Dauvunau 10 - Vakavakadewa Makawa

Sa tukuni na vuku kei na sesewa, 1-15; kei nai valavala ni tui sa gone ga, 16,17; kei na vucesa, 18; kei nai lavo, 19. Me kakua ni vosa cataki na tui, 20.

¹ A lago mate sa vakaboicataka na waiwai e vakaisaluakitaki vakamatai: sa vakakina na nona lialia lailai na tamata sa rogo ni sa vuku ka dokai.

² A lomana na vuku sa tiko ki ligana i matau; ia na lomana na lialia ki ligana i mawi.

³ Io, ni sa lako talega e na gaunisala na lialia, sa yali ga vua na vuku, ka sa tukuna vei ira na tamata kecega ni sa lialia ko koya.

⁴ Kevaka sa dua tani vei iko na lomana na turaga, kakua ni ko biuta na nomu yasana; ni na bokoci nai valavala ca levu e na nomu vakamalumalumu.

⁵ Sa dua na ka ca ka'u sa raica e ruku ni mata-ni-siga, na caka cala sa taka mai vua na turaga:

⁶ Sa lesi na lialia me tiko vakaturaga, ia ko ira na vutuniyau era sa tiko era.

⁷ Au a raici ira na tamata wale ni ra sa vodo ose, kei ira na turaga ni ra taubale e dela i vuravura me vaka na tamata wale.

⁸ O koya sa kelia nai keli ena lutu kina; kei koya sa basuka na bai, ena kati koya na gata.

⁹ O koya sa tala vatu ena mavoa kina; o koya sa ta kau ena ca beka kina.

¹⁰ Ke sa mucu na matau, ka sa sega ni solota na batina ko koya, ke sa qai tavaka vakaukauwa: ia sa yaga na vuku e na lewa.

¹¹ E dina ena daukata na gata kevaka sa sega e vakadula; ka sa sega ni vinaka cake ko koya sa dauvosa.

¹² Sa dauvosa vakayalololoma na tamata vuku; ia na tebenigusu ni lialia ena tilomi koya vakai koya.

¹³ Ai vakatekivu ni vosa ni gusuna sa ka lialia: ia nai otioti ni nona vosa na lialia ca sara.

¹⁴ Ia na tamata lialia sa dauvosa tiko: sa sega ni kila rawa na tamata na ka ena yaco; ia ko cei me tukuna rawa na ka ena muri mai?

¹⁵ A nodra cakacaka na lialia sa vakaocataki ira yadua; ni sa sega ni kila ko koya na lako ki na koro.

¹⁶ Ena ca vei iko, na vanua, ni sa nomu tui na gone, ka ra sa kana tiko e na mataka ko ira na nomu turaga!

¹⁷ O sa kalougata, na vanua, ni sa nomu tui na gone vakaturaga, ka ra sa kana e na gauna sa dodonu kina ko ira na nomu turaga, me ra kaukauwa, ka segai me ra mateni!

¹⁸ E na vuku ni vucesa sa daurusa na vale; e na vuku talega ni vakasavu liga sa dauturu na vale.

¹⁹ Sa caka na magiti me ia kina na dredre, a sa ka ni marau na waini: ia nai lavo ga sa rawa kina na ka kecega.

²⁰ Mo kakua ni vosavakacacataki koya na tui, io kakua ga e lomamu; mo kakua talega ni vosavakacacataki koya sa vutuniyau e nomu vale ni moce: ni sa dua na manumanu vuka ena kauta na nomu vosa, ia na ka sa vakatabana ena tukuna na ka oqo.