Emosi 4 - Vakavakadewa Makawa

Era sa vunauci na Isireli e na vuku ni nodra i valavala kaukauwa, 1-3, kei na nodra dauqarava na kalou lasu, 4,5, kei na nodra bese ni vakavulici, 6-13.

¹ Dou rogoca na vosa oqo, oi kemudou na pulumokau yalewa ni Pasani, sa tiko e na ulu-ni-vanua ni Samaria, oi kemudou sa dauvakasaurarataki ira na dravudravua, ka butuqaqi ira na luveniyali, ka kaya vei ira na nodra turaga, Kauta mai, me da mai gunu.

² Sa bubului na Turaga ko Jiova, ka sa cavuta na nona yalododonu, Raica, ena yaco na gauna ena kauti kemudou tani kina ko koya, e na siwa, kei na nomudou kawa, ni sa siwati ira.

³ Ia dou na dui curu yani e na kabasu ni bai, e na tikina dou sa dui donuya, mo dou dui la'ki biu ki na koro kaukauwa, sa kaya ko Jiova.

⁴ Dou lako mai ki Peceli, mo dou ia na talaidredre; ia ki Kilikali talega, dou vakalevutaka na nomudou talaidredre, io, dou kauta mai e na veimataka na nomudou i soro, ia e nai katolu ni veisiga dou kauta talega mai nai katini ni nomudou ka kece:

⁵ dou vakacabora talega nai madrali ni vakavinavinaka sa vakalevenitaki, ia dou kacivaka ka tukuna nai madrali sa vakacabori wale: ni dou sa vinakata me vakaoqo, na Isireli, sa kaya na Turaga ko Jiova.

⁶ Ia koi au talega, ka'u a solia me savasava na batimudou, e na nomudou veikoro kecega, io, mo dou viakana mai e na nomudou veiyasana kecega: ia dou a sega ga ni lesu vei au, sa kaya ko Jiova.

⁷ Ia koi au talega, ka'u a bureitaka vei kemudou na uca, ni sa vo e tolu na vula ka me qai cava na yabaki: ia ka'u a vakatauca na uca ki na dua na koro, ka sega ni vakatauca ki na dua tale na koro: e dua na tikina sa tau kina na uca, ia na tikina e sega ni tau kina sa malai:

⁸ a sa se ki na dua ga na koro e rua se tolu na koro, me ra gunu wai; a ra sa sega ni mamau kina: ia dou a sega ga ni lesu vei au, sa kaya ko Jiova.

⁹ Au a cudruvi kemudou e na cagi todra kei na bokata: ni sa levu mai na nomudou veiwere, kei na nomudou veiwere-ni-vaini, kei na nomudou veilolo, kei na nomudou veiolive, sa kania ga na vodre dauquru: ia dou a sega ni lesu vei au, sa kaya ko Jiova.

¹⁰ Au a tala vei kemudou na mate dauveiveitauvi vaka-Ijipita; au a vakamatei ira na nomudou cauravou e nai seleiwau, ko ira vata kei na nomudou ose ka vakabobulataki; io, ka'u a vakuvuya cake na boi ca ni nomudou i tikotiko vakaivalu ki na ucumudou: ia dou a sega ga ni lesu vei au, sa kaya ko Jiova.

¹¹ Au a vukica eso vei kemudou, me vaka ka vukici Sotoma kei Komora na Kalou, ia dou a vaka na tiki ni buka sa kaliraki mai na bukawaqa: ia dou a sega ga ni lesu vei au, sa kaya ko Jiova.

¹² O koya ka'u na kitaka kina vakaoqo vei iko, na Isireli, ia ni'u na kitaka na ka oqo vei iko na Isireli, mo vakarau mo veitavaki kei na nomu Kalou ko iko na Isireli.

¹³ Mo kila ni sai koya ka bulia na veiulu-ni-vanua, ka vakatubura na cagi, ka sa tukuna vua na tamata na ka e vakananuma kina, o koya sa cakava na mataka me butobuto, ka sa butuka na veiyasana cecere kei vuravura, na yacana ko Jiova, na Kalou ni lewe vuqa.