Emosi 5 - Vakavakadewa Makawa

Sa lelevaki ira na Isireli ko Emosi, 1-3. Sa vakaroti ira me ra veivutuni, 4-17. Sa tukuna na siga i Jiova ni ka rerevaki, 18-20. Ena cata ga na Kalou na cakacaka vakailasu vua, 21-27.

¹ Dou rogoca na vosa oqo ka'u sa lagata, io, na kemudou lele, na mataqali i Isireli.

² Sa bale na goneyalewa ko Isireli, ena sega ni tu cake tale: sa biu laivi tu e nona vanua, sa sega e dua me vakaduri koya cake.

³ Ni sa kaya vakaoqo na Turaga ko Jiova; A koro ka daulako maikina e le dua na udolu, ena vo ga kina e le dua na drau, kei na koro e daulako maikina e le dua na drau ena vo ga kina e le tini, ki na mataqali i Isireli.

⁴ Ni sa kaya vakaoqo ko Jiova ki na mataqali i Isireli, Dou golevi au, mo dou bula kina:

⁵ ia kakua ni dou golevi Peceli, kakua talega ni curu ki Kilikali, kakua talega ni lako ki Pieri-sepa: ko Kilikali ena kau tani vakabobula; kei Peceli, ena yaco me ka wale sara.

⁶ Dou golevi Jiova, mo dou bula; de kida ko koya me vaka na bukawaqa ki na mataqali i Josefa, ka sa kama voli, ka sega e dua mai Peceli me bokoca.

⁷ Oi kemudou sa vakatanitaka na lewa dodonu me ka gaga, ia nai valavala dodonu dou sa biuta no ga ki na qele,

⁸ dou golevi koya ka buli Akituro kei Oraioni, ka sa vukica na butobuto loaloa me mataka, ia na siga sa vukica ko koya me bogi butobuto: ka sa kaciva na wai ni wasawasa, ka sovaraka sobu ki na dela i vuravura: ko Jiova na yacana:

⁹ o koya sa vagumatuataki koya e vakacacani me vorata na qaqa, me qai la'ki kaba na koro kaukauwa ko koya sa vakacacani.

¹⁰ Era cati koya sa ia na veivunauci e na matamata-ni-koro, ka vakasisilataki koya sa vosa dodonu.

¹¹ Ia ni dou sa buturaki koya sa dravudravua ka kovea mai vua nai kaukau sila: dou a tara na veivale e na veivatu e ta, ia dou na sega ni tiko kina; dou a tea na veiwere-ni-vaini domoni, ia dou na sega ni gunuva na kena waini.

¹² Ni'u sa kila na nomudou dautalaidredre, kei na nomudou i valavala ca e kaukauwa: ia era sa vakararawataka na yalododonu, ka tara na tautauri, ka sa vakatala tani na dravudravua mai na matamata-ni-koro.

¹³ Ia ko koya sa yalomatua e na gauna ko ya ena tiko lo ga, ni sa gauna ca.

¹⁴ Dou vakasaqara na ka vinaka, ka segai na ka ca, mo dou bula: ena qai tiko vata kei kemudou ko Jiova, na Kalou ni lewe vuqa, me vaka dou a kaya.

¹⁵ Dou cata na ka ca, ka vinakata na ka vinaka, ka vakadeitaka na lewa dodonu e na matamata-ni-koro: ena qai yalololoma beka ko Jiova na Kalou ni lewe vuqa vei ira na kena vo vei Josefa.

¹⁶ O koya oqo sa kaya kina ko Jiova, na Kalou ni lewe vuqa, na Turaga; E na saqata ni koro kecega ena ia na tagi; e na salatu kece talega era na kaya ulei! ulei! ka ra na kaciva nai vakatau-ni-were me tagi, kei ira sa dau ni tagi me ra mai tagi yaso.

¹⁷ E na veiwere-ni-vaini kece ena ia na tagi: ni'u na lako voli yani e na kemudou maliwa.

¹⁸ E ca vei kemudou sa gadreva me yaco na siga i Jiova! e vaka tale evei na kena yaga vei kemudou? a siga i Jiova sa butobuto, ka sega ni rarama.

¹⁹ Sa vaka na tamata sa drotaka na laioni, ka sa tavaki koya e dua na pera; se curu ki vale, ka ravita na lalaga e na ligana, ka sa kati koya na gata.

²⁰ Ena sega li ni butobuto na siga i Jiova, ka sega ni rarama? io, me butobuto sara ga, ka sega na rarama e tu kina?

²¹ Au sa cata, au sa vakasisilataka na nomudou so levu, au na sega talega ni vinakata na nomudou i soqosoqo tabu.

²² Ni dou vakacabora vei au nai soro kama kei na nomudou i madrali laukana, au na sega ni vakadonuya: ia nai soro ni veivinakati, na nomudou manumanu uro, au na sega ni goleva.

²³ Kauta tani vei au na domo ni nomudou meke; ia ka'u sa bese ni rogoca na domo ni nomudou api.

²⁴ Ia me dave yani me vaka na wai na lewa dodonu, kei nai valavala dodonu me vaka na uciwai sa vuabale.

²⁵ Dou a vakacabora li vei au nai soro kei nai madrali e na veikau ka yabaki vasagavulu, oi kemudou na mataqali i Isireli?

²⁶ Ia dou a colata ga na vale ni nomudou Moloke kei Kaiuni na nomudou matakau, na kalokalo ni nomudou kalou, ko ya dou a cakava me nomudou.

²⁷ O koya oqo ka'u na vakauti kemudou tani kina vakabobula me sivi ko Tamasiko, sa kaya ko Jiova, sa Kalou ni lewe vuqa na yacana.