Dauvunau 8 - Vakavakadewa Makawa

A ka yaga na vuku, 1; me da doka na tui, 2-4; ka vakabauta na vunau, ka vakanananu, 5-7; ena rawai keda kece na mate, 8; a turaga ca, kei na mate ca, 9,10; a Kalou sa dauvosota na tamata ca, 11-13; eda sega ni nunuva rawa na lewa ni Kalou, 14-17.

¹ Ko cei me vakataki koya na vuku? ia ko cei sa kila na kenai balebale ni ka? a nona vuku na tamata sa serau kina na matana, ia na kaukauwa ni matana ena malumu mai.

² Au sa vakavulici iko mo muria nai vakaro ni tui, io e na vuku ni bubului vua na Kalou.

³ Mo kakua ni lako tani vakararawa e matana: kakua ni ko ia tiko e dua na ka ca; ni sa kitaka ga ko koya na ka sa vinaka vua.

⁴ A tikina sa tu kina na vosa ni tui, sa tu talega kina na kaukauwa: ia ko cei me kaya vua, A cava ko sa cakava?

⁵ Ko koya sa muria na vunau ena sega ni kunea e dua na ka ca: ia sa macala ki na yalona sa vuku na gauna kei na lewa dodonu:

⁶ ni sa dua na kena gauna kei na kena lewa dodonu ni cakacaka kecega, o koya sa levu kina vua na tamata na nona rarawa.

⁷ Ni sa sega ni kila ko koya na ka ena yaco: ia ko cei sa tukuna rawa vua, se na yaco ninaica?

⁸ Sa sega na tamata sa rawata na yalo na me tarova na yalo na; sa sega talega na ka e rawata e na siga ni mate: ka sa sega na suka e nai valu ko ya; ia nai valavala ca ena sega ni vakabulai ira era sa daukitaka.

⁹ A ka kecega oqo ka'u sa kunea, ka vakasara na lomaqu ki na cakacaka kece sa caka e ruku ni mata-ni-siga: ia sa dua na gauna sa lewa kina na tamata vua na tamata tani ka sa mani ca kina.

¹⁰ Ia ka'u a kunea ni ra sa bulu na tamata ca, era a daulako mai ki na yasana tabu ka ra suka tale, ka ra guileca e na koro era a cakacaka kina: oqo talega na ka wale.

¹¹ Ni sa sega ni cudruvi vakasauri nai valavala ca sa gumatua kina na lomadra na luve ni tamata me ra caka ca.

¹² Ia kevaka sa vakadrau na nona caka ca na tamata i valavala ca, ka sa vakabalavutaki na nona bula, ia ka'u sa kila dina sara ni ra na vinaka ko ira era sa rerevaka na Kalou, ko ira era sa rere e matana:

¹³ ia ena sega ni vinaka na tamata ca, ena sega talega ni vakabalavutaka na nona bula, ko ya sa vaka na yaloyalo; ni sa sega ni rere ko koya e na mata ni Kalou.

¹⁴ Sa dua na ka tani sa caka e vuravura; ni sa yaco vei ira na tamata yalododonu eso me vaka na nodra i valavala na tamata ca; ia ka sa yaco vei ira na tamata ca eso me vaka na nodra i valavala na yalododonu: au a kaya ni sa ka tani talega oqo.

¹⁵ Au a qai kaya sa vinaka na marau, ni sa sega na ka e vinaka cake vua na tamata e ruku ni mata-ni-siga, ka me kana ga, ka gunu, ka marau: ni na tikotiko ga kaya na ka oqo e na nona oca e na veisiga ni nona bula, o koya sa solia vua na Kalou e ruku ni mata-ni-siga.

¹⁶ Ni'u a vakasara na lomaqu me'u kila na vuku, ka kunea na cakacaka sa ia e vuravura: (ni sa tiko talega na tamata sa sega ni moce e na siga se na bogi:)

¹⁷ au a qai vakaraica na cakacaka kecega ni Kalou, ni sa dredre vua na tamata me kila na cakacaka sa caka e ruku ni mata-ni-siga: ia ke sa gumatua na tamata ni qara, ena sega ga ni kunea; ia ke sa nanuma ko koya sa vuku me kila, ena sega ga ni kunea rawa.