Dauvunau 4 - Vakavakadewa Makawa

Sa ca na tamata e na vuku ni valavala kaukauwa, 1-3; kei na vuvu, 4-6; kei na kocokoco, 7,8; kei na tiko duaduaga, 9-12; kei na yalokaukauwa, 13-16.

¹ Ia ka'u a qai lesu tale, ka kunea na veivakasaurarataki kece sa caka e ruku ni mata-ni-siga: ka raica, sa vakawai na matadra era sa vakasaurarataki, ka sa sega e vakacegui ira; ia sa tu vei ira na dauveivakasaurarataki na kaukauwa; ia ka sa sega e vakacegui ira.

² O koya oqo ka'u a vakacaucautaki ira vakalevu kina na mate era sa mate yani, ka vakalailai na bula era bula tiko.

³ Ia sa ca ruarua koi rau oqo ka vinaka ko koya sa sega ni sucu mai, ko koya ka sega ni raica na cakacaka ca sa ia e ruku ni mata-ni-siga.

⁴ Au a nanuma tale na oca kecega, kei na cakacaka dodonu kecega; ni sai koya oqo sa vuvutaki kina e dua na tamata maivua na kai nona. Oqo talega na ka wale ka sa ka ni oca wale ki na yalo.

⁵ A yalolialia sa roqoveinu na ligana, ka kania na lewena.

⁶ Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.

⁷ Ia ka'u a qai lesu tale ka kunea na ka walega e ruku ni mata-ni-siga.

⁸ Sa dua na tamata sa tiko duaduaga, ka sega na kenai karua; io, sa sega na luvena se na tacina: ka sa sega ni mudu na nona oga kecega; ka sa sega ga ni mamau na matana e nai yau; ka sa sega ni kaya, E na vuku beka i cei ka'u sa oca kina, ka vakatabuya na ka vinaka ki na yaloqu? Oqo talega na ka wale, io, sa dua na oca ca.

⁹ Sa vinaka ni lewe rua ka ca ni le dua bauga; ni rau sa rawata nai voli vinaka ni nodrau cakacaka.

¹⁰ Kevaka sa bale e dua, ena tubera cake na kenai sa: ia ena ca vua sa tiko duadua ni sa bale; ni sa sega e dua tale me tuberi koya cake.

¹¹ Oqo talega, kevaka sa koto vata e lewe rua, erau na katakata: ia ke le dua ga, ena katakata vakaevei ko koya?

¹² Ia kevaka e dua na tamata sa gumatua vua e dua tani, ke rau sa lewe rua erau na vorata rawa; ia na dali e turai-tolu ena sega ni cavuka rawarawa.

¹³ Sa vinaka na cauravou sa dravudravua ka vuku, ka ca na tui sa qase ka yalolialia, ka sa bese ni vunauci tale:

¹⁴ Ni sa curu mai na vale ni veivesu ko koya me buli me lewa; io sa sucu dravudravua ko koya e na nona matanitu.

¹⁵ Au a vakananumi ira kece na bula era lako voli e ruku ni mata-ni-siga, kei koya nai karua ni gone turaga sa rau veitaravi:

¹⁶ Sa sega ni wili rawa na tamata kece, io ko ira kece ra sa tiko eliu: ia ko ira era sa muri mai era na sega ni vinakati koya tiko. E dina na ka talega oqo sa ka wale ka sa ka ni oca ga ki na yalo.