Efeso 5 - Vakavakadewa Makawa

Sa vakarota vei ira ko koya me ra dauloloma, 1,2; me ra biuta kece sara na nodra i valavala makawa, me tu ga vei ira na vua ni Yalo Tabu, 314. Me ra yalomatua ka sinai e na Yalo Tabu, 1521. Me ra veilomani dina na veiwatini, 2233.

¹ O koya oqo mo dou qai vakadamurimuria na Kalou, me vakataki ira na gone ni toko;

² ka dou ia tikoga nai valavala ni loloma, me vaka sa loloma talega na Karisito vei kemudou, a sa soli koya e na vukuda mei madrali kai soro vua na Kalou me ka boi vinaka.

³ Ia na dauyalewa, kei na ka kecega sa velavela, kei na daukocokoco, me kakua ni cavuti e na kemudou maliwa, me vaka sa kilikili kei ira era sa lotu;

⁴ me kakua talega na ka vakasisila, se na veivosaki lialia, se na veiwali, a ka oqori sa sega ni kilikili: me ia ga na vakavinavinaka.

⁵ Ni dou sa kila na ka oqo, ena sega sara na nonai votavota e na matanitu nei Karisito kei na Kalou, e dua na daudara, se dua sa velavela, se dua na daukocokoco, ni sa dauqarava na kalou lasu ko koya oqo.

⁶ Me kakua ni vakacalai kemudou e dua e na vosa walega: ni sa veika oqo sa yaco kina na cudru ni Kalou kivei ira sa dautalaidredre.

⁷ O koya mo dou qai kakua ni malele vata kei ira.

⁸ Ni dou a butobuto eliu, ia dou sa qai rarama e na Turaga; mo dou ia tiko nai valavala ni gone ni rarama:

⁹ (ni sa vua ni rarama nai valavala vinaka kecega kei nai valavala dodonu kei na ka dina:)

¹⁰ ni dou vakatovolea na ka sa vinaka vua na Turaga.

¹¹ Ia dou kakua ni malele vata kei ira sa dauia nai valavala butobuto sa sega ni yaga, ka dou vunauca ga.

¹² Ni sa ka e veivakamaduataki me vosataki na veika era sa daukitaka vuni.

¹³ Ia na ka kecega oqori ni sa vunauci sa vakavotui e na rarama; ni sa rarama na ka kecega sa vakavotui.

¹⁴ O koya oqo sa kaya kina ko koya, O iko sa moce mo yadra mai, ka tu cake mai na mate, ena qai vakararamataki iko na Karisito.

¹⁵ O koya mo dou qai raici kemudou vinaka, mo dou i valavala vakayalomatua, mo dou kakua ni vakataki ira na lialia, mo dou vakataki ira ga na vuku,

¹⁶ mo dou volia me nomudou na gauna, ni sa ca na veisiga oqo.

¹⁷ O koya mo dou qai kakua ni sesewa, mo dou kila ga na loma ni Turaga.

¹⁸ Ia dou kakua ni mateni e na waini, ni sa ia kina na ka vakasisila; dou vakasinaiti ga e na Yalo Tabu;

¹⁹ ka dou veivosaki vakai kemudou e na same kei na sere kei na meke vakayalo, ka dou seretaka na sere e laga vinaka e na yalomudou vua na Turaga:

²⁰ ka dou vakavinavinaka tiko e na vuku ni ka kecega vua na Kalou kei na Tamada e na yaca ni noda Turaga ko Jisu Karisito;

²¹ ka dou dui veivakamalumalumutaki kemudou vakai kemudou e na rere vei Karisito.

²² Oi kemudou na yalewa vakawati, mo dou dui vakamalumalumutaki kemudou vua na watimudou, me vaka vei koya na Turaga.

²³ Ni sa ulu ni watina na tagane, me vaka sa ulu ni soqosoqo lewe ni lotu na Karisito, ia nai Vakabula talega ni yago ko koya.

²⁴ Ia me vaka sa malumalumu nai soqosoqo lewe ni lotu vei Karisito, me ra vaka talega kina na yalewa vei ira na watidra e na ka kecega.

²⁵ Oi kemudou na tagane vakawati, lomani ira na watimudou, me vaka sa lomana nai soqosoqo lewe ni lotu na Karisito, a sa soli koya e na vukuna;

²⁶ me vakasavasavataka ka derea ni sa vuya e na wai kei na vosa,

²⁷ me vakarairaitaka kina vei koya mei soqosoqo lewe ni lotu e serau sara, me kakua ni tauvi-duka, se sasalukiluki, se dua na ka e vakakina; me savasava ka sega na tikina e ca.

²⁸ E kilikili kei ira na tagane me ra lomani ira vakakina na watidra, me vaka na yagodra dina. O koya sa lomana na watina sa lomani koya vakai koya.

²⁹ Ni sa sega e dua sa cata na yagona dina; ia sa vakania ka maroroya, me vaka sa ia talega ko Karisito ki nai soqosoqo lewe ni lotu:

³⁰ ni da sa tiki ni yagona.

³¹ Na ka oqo ena biuta kina na tagane na tamana kei na tinana, a rau na dua vata kei na watina, a rau na lewe dua bauga.

³² Sa ka levu na ka vuni oqo: ia kau sa vosataki Karisito kei nai soqosoqo lewe ni lotu.

³³ Ia mo dou dui lomana yadua na watina me vakataki koya; ia na yalewa, me vakarokorokotaka na watina.