Efeso 6 - Vakavakadewa Makawa

Me dautalairawarawa ko ira na gone kei ira na tamata vei ira na nodra qase, me ra yalovinaka talega na qase vei ira, 19. Me da taura kecega nai yaragi ni Kalou, 1020. Sa tukuni Tikiko vei ira ko koya, a sa tinia na nonai vola, 2124.

¹ Oi kemudou na gone, dou talairawarawa vei ira na nomudou qase e na ka sa vinaka vua na Turaga: ni sa dodonu oqo.

² Mo vakarokoroko vei rau na tamamu kei na tinamu; (oqo na vunau taumada sa dua kina na vosa ni yalayala);

³ mo vinaka kina, mo bula vakadede talega e vuravura.

⁴ Oi kemudou talega na qase, dou kakua ni vakacudrui ira na nomudou gone: ia dou vakavulici ira e na vunau kei nai vakavuvuli ni Turaga.

⁵ Oi kemudou na tamata, dou talairawarawa vei ira na nomudou turaga vakayago, e na rere kei na sautaninini, ni sa dina na yalomudou, me vaka vei Karisito;

⁶ mo dou kakua ni makutu e matadra ga na turaga, mo dou vinakati kina vakatamata; ia me vaka dou sa tamata nei Karisito, mo dou cakava na loma ni Kalou mai na vu ni yalomudou;

⁷ ni sa vinakata tiko na lomamudou, ka me vaka vei koya na Turaga, ka segai vei ira na tamata, dou sa makutu kina;

⁸ ni dou sa kila na ka vinaka kecega ena cakava na tamata yadua, se bobula sei taukei, ena saumi vakakina mai vua na Turaga.

⁹ Oi kemudou talega, na turaga, dou kitaka vakakina vei ira, ka kakua ni vosa vakacudrucudruya: ni dou sa kila sa tiko mai lomalagi na nomudou Turaga, o koya sa nodra talega; a sa sega ni vinakata e dua vakailoa ko koya.

¹⁰ Meu tinia, oi kemudou na wekaqu, mo dou kaukauwa tiko e na Turaga, kei na kena levu ni nona kaukauwa.

¹¹ Dou vakaiyaragi e nai yaragi kecega ni Kalou mo dou tu dei rawa ka vorata nai lawaki ni tevoro.

¹² Ni da sa sega ni veivala walega kei ira na tamata, eda veivala talega kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca e na veiyasana vakalomalagi.

¹³ O koya mo dou vakaiyaragi e nai yaragi kecega ni Kalou, mo dou vorata rawa kina e na siga ca, ia ni dou sa kitaka kece mo dou tu dei.

¹⁴ O koya mo dou qai tu dei ni sa vauci tu na tolomudou e na lomadina, ka sa tu e na lomaseremudou nai sasabai ni valavala dodonu;

¹⁵ ka sa vakaivava na yavamudou e na cakacaka ni tukutuku-vinaka ni veivinakati;

¹⁶ ia me kenai kuri, mo dou kauta na vakabauta mei sasabai dou na bokoca rawa kina na gasau vidi kecega ni tevoro,

¹⁷ ka kauta na bula mei vakaruru ni ulu, kei nai seleiwau ni Yalo Tabu, oqori na vosa ni Kalou:

¹⁸ dou masu tikoga e na masumasu kecega kei na daukerekere e na Yalo Tabu, ka yadrava tiko kina e na gumatua kece kei na daukerekere e na vukudra kecega na tamata lotu;

¹⁹ e na vukuqu talega me soli vei au meu vosa rawa, ka vakadoudou niu tukuna na ka vuni ni tukutuku-vinaka,

²⁰ o koya, kau sa talai meu vunautaka, oi au sa vesu tu; meu vosataka vakadoudou, me vaka sa kilikili kei au meu vosa.

²¹ Ia mo dou kila talega na noqu tiko, kei na noqu i valavala, ena tukuna na ka kecega vei kemudou ko Tikiko, na wekaqu daulomani kei nai talatala yalodina ni Turaga;

²² o koya kau sa tala vei kemudou e na vuku ni ka oqo, mo dou kila kina na neitou tiko, me vakaceguya talega na yalomudou ko koya.

²³ Me nodra na veiwekani na vakacegu, kei na loloma, kei na vakabauta, mai vua na Kalou ko Tamada kei na Turaga ko Jisu Karisito.

²⁴ Me tu na loloma vei ira kecega era sa lomana na noda Turaga ko Jisu Karisito e na lomadina. Emeni.