Emosi 3 - Vakavakadewa Makawa

Sa dodonu me ra cudruvi, ni ra sega ni muri koya na Kalou, 1-8. Sa qai tukuni ruarua na nodra cudruvi kei na vuna, 9-15.

¹ Dou rogoca na vosa oqo sa vosataka ko Jiova ka baleti kemudou, na Isireli, ka baleta na mataqali kecega ka'u a kauta cake mai na vanua ko Ijipita, ka vaka,

² Sai kemudou duaduaga ka'u a kila vei ira na veimataqali kece e vuravura: o koya oqo ka'u na cudruvi kemudou kina e na vuku ni nomudou caka cala kecega.

³ Me rau lako vata li e lewe rua, kevaka erau sa sega ni yalovata?

⁴ Me na tagi li na laioni mai veikau, ni sa sega na kena e kunea? me na tabalaka li na domona na luve ni laioni mai na nonai kotokoto, kevaka sa sega ni rawata e dua na kena?

⁵ Me na tudaitaki li na manumanu vuka e na dai e na qele, ni sa sega na kena dai? me na riba li na dai mai na qele, ni sa sega sara na ka e tudaitaki?

⁶ Me na uvuci li na davui e loma ni koro, ka sega ni rere kina na tamata? me dua li na ca e na koro, me na sega ni vakayacora ko Jiova?

⁷ E dina, ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.

⁸ Sa tagi na laioni, ko cei me na sega ni rere? sa vosa na Turaga ko Jiova, o cei me na sega ni parofisai?

⁹ Dou vakarogoya e na veivale vakaturaga mai Asitoti, kei na veivale vakaturaga e na vanua ko Ijipita, ka kaya, Dou vakasoqoni kemudou ki na veiulu-ni-vanua mai Samaria, ka raica na masa levu maikina, kei ira era sa vakasaurarataki maikina.

¹⁰ Ni ra sega ni kila me ra caka dodonu, sa kaya ko Jiova, era binia na ka e kovei ka butakoci e na nodra veivale vakaturaga.

¹¹ O koya oqo sa kaya kina na Turaga ko Jiova; Sa na dua mai na meca, io, sa na vakavolivolita na vanua; ka na kauta tani maivei iko na nomu kaukauwa, ena vakayanaki talega na nomu veivale vakaturaga.

¹² Sa kaya vakaoqo ko Jiova; Me vaka nai vakatawa sa kaliraka mai na gusu ni laioni e rua na yava ni sipi, se na tiki ni daligana; ena kaliraki vakakina na Isireli era tiko mai Samaria e na tutu ni mocemoce, kei ira mai Tamasiko e nai davodavo.

¹³ Dou rogoca, ka vakadinadina ki na mataqali i Jekope, sa kaya na Turaga ko Jiova, na Kalou ni lewe vuqa,

¹⁴ E na siga ka'u na cudruvi ira kina na Isireli, e na vuku ni nodra talaidredre, ka'u na qai cudruva na veicabocabo-ni-soro mai Peceli: io, na tutuna balavu cake ni cabocabo-ni-soro ena qai tamusuki, ka na lutu ki na qele.

¹⁵ Au na vakacataka na vale ni vula i liliwa, kei na vale ni vula i katakata; ena rusa talega na veivale tabua, ka na vakaoti laivi na veivale lelevu, sa kaya ko Jiova.