Efeso 2 - Vakavakadewa Makawa

Sa tukuna ko koya na nodra i valavala eliu, kei na ka vinaka era sa qai rawata e na vuku ni loloma walega ni Kalou, 110. Sa vakarota vei ira me ra kakua ni muria na nodra i valavala era sa sega ni lotu, 1122.

¹ A sa vakabulai kemudou, oi kemudou ka mate tu e na caka cala kei nai valavala ca;

² dou a muria tiko eliu me vaka nai valavala kei vuravura oqo, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre;

³ ko ira eda sai valavala vata kaya koi keda kece e na gauna eliu, e na gagadre ca ni yagoda, ni da sa muria tiko na dodomo ni yagoda kei na yaloda; ia na nodai tovo me da cudruvi kina, me vakataki ira na tani:

⁴ ia, na Kalou, sa vutu ni loloma, e na vuku ni nona loloma levu sa lomani keda kina,

⁵ io ni da a mate tu e na caka cala, sa vakabulai keda vata kei Karisito, (a loloma walega dou sa vakabulai tu kina;)

⁶ a sa vakaturi keda cake vata, ka vakatikori keda vata kei Karisito Jisu e na veiyasana vakalomalagi:

⁷ me vakatakila kina e na gauna ena muri mai na nona loloma levu sa uasivi sara ni sa lomavinaka vei keda e na vuku i Karisito Jisu:

⁸ ni sa loloma walega dou sa vakabulai kina e na vuku ni vakabauta; ia sa sega ni vuna koi kemudou; ai solisoli ga ni Kalou:

⁹ sa segai e na vuku ni cakacaka, me kakua kina e dua me dokai koya:

¹⁰ ni da sa nona cakacaka, sa caka me da tu vata kei Karisito Jisu me ia nai valavala vinaka, o koya sa vakarautaka eliu na Kalou me da kitaka vakakina.

¹¹ O koya mo dou nanuma, ni dou a sega ni lotu eliu ni dou sa sucu vakakina, ia dou a vakatokai na Tawacili vei ira sa vakatokai na Cili sa cakava na liga e na yago;

¹² ni sa sega vei kemudou na Karisito e na gauna ko ya, dou sa sega ni matanitu vata vei ira na Isireli, a sa sega ni nomudou na ka sa yalataki e na veiyalayalati, a sa sega vei kemudou nai nuinui; ka sa sega ni nomudou na Kalou, e vuravura:

¹³ ia e na gauna oqo ni dou sa tu vata kei Karisito, oi kemudou ka yawa eliu dou sa qai voleka mai e na vuku ni dra i Karisito.

¹⁴ Ni sai koya na vu ni noda veivinakati tale, o koya sa qisia na rua me dua bau, a sa basuka na bai sa ia kina na tawasei;

¹⁵ ni sa vakaotia e na yagona na ka eda a veicati kina, o koya na vunau sa vakarota nai valavala ni lotu: me ia kina na veivinakati, ka qisi rau me rau tamata vou e dua bauga ni rau tu vata kaya;

¹⁶ me vakaveivinakatitaki rau talega kei na Kalou me vaka ni sa dua bau na tamata e na vuku ni kauveilatai, ni sa vakaotia kina na veicati:

¹⁷ a sa lako mai ka vunautaka na veivinakati vei kemudou sa yawa, vei ira talega era sa voleka:

¹⁸ ni sai koya eda sa torova rawa kina na Tamada koi keda ruarua e na Yalo e dua bauga.

¹⁹ O koya oqo dou sa qai sega tiko ni vulagi kina se kai tani, dou sa koro vata ga kei ira era sa lotu, ka dou sa lewe ni vale ni Kalou;

²⁰ ka dou sa tara cake e na nodra yavu nai apositolo kei ira na parofita, ia sai koya ko Jisu Karisito sa kenai vakadei e na tutu-ni-vale:

²¹ o koya sa sema vata kina na vale taucoko, a sa tubu cake kina me vale tabu ni sa tu vata kei na Turaga:

²² o koya dou sa vakatataki vata talega kina me vale ni Kalou ni sa tiko kina na Yalo Tabu.