Dauvunau 2 - Vakavakadewa Makawa

A kena sega ni yaga na muria nai valavala vakavuravura, 1-11. Sa vinaka na tamata vuku ka ca na sesewa, ia sa dua vata ga na ka sa dauyacovi rau, 12-19. Sa sega ni yaga na cakacaka wale, ia sa yaga na ka sa solia na Kalou, 20-26.

¹ Au a kaya e lomaqu, Oqo mada, ka'u na vakatovolei iko e na reki, o koya mo ia mada kina na marau: ka raica, oqo talega sa ka wale.

² Au a kaya e na vuku ni dredre, Sa ka lialia: e na vuku ni reki talega, A cava na betena?

³ Au a segata e lomaqu, me'u vakamarautaki au e na gunu waini, ia ka'u sa lewa vakavuku tikoga na lomaqu; ka me'u muria nai valavala sesewa, me'u kila mada se cava beka na ka vinaka ko ya me nodra na luve ni tamata, me ra kitaka e ruku ni lomalagi e na veisiga kecega ni nodra bula.

⁴ Au a kitaka eso na cakacaka lelevu me noqu; Au a tara na noqu veivale; Au a tea na noqu were-ni-vaini:

⁵ Au a cakava na noqu veiwere kei na were ni kau vua vinaka, ia ka'u a tea kina na kau vua kecega:

⁶ au a kelia na noqu drano eso, me vakasuasuataki kina na veikau lalai sa tubu cake mai:

⁷ Au a volia eso na noqu tamata kei na noqu vada, a sa sucu e noqu vale na vada kei na kai vale; au a taukena talega na qele ni pulumokau kei na qele ni sipi na ka levu, ka lailai na nodra kecega era sa liu vei au e Jerusalemi:

⁸ Au a kumuna vata talega vei au na siliva kei na koula, kei nai vakacavacava maivei ira na tui, kei na veiqali: Au a rawata eso na noqu tagane dausere kei na noqu yalewa dausere, kei na ka era daumarautaka na luve ni tamata, ia na ka domo vinaka, ka vuqa na kenai valavala.

⁹ Ia ka'u a levu, ka uasivi cake vei ira kecega era sa liu vei au e Jerusalemi: ka sa tikotiko ga vei au na noqu vuku.

¹⁰ Ia na ka kece sa vinakata na mataqu ka'u a sega ni bureitaka kina; ka'u a sega ni tarova na yaloqu mai na dua na ka e marautaki; ni sa daureki na yaloqu e na noqu cakacaka kecega: ia oqo ga na noqu i votavota mai na noqu cakacaka kecega.

¹¹ Au a qai vakaraica na cakacaka kecega ka sa cakava na ligaqu, kei na ogaoga ka'u a vakaogai au kina: ka raica, sa ka wale kecega ka sa ka ni oca wale, ka sega na kena yaga e ruku ni mata-ni-siga.

¹² Ia ka'u a qai gole me'u raica nai valavala vuku, kei na ka lialia ka sesewa: ia ka cava tale me rawata na tamata sa na taravi koya na tui? sai koya ga sa caka oti eliu.

¹³ Au a qai kunea ni sa sivia na lialia na vuku, me vaka sa sivia na butobuto na rarama.

¹⁴ A matana na tamata vuku sa toka e na uluna; ia ko koya na lialia sa lako voli vakabutobuto: ia ka'u sa qai kunea ni sa dua vata ga na ka sa yacovi ira kecega.

¹⁵ Au a qai kaya e lomaqu, Me vaka na ka sa yacova na lialia, sai koya talega sa yacovi au; ia ka mei cavai ka'u a vuku cake kina? Au a qai kaya e lomaqu, Oqo talega na ka wale.

¹⁶ Ni rau na sega ni nanumi ruarua na vuku kei na lialia ka sega ni mudu; ka ni na guileca e na gauna maimuri na ka kecega sa tu edaidai. Ia sa mate vakaevei ko koya sa vuku? me vakataki koya ga na lialia.

¹⁷ O koya ka'u a cata kina na bula; ni sa ka rarawa vei au na ka sa caka e ruku ni mata-ni-siga: ni sa ka wale kecega, ka sa ka ni oca wale.

¹⁸ Io, ka'u a cata na noqu cakacaka kecega ka'u a oga kina e ruku ni mata-ni-siga: ni ka'u na laiva vua na tamata ena taravi au.

¹⁹ Ia ko cei e kila se na tamata vuku ko koya se lialia? ia ena veitaliataka ga na noqu cakacaka kecega ka'u a oca kina, ka cakacaka vakavuku kina e ruku ni mata-ni-siga. Oqo talega na ka wale.

²⁰ O koya ka'u a segata kina me'u vakayalolailaitaka na noqu cakacaka kecega ka'u a oga kina e ruku ni mata-ni-siga:

²¹ Ni sa dua na tamata sa daucakacaka vakavuku, ka vakayalomatua, ka dodonu; ia ena laiva ga me nonai votavota na tamata sa sega ni oca kina. Oqo talega na ka wale ka ca sara ga.

²² Ia ka cava li me nona na tamata e na vuku ni nona cakacaka kecega, kei na ocaoca ni yalona, e na ka sa oga kina ko koya e ruku ni mata-ni-siga?

²³ Ni sa ka rarawa na nona veisiga kece, ka ka ni vutugu na nona oca; io, sa sega ni cegu rawa na lomana e na bogi. Oqo talega na ka wale.

²⁴ Sa sega tale na ka e vinaka vua na tamata, ka me kana ga ka gunu, ka vakaceguya na yalona e na kena vinaka ni nona cakacaka. Oqo tale ka'u a kunea, ni sa ka mai vua na Kalou.

²⁵ Ia ko cei tale me kana, se ko cei tale me uasivi vei au e na marautaka na ka?

²⁶ Ni sa dausolia na Kalou vua na tamata sa vinaka vua na vuku, kei na yalomatua, kei na marau: ia ka sa vota vua nai valavala ca na oca, me kumuna ka binia vata, me mani solia vei koya sa vinaka vua na Kalou. Oqo talega sa ka wale ka sa ka ni oca ga ki na yalo.