarau ni bibi me daulasu?

⁶ me da voli ira na dravudravua e na siliva, kei na luveniyali e nai vava e rua; ia na qa ni witi, me da volitaka.

⁷ Sa bubului ko Jiova, a sa cavuti koya na lagilagi i Jekope, Au na sega sara ni guilecava e dua na nodra cakacaka ka sega ni mudu.

⁸ Me na sega li ni tavuki na vanua e na vuku ni ka oqo, ka ra dui tagi kece era tiko kina? io, me na sega ni tubu cake sara li me vaka na Uciwai, ka veitubuyaki, ka malumu sobu tale, me vaka na Uciwai ni Ijipita?

⁹ Ia sa kaya na Turaga ko Jiova e na siga ko ya, au na vakadromuca na mata-ni-siga ni sa tu donu mai, ka vakabutobutotaka na vanua ni sa siga levu tutu:

¹⁰ au na vukica talega na nomudou so levu me soqoni ni tagi, kei na nomudou sere kecega ena vuki me lele; ia ka'u na lewa mo dou sulumaka nai sulu taga, ka na cou mai na ulumudou kecega ia ka'u na cakava na ka oqori me tautauvata kei na so mate sa ia e na vuku ni gone tagane sa dua bauga, kei na kenai otioti me tautauvata kei na dua na siga rarawa sara.

¹¹ Raica, sa kaya na Turaga ko Jiova, ena yaco na gauna, ka'u na vakayacora kina na dausiga ki na vanua, ena sega ni dausiga ni viakana, se na viagunu wai, ia ni ra mate ga e na via rogoca na vosa i Jiova:

¹² ka ra na veiseyaki mai na wasawasa e dua ki na wasawasa tani, ia mai na yasayasa vakatokalau ki na yasayasa ki na tu-i-cake, era na veiciciyaki me ra vakasaqara na vosa i Jiova, a ra na sega ni kunea.

¹³ E na siga ko ya era na matabuto mai na goneyalewa matavinaka kei ira na cauravou, e na viagunu;

¹⁴ ko ira era sa bubului, ka cavuta na ka era cala kina na kai Samaria, ka kaya, Sa bula na nomu kalou, ko iko Tani; ia, Sa bula nai valavala vaka-Pieri-sepa; era na bale talega, ka sega ni tu cake tale.