Dauvunau 9 - Vakavakadewa Makawa

Sa tautauvata na ka sa yaco vei ira na tamata vinaka kei ira na tamata ca, era na mate kece, 1-6; me da vakayagataka kina na ka vakavuravura, ka gumatua e na cakacaka, 7-10. Sa lewa na ka kece na Kalou, 11,12. Sa vinaka na vuku ka ca na kaukauwa 13-18.

¹ E na vuku ni ka kece oqo ka'u a nanuma e lomaqu ka me'u tukuna na ka kece oqo, ni ra sa tiko e na liga ni Kalou na yalododonu, kei na vuku, kei na nodra cakacaka: sa sega na tamata sa kila na loloma se na veicati; sa bera vei ira na ka kecega.

² Sa tautauvata na ka sa yaco vei ira na tamata kecega: sa dua vata na ka sa yaco vei ira na yalododonu, vei ira talega na tamata ca; vua sa vinaka ka savasava, vua talega sa sega ni savasava; vua sa sega ni soro, vua talega sa soro: me vakataki koya sa vinaka, sa vakakina ko koya sai valavala ca; ko koya talega sa bubului, sa vakataki koya sa rerevaka na bubului.

³ Oqo na ka ca e na ka kece sa caka e ruku ni mata-ni-siga, ni sa dua vata ga na ka sa yacovi ira kecega: io, na lomadra talega na luve ni tamata sa sinai e na ca, a sa tiko e lomadra na lialia ni ra bula tiko, ka oti oqori era sa qai lako kivei ira na mate.

⁴ Ni sa nuitaka na ka ko koya sa wili vata kei ira kece na bula: ni sa vinaka na koli sa bula ka ca na laioni sa mate.

⁵ Ni ra sa kila ko ira sa bula ni ra na mate: ia ko ira na mate era sa sega ni kila e dua na ka, a sa sega tale na kedrai voli; ni sa yali sara na kedrai vakananumi.

⁶ Ia na nodra loloma, kei na nodra veicati, kei na nodra vuvu, sa qai yali; a sa sega tale na nodra i votavota e na dua na ka sa caka e ruku ni mata-ni-siga.

⁷ Mo lako, mo kania e na marau na kemu kakana, ka gunuva e na yalo sa reki na memu waini; ni sa qai vinakata na nomu cakacaka na Kalou.

⁸ Me vulavula ga na nomu i sulu e na gauna kece; ia nai lumu ni ulumu me kakua ga ni yali.

⁹ Mo drau reki vata tiko kei na watimu ko koya ko sa lomana e na veisiga kece ni nomu bula ga, sa lesia vei iko ko koya e ruku ni mata-ni-siga, na veisiga kece ni nomu bula walega: ni sai koya oqori na nomu i votavota e na nomu bula oqo, e na cakacaka talega ko sa oga kina e ruku ni mata-ni-siga.

¹⁰ A ka kecega sa vakaitavi kina na ligamu, mo kitaka ga e nomu i gu; ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.

¹¹ Au a qai lesu, ka kunea e ruku ni mata-ni-siga, ni ra sa sega ni tauca na cere ko ira na daucici, ka ra sega ni gumatua e nai valu ko ira na qaqa, a ra sa sega talega ni kana ko ira na vuku, a ra sa sega talega ni vakaiyau ko ira na yalomatua, ka ra sa sega talega ni vinakati ko ira na matai; ia na kena gauna kei na kena rawarawa sa yaco vei ira na tamata kecega.

¹² Ni sa sega talega ni kila na tamata na nona gauna: me vaka na ika sa lawavaki e na lawa ca, ka vaka na manumanu vuka sa coriti e nai cori; era sa coriti vakakina na luve ni tamata e na siga ca, ni sa yaco vakidacala vei ira.

¹³ A vuku talega oqo ka'u sa kunea e ruku ni mata-ni-siga, ia ka'u a vaka ni sa ka levu:

¹⁴ Sa dua na koro lailai, ka ra lewe lailai na lewena; ka sa mai kaba e dua na tui levu, ka buku na druadrua ni koro, ka viribaita vakaivalu sara:

¹⁵ Ia sa kune maikina e dua na tamata dravudravua ka vuku, ia ni sa vuku ko koya sa vakabula na koro; ia ka sega na tamata sa nanuma na tamata dravudravua ko ya.

¹⁶ Au a qai kaya, Sa vinaka na vuku ka ca na kaukauwa: ia sa daubeci ga na nona vuku na tamata dravudravua, ka sa sega ni rogoci na nona vosa.

¹⁷ Sa rogoci vakalevu na nodra vosa malua na vuku, ka vakalailai na nona qoqolou ka lewa e na kedra maliwa na lialia.

¹⁸ Sa vinaka na vuku ka ca nai yaragi ni valu; ia e dua bau ga na tamata i valavala ca sa vakacacana e levu na ka vinaka.