Dauvunau 5 - Vakavakadewa Makawa

Sa ca ni ia wale na cakacaka vua na Kalou, 1-7. A veivakasaurarataki kei nai yau sa vuna na oca wale, 8-17. A loloma ga ni Kalou sa yaga kina na ka e solia ko koya, 18-20.

¹ Mo lewa vinaka na yavamu ni ko sa lako ki na vale ni Kalou, ia mo kusarawa mo vakarorogo, mo berabera ga ni vakacabora nai soro ni tamata lialia: ni ra sa sega ni nanuma era sa caka ca.

² Mo kakua ni totolo ni vosa, kakua talega ni vakariri na lomamu me vosa e na mata ni Kalou: ni sa tiko mai lomalagi na Kalou, ia ko iko e vuravura: o koya me lailai kina na nomu vosa:

³ Ni sa vakavuna na tadra na ogaoga levu; ia na domo ni lialia sa kilai e na vosa e vuqa.

⁴ Ni ko sa ia na bubului vua na Kalou, mo kakua ni berabera ni vakayacora; ni sa sega ni vinakati ira na lialia: mo vakayacora na ka ko sa bubului kina.

⁵ Sa vinaka mo kakua ni bubului, ka ca ni ko bubului ka sega ni vakayacora.

⁶ Mo kakua ni solia na gusumu me vakacala na lewemu; mo kakua talega ni kaya e matana na agilose, ni sa nomu vosa cala: a cava mo vakacudruya kina na Kalou e na vuku ni nomu vosa ka me vakarusa na cakacaka ni ligamu?

⁷ Ni sa levu na tadra ka vuqa na vosa, sa vuqa talega na ka wale: ia mo rerevaka ga na Kalou.

⁸ Kevaka ko sa kunea ni ra sa vakasaurarataki na dravudravua, ka sa kau vakatani ka vakaukauwa na lewa kei na caka dodonu e na dua na qali, kakua ni ko kidacala kina: ni sa vakaraica tiko ko koya sa cecere vei ira sa cecere sara; ia sa tiko ka cecere vei ira.

⁹ Ia na vuata ni vanua sa nodra kece na tamata: ia sa rawa na kena na tui mai na veiwere.

¹⁰ O koya sa lomana na siliva ena sega ni mamau e na siliva; se ko koya sa lomana nai yau e na kenai kuri: oqo talega na ka wale.

¹¹ Ni sa levu mai na ka, era sa lewe levu mai era kania, ia ka cava na kena yaga vei ira na kenai taukei, ka me ra raica walega e na matadra?

¹² Sa vinaka na nona moce na tamata daucakacaka se kana vakalailai se kana vakalevu: ia na nonai yau levu na vutuniyau sa dredre kina vua me moce.

¹³ Sa dua na ka ca sara ka'u sa kunea e ruku ni mata-ni-siga, io nai yau sa maroroi me nodra ga na kenai taukei ka ra sa ca kina:

¹⁴ A sa yali ga nai yau ko ya e na caka cala: ia sa sucu mai e dua na luvena, ka sa sega na ka me tu vua.

¹⁵ Me vaka sa curu luvawale mai na kete i tinana, ena lesu tale ka luvawale me vaka ni sa lako mai, ka sega na ka e rawa e na nona cakacaka me kauta kina, sa sega na ka me kauta yani e ligana.

¹⁶ Ia oqo talega na ka ca sara, ni sa vaka dina na nona lako mai, ena vakakina na nona lako yani: ia ka cava na kena yaga vua ni sa cakacaka me nona na cagi?

¹⁷ Sa kana talega e na butobuto e na nona siga kecega, ia na rarawa levu kei na cudru sa yaco vata kei na nona mate.

¹⁸ Raica, na ka ka'u a kunea: ni sa yaga ka kilikili kaya na tamata me kana ka gunu, ka rekitaka na kena vinaka ni nona cakacaka kece sa oga kina e ruku ni mata-ni-siga e na veisiga kece ni nona bula, sa solia vua na Kalou: ni sa nonai votavota oqo.

¹⁹ Ia na tamata yadua talega sa solia vua na Kalou nai yau kei na kamunaga, a sa solia vua me kana rawa kina, ka me taura na nonai votavota, ka rekitaka na nona cakacaka; oqo nai solisoli ni Kalou.

²⁰ Ni na sega ni nanuma vakalevu na siga ni nona bula; ni sa rogo vua na Kalou e na reki ni lomana.