Emosi 7 - Vakavakadewa Makawa

Sa vakaraitaki vei Emosi na nodra cudruvi na Isireli, ka sa tukuna vei ira na raivotu ni vodre, 1-3, kei na bukawaqa, 4-6, kei na vatu i vakarau, 7-9. Sa tarovi koya ko Amasaia, ka sa cudruvi kina, 10-17.

¹ Sa vakaoqo na ka e vakaraitaka vei au na Turaga ko Jiova; ka raica, sa bulia na vodre ni sa qai tekivu me tubu na co emuri; ka raica, sa kena co emuri oqo ni sa tamusuki oti na nona co na tui.

² Ia ni ra sa kania oti na co ni vanua, au a qai kaya, Kemuni na Turaga Jiova, au masuti kemuni mo ni loloma mada mai, ena tu rawa vakaevei ko Jekope? ni sa lailai ko koya.

³ Sa veivutunitaka na ka oqo ko Jiova: Ena sega ga ni yaco, sa kaya ko Jiova.

⁴ Sa vakaoqo na ka e vakaraitaka vei au na Turaga ko Jiova: ka raica sa kaci na Turaga ko Jiova, me ra mai ia na veilewai kaya e na bukawaqa, a sa kama kina na wasa levu, ka sa kania e dua na tiki ni vanua.

⁵ Au a qai kaya, Kemuni na Turaga Jiova, mo ni kakua mada: ena tu rawa vakaevei ko Jekope? ni sa lailai ko koya.

⁶ Sa veivutunitaka na ka oqo ko Jiova: A ka talega oqo ena sega ni yaco, sa kaya na Turaga ko Jiova.

⁷ Sa vakaoqo na ka e vakaraitaka vei au ko koya: ka raica, sa wavu tu na Turaga e na dela ni bai e tu vakadodonu, ka sa dua na vatu i vakarau e na ligana.

⁸ A sa kaya vei au ko Jiova, A cava ko sa raica, Emosi? Au a kaya, E dua na vatu i vakarau. Sa qai kaya na Turaga, Raica, au na viritu e dua na vatu i vakarau e na kedra maliwa na noqu tamata na Isireli: au na sega sara ni vosoti ira tale:

⁹ ia ena vakalalataki na veiyasana cecere nei Aisake, a veitikina tabu talega nei Isireli ena vakacacani; ia ka'u na tu cake me'u vala kei na mataqali i Jeropoami e nai seleiwau.

¹⁰ Sa qai talaki ko Amasaia na bete mai Peceli vei Jeropoami na tui Isireli, ka kaya, Sa bukia na kemu vere ko Emosi e na kedra maliwa na mataqali i Isireli: sa sega ni vosota rawa na vanua na nona vosa kecega.

¹¹ Ni sa kaya vakaoqo ko Emosi, Ena mate e nai seleiwau ko Jeropoami, ia ko ira na Isireli era na kau tani sara vakabobula mai na nodra vanua.

¹² A sa kaya talega ko Amasaia vei Emosi, Ko iko na rairai, mo la'ki dro ki na vanua ko Juta, ka kana madrai maikea, mo ia talega kina na parofisai:

¹³ ia mo kakua ni parofisai tale e Peceli: ni sa nona koro tabu na tui, kei na vale vakaturaga ni nona matanitu.

¹⁴ Sa qai kaya vei Amasaia ko Emosi, Sa sega ni parofita koi au, au sa sega talega ni luve ni parofita; ai vakatawa ni sipi ga koi au, kei na dausamaki lolo:

¹⁵ ka sa kauti au ko Jiova ni'u sa muria na qele ni sipi, ka sa kaya vei au ko Jiova, Mo la'ki parofisai vei ira na noqu tamata na Isireli.

¹⁶ Ia oqo, mo rogoca na vosa i Jiova: Ko sa kaya, Kakua ni ko parofisaitaka na ca vei ira na Isireli, kakua talega ni ko parofisaitaka na ca vei ira na mataqali i Aisake.

¹⁷ O koya oqo sa kaya kina ko Jiova; A watimu ena ia na dautagane e na koro, a luvemu tagane talega kei na luvemu yalewa era na bale e nai seleiwau, a nomu vanua talega, ena votai ni sa vakarauti e na dali; ia ko iko ko na mate e na vanua tawa savasava: ko ira talega na Isireli, era na kau tani sara vakabobula mai na nodra vanua.