Dauvunau 3 - Vakavakadewa Makawa

Sa sega ni dei nai valavala vakavuravura, 1-8; ia na cakacaka ni Kalou sa vinaka ka sa tu dei, 9-15. Sa sega ni caka dodonu na tamata, ia na Kalou sa caka dodonu, 16,17. Sa dodonu vua na tamata me kania na vinaka ni nona cakacaka, 18-22.

¹ Sa dui vagauna na ka kecega, ka sa dui vakasiga na ka kece sa caka e ruku i lomalagi:

² Sa dua na siga me sucu kina, kei na siga me mate kina; na siga me ia kina na teitei, kei na siga me cavuta kina na ka sa tei:

³ Na siga me ia kina na veivakamatei, kei na siga me ia kina na veivakabulai; na siga me ia kina na basu vale, kei na siga me ia kina na tara vale;

⁴ na siga ni tagi, kei na siga ni dredre; na siga me ia kina na tagi yaso, kei na siga me ia kina na meke;

⁵ na siga me tala vatu kina, kei na siga me bini vatu kina; na siga me ia kina na veimokoti, kei na siga me kua kina ni veimokoti;

⁶ na siga me rawa kina nai yau, kei na siga me yali kina nai yau; na siga me maninitaka na ka, kei na siga me dausoli kina na ka;

⁷ Na siga me ia kina na dresuka, kei na siga me ia kina na culacula; na siga me tiko lo kina, kei na siga me vosa kina;

⁸ Na siga me veilomani kina, kei na siga me veicati kina; na siga ni valu, kei na siga ni sautu.

⁹ A cava na kena yaga vua na tamata daucakacaka na ka sa dauoca kina ko koya?

¹⁰ Au sa raica oti na oca sa vota na Kalou vei ira na luve ni tamata me ra vakaogai kina.

¹¹ Sa cakava na ka kece me rairai vinaka e na kena gauna: ia sa vakatikora ki lomadra na gauna ena sega ni mudu, sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.

¹² Au sa kila ni sa sega tale na ka vinaka cake kina, ka me reki ga na tamata, ka caka vinaka ni sa bula tiko:

¹³ Ia me kana talega ka gunu na tamata yadua, ka kunea na kena vinaka ni nona cakacaka kecega, sai koya oqo nai solisoli ga ni Kalou.

¹⁴ Au sa kila, na ka kece sa cakava na Kalou, ena tu ga ka sega ni mudu: ena sega na ka me vakaikuritaki kina, ka sega na ka me kau tani maikina: ia sa cakava oqo na Kalou, me ra rere tiko vua ko ira na tamata.

¹⁵ Na ka sa tiko eliu sa tiko edaidai; kei na ka ena tiko maimuri sai koya ka tiko eliu; ia na Kalou ena taroga tale na ka sa oti yani.

¹⁶ Ia ka'u a raica e ruku ni mata-ni-siga nai tikotiko ni veilewai, ni sa tiko kina na ka ca; ni sa tiko talega na caka cala e nai tikotiko ni caka dodonu.

¹⁷ Au a kaya e lomaqu, Na Kalou ena lewai ira na yalododonu kei na tamata ca: ni sa dua maikea na kena gauna ni vakanananu ki nai naki kece kei na cakacaka kecega.

¹⁸ Au a kaya e lomaqu e na vuku ni nodra i valavala na tamata, me vakararamataki ira mada na Kalou, io, me ra raica rawa ni ra sa vaka ga na manumanu.

¹⁹ Ni sa yacovi ira na tamata na ka sa yacova na manumanu; ni sa tautauvata ga na ka sa yacovi ira: me vaka sa mate oqo, sa mate vaka talega kina ko ya; io, sa dua vata ga na nodra i cegu; ka sa sega ni uasivi cake na tamata e na manumanu: ni sa ka wale kecega.

²⁰ Era sa lako kece ki na dua bauga na tikina; era sa kuvu-ni-soso kecega, ka ra sa suka tale kecega me kuvu-ni-soso.

²¹ Ko cei sa kila na yalo ni tamata sa lako ki cake, kei na yalo ni manumanu sa lako sobu vaka ki vuravura?

²² O koya oqo ka'u sa kunea kina ni sa sega e dua na ka e yaga vua na tamata, ka me rekitaka ga na nona cakacaka; ni sai koya oqo na nonai votavota: ia ko cei beka me na kauti koya tale mai me raica na ka ena muri koya?