Emosi 6 - Vakavakadewa Makawa

Sa vunauci ruarua na kai Jerusalemi kei na kai Samaria, 1,2. Sa vakatakila na nodra tiko vakacegu wale kei na nodra i valavala vakasausa, 3-6. Sa qai tukuna tale na nodra cudruvi, kei na nodra sega ni vuku rawa, 7-14.

¹ E ca vei ira sa tiko vakacegu wale mai Saioni, ka vakararavi ki na ulu-ni-vanua ni Samaria, era tamata kilai e na matanitu sa liu, ka sa daulakovi ira ko ira na mataqali i Isireli!

² Dou lako yani ki Kaline, mo dou raica; ka mani lako maikina ki Emaci levu: dou qai lako sobu ki Kaca na nodra koro na kai Filisitia: sa vinaka cake li na matanitu oqori ka sa ca na matanitu oqo? se levu cake li na nodra vanua ka lailai na nomudou vanua?

³ E ca vei ira sa vakayawayawataka na siga ca, ka kauta voleka mai nai tikotiko ni valavala vakaukauwa;

⁴ era koto e nai mocemoce tabua, ka dodo tu e na nodra i davodavo, era kania na lami e kau mai na qele ni sipi, kei na luve ni pulumokau mai na loma ni bai;

⁵ era laga sere ki na domo ni api, me vakataki Tevita, era vakananuma me so na nodra ka domo vinaka;

⁶ era gunu waini mai na bilo lelevu, ka lumuti ira e nai lumu talei: ka sa sega ni rarawa na lomadra e na vuku ni sa ca ko ira na Josefa.

⁷ O koya oqo era na kedrai liuliu kina na bobula era vakabobulataki, ena qai oti yani na nodra marau era daudodo tu.

⁸ Sa bubului na Turaga ko Jiova, ni sa cavuti koya, sa kaya ko Jiova na Kalou ni lewe vuqa, Au sa vakasisilataka na nodra totoka na Jekope, ia ka'u sa cata na nodra veivale vakaturaga: ia ka'u na solia tani na koro kei na ka kecega sa tu kina.

⁹ Ia ke sa vo e lewe tini na tamata e na dua na vale, era na mate ga.

¹⁰ Ia na tamana lailai na mate, io, ko koya sa ia na kena veivakamai, ena laveti koya cake, me kauta tani na suina mai na vale; ena taro talega vua sa tiko mai loqi, Sa vo li e dua drau lewe rua kaya? ena kaya mai, E segai, Ena qai kaya ko koya, Mo tiko lo: ni sa sega ni yaga me daru cavuta na yaca i Jiova.

¹¹ Ia raica, sa vakarota ko Jiova, ka na basuka talega na vale levu ko koya, kei na vale lailai ena vakacicilataka.

¹² Ena cici rawa li na ose e na dela ni vatu? ena dua li me cukicuki kina e nai siviyara kei na pulumokau? ka ni dou sa vakatanitaka na lewa dodonu me wai gaga, kei na vua ni valavala dodonu me kau gaga:

¹³ oi kemudou sa marautaka na ka sa sega wale, ka kaya, Ni da sa kaukauwa eda sa sega li ni rawata kina na lewa me noda?

¹⁴ Ia koi au, raica, ka'u na vakatura cake e dua na matanitu, me vala kei kemudou, na mataqali i Isireli, sa kaya ko Jiova, na Kalou ni lewe vuqa; ka ra na vakararawataki kemudou mai nai yalayala kei Emaci ka yaco ki na uciwai mai na veikau.