Dauveilewai 9 - Vakavakadewa Makawa

Sa lawakitaki ira na kai Sikemi ko Apimeleki, me nodra turaga ko koya, 1-6. A vosa vakatautauvata i Jocami, 7-21. Sa ra veidre ko Apimeleki kei ira na kai Sikemi, 22-41. Era sa veivala, 42-49. Sa lako ki Tipesi ko Apimeleki ka sa kaba, ka sa vakamatei kina, nai sau ni nonai valavala ca, 50-57.

¹ A sa lako ki Sikemi ko Apimeleki na luve i Jerupeali, kivei ira na weka i tinana, a sa vosa vei ira, io vei ira kecega na vuvale e na mataqali i tinana, a sa kaya,

² Dou kaya mada vei ira kecega na kai Sikemi, Evei ka vinaka vei kemudou; me ra lewai kemudou e le vitusagavulu na tamata, o ira kecega na luve i Jerupeali, se me lewai kemudou e le dua ga na tamata? dou nanuma talega ni'u sa sui vata kei kemudou, ka lewe vata kei kemudou.

³ A ra sa tukuni koya ko ira na weka i tinana, me vaka na vosa kecega oqo, kivei ira kecega na kai Sikemi: a sa gole na lomadra me ra muri Apimeleki, ni ra sa kaya, Sa wekada ko koya.

⁴ A ra sa solia vua e vitusagavulu nai lavo siliva mai na bure i Peali-pirici, a sa volia kina ko Apimeleki eso na tamata lialia ka cidroi, me ra muri koya.

⁵ A sa lako mai ko koya ki na vale i tamana ki Ofira, ka vakamatei ira na tacina, na luve i Jerupeali, era lewe vitusagavulu na tamata, e na dela ni dua na vatu: sa vo ga ko Jocame, o koya ka gone vei ira na luve i Jerupeali, ni sa vunitaki koya.

⁶ A ra sa soqoni vata ko ira kecega na kai Sikemi, kei ira kecega na mataqali i Milo, ka ra sa la'ki buli Apimeleki me tui, mai na oki sa duri mei vakatakilakila, oqori sa tiko mai Sikemi.

⁷ A sa tukuni vei Jocame, a sa lako ko koya ka la'ki tu e dela ni ulu-ni-vanua ko Kirisimi, ka tabalaka cake na domona, ka kaci, ka kaya vei ira, Dou rogoci au mai, na kai Sikemi, ena rogoci kemudou kina na Kalou:

⁸ Sa lako ko ira na kau me lumuta e dua me nodra tui; a ra sa kaya ki na vu ni olive, Mo lewai keimami.

⁹ A sa kaya vei ira na vu ni olive, Me'u biuta li na noqu waiwai sa vakarokorokotaki kina na Kalou kei ira na tamata, ka me'u la'ki veidretaki vei ira na kau?

¹⁰ A ra sa kaya na kau ki na vu ni lolo, Mo ni lako mai mo lewai keimami.

¹¹ A sa kaya vei ira na vu ni lolo, Me'u biuta li na noqu kamikamica, kei na vuaqu vinaka, ka me'u la'ki veidretaki vei ira na kau?

¹² A ra sa kaya na kau ki na vaini, Mo ni lako mai mo lewai keimami.

¹³ A sa kaya na vaini vei ira, Me'u biuta li na noqu waini, sa vakarekitaka na Kalou kei ira na tamata, ka me'u la'ki veidretaki vei ira na kau?

¹⁴ Sa ra qai kaya vua na soni na kau kecega, Mo ni lako mai mo lewai keimami.

¹⁵ A sa kaya vei ira na kau na soni, Kevaka dou sa lumuti au vakaidina me'u nomudou tui, dou lako mai ka vakararavi ki na noqu yaloyalo: ia kevaka e segai, me lako mai na soni na bukawaqa, ka kania na vu ni sitari kece mai Lepanoni.

¹⁶ Ia oqo, kevaka dou sa caka vakayalodina, ka vakayalododonu, ni dou sa buli Apimeleki me tui, ka dou sa caka vinaka talega vei Jerupeali kei na nona lewe-ni-vale, ka sa saumi koya me vaka na cakacaka ni ligana;

¹⁷ (ni sa vala e na vukumudou ko tamaqu, ka bolea dina na mate, ka vakabulai kemudou kina mai na ligadra na kai Mitiani,

¹⁸ ia dou sa lako vakaivalu mai edaidai ki na lewe-ni-vale i tamaqu, ka vakamatei ira na luvena, e le vitusagavulu na tamata, e na dela ni dua na vatu, ka sa buli Apimeleki na luve ni nona vada me tui vei ira na kai Sikemi, ni sa wekamudou);

¹⁹ io, kevaka dou sa caka vakayalodina, ka vakayalododonu, e na siga oqo, vei Jerupeali kei na nona lewe-ni-vale, dou qai marautaki Apimeleki, me marautaki kemudou talega ko koya:

²⁰ ia kevaka e segai, me lako maivei Apimeleki na bukawaqa, ka kani ira na kai Sikemi, kei na mataqali i Milo, ka me lako talega na bukawaqa maivei ira na kai Sikemi, kei ira na mataqali i Milo, ka kani Apimeleki.

²¹ A sa lako tani ko Jocame, ka dro, ka lako ki Pieri, ka tiko maikina, ni sa rerevaki Apimeleki na tuakana.

²² A sa nodra tui na Isireli ko Apimeleki ka yabaki tolu;

²³ sa qai tala na Kalou e dua na yalo ca vei Apimeleki kei ira na kai Sikemi; a ra sa bukiveretaki Apimeleki ko ira na kai Sikemi:

²⁴ me saumi kina nai valavala kaukauwa sa caka vei ira na luve i Jerupeali e lewe vitusagavulu, io, me saumi na kedra dra vei Apimeleki na tacidra, o koya sa vakamatei ira, vei ira talega na kai Sikemi, era sa vakaukauwataki koya me vakamatei ira na wekana.

²⁵ Ia ko ira na kai Sikemi era sa lesia eso me kena lawa mai na dela ni veiulu-ni-vanua, a ra sa daukoveraka na ka vei ira kecega era lako yani e na sala ko ya: a sa tukuni vei Apimeleki.

²⁶ A sa lako mai ko Keali na luve i Epeti kei ira na wekana, a ra sa lako ki Sikemi: a ra sa vakararavi vua ko ira na kai Sikemi.

²⁷ A ra sa lako yani ki na were, ka vetivetia na vua ni nodra veivaivaini, ka lobaka, ka marau voli, ka curu ki na bure ni nodra kalou, ka kana ka gunu, ka vatonaki Apimeleki me ca.

²⁸ A sa kaya ko Keali na luve i Epeti, O cei ko Apimeleki, se ko cei ko Sikemi, me da qaravi koya? sa sega li ni luve i Jerupeali ko koya, ka sa nona talai ko Sipuli? dou qaravi ira na mataqali i Amori na tama i Sikemi, ia ka cava me da qaravi koya kina, koi keda?

²⁹ Me soli mada ga kivei au ko ira na tamata oqo, ka'u na qai vakasivoi Apimeleki. Sa kaya talega ko koya vei Apimeleki, Mo vakalevuqataki ira na nomu i valu, ka curu mai.

³⁰ Ia ni sa rogoca ko Sipuli na turaga ni koro na vosa i Keali na luve i Epeti, sa tubu na nona cudru.

³¹ A sa tala lo eso na tamata ko koya vei Apimeleki, ka kaya, Raica, sa lako mai ki Sikemi ko Keali na luve i Epeti, kei ira na tacina; ka raica, era sa vakauqeti ira na lewe ni koro me ra vala kei iko.

³² Ia mo cavu tu mada e na bogi, o iko kei ira na tamata era tiko vata kei iko, ka lawa koto e na were.

³³ Ia mo sou e na mataka ni sa qai cadra na mata-ni-siga, ka kaba na koro, ka ni sa curu yani vei iko ko koya kei ira na tamata era tiko vata kaya, mo qai kitaka vei ira me vaka ko sa rawata.

³⁴ A sa cavu tu e na bogi ko Apimeleki, kei ira kecega na tamata era tiko vata kaya, a ra sa la'ki lawa koto ki Sikemi, a ra sa va na matai valu.

³⁵ A sa curu yani ko Keali na luve i Epeti, ka la'ki tu e na matamata-ni-koro: a sa cavu tu mai na vanua era lawa koto kina ko Apimeleki kei ira na tamata era tiko vata kaya.

³⁶ Ia ni sa raici ira na tamata ko Keali, sa kaya ko koya vei Sipuli, Raica, era sa lako sobu tiko mai eso na tamata mai na dela ni veiulu-ni-vanua. A sa kaya vua ko Sipuli, Ko sa raica na yaloyalo ni veiulu-ni-vanua me vaka sa tamata.

³⁷ A sa vosa tale ko Keali, ka kaya, Raica, era sa lako sobu tiko mai na tamata mai na tiki ni vanua ka rewa toka, ka dua nai vavakoso sa lako mai e na sala mai na oki ki Mioninimi.

³⁸ A sa kaya vua ko Sipuli, Sa qai vakaevei na gusumu ko a kaya kina, O cei ko Apimeleki me da qaravi koya? sai ira beka oqo na tamata ko a beca ne? oqo, mo curu yani mada, mo drau vala kaya.

³⁹ A sa lako yani ko Keali e na matadra na kai Sikemi, a sa veivala kei Apimeleki.

⁴⁰ A sa vakasavi koya ko Apimeleki, a sa dro e matana ko koya, a sa bale e lewe vuqa era vuetaki, ka yaco sara ki na matamata-ni-koro.

⁴¹ A sa la'ki tiko ki Eruma ko Apimeleki: a sa vakasavi Keali kei ira na wekana ko Sipuli, me ra kakua ni tiko e Sikemi.

⁴² Ia e na mataka sa lako yani ki na were ko ira na tamata; a ra sa tukuna vei Apimeleki.

⁴³ A sa kauti ira na tamata ko koya, ka wasei ira me ra tolu na matai valu, ka lawa koto e na were; a sa rai voli, ka raica, era sa curu yani mai na koro na tamata; a sa cavu tu ko koya, ka mokuti ira.

⁴⁴ Ia ko Apimeleki, kei na matai valu era tiko vata kaya, era sa cici ga, ka la'ki tu ki na matamata-ni-koro: ia na matai valu ruarua, era sa cicivi ira kecega era sa tiko e na were, ka mokuti ira.

⁴⁵ A sa kaba tiko na koro e na siga taucoko ko ya ko Apimeleki; ka sa rawa na koro, ka vakamatei ira na tamata era sa tiko kina, ka basuraka na koro, ka kaburaka kina na masima.

⁴⁶ Ia ni ra sa rogoca na tamata kecega era sa tiko e na vale-cecere mai Sikemi, era sa curuma na vale kaukauwa, io, na bure i Pirici na kalou.

⁴⁷ A sa tukuni vei Apimeleki, ni ra sa soqoni vata na tamata kecega e na vale-cecere mai Sikemi.

⁴⁸ A sa lako cake ko Apimeleki kei ira kecega na tamata era tiko vata kaya, ki na ulu-ni-vanua ko Salimoni, a sa kauta e dua na matau e ligana ko Apimeleki, ka taya sobu e dua na taba ni kau, ka kauta, ka viribale ki domona, ka sa kaya vei ira na tamata era tiko vata kaya, A ka dou sa raica ni'u cakava, dou kusarawa mo dou kitaka vakakina.

⁴⁹ A ra sa dui taya sobu na nona taba ni kau ko ira na tamata yadua, ka la'ki muri Apimeleki, a ra sa viritaka ki na vale kaukauwa, ka vakama e na bukawaqa na vale kaukauwa era sa tiko kina: a ra sa mate talega na tamata kece sa dautiko e na vale-cecere mai Sikemi, era le dua beka na udolu na tagane kei na yalewa.

⁵⁰ Sa qai lako ki Tipesi ko Apimeleki, ka kabai Tipesi, ka rawa.

⁵¹ A sa dua na vale-cecere ka kaukauwa e loma ni koro, a ra sa dro kina na tagane kecega kei na yalewa, kei ira kece na lewe ni koro, a ra sa sogoti ira kina, ka cabe ki na dela ni vale-cecere.

⁵² A sa lako ki na vale cecere ko Apimeleki, ka vala tiko kina, ka toro voleka ki na katuba ni vale-cecere, me vakama e na bukawaqa.

⁵³ Ka sa dua na yalewa sa viritaka e dua na tiki ni vatu ni varo sila ki na ulu i Apimeleki, ka voroka na nona qavokavoka.

⁵⁴ A sa kaci sara ko koya vua na cauravou sa daukauta na nonai yaragi, ka kaya vua, Mo ucuna na nomu i seleiwau, ka vakamatei au, de sa kainaki e na vukuqu, Sa vakamatei koya e dua na yalewa. A sa suaka-basikati koya na nona cauravou, ka sa mate ko koya.

⁵⁵ Ia ni ra sa raica ko ira na Isireli sa mate ko Apimeleki, era sa dui lako ki na nona tikina.

⁵⁶ Sa sauma vakaoqo ko koya na Kalou na ca i Apimeleki, ka kitaka ko koya vei tamana, ni sa vakamatei ira na tacina e lewe vitusagavulu:

⁵⁷ a sa sauma vei ira na kai Sikemi na Kalou na nodra ca kecega, a sa yacovi ira na vatovato i Jocame na luve i Jerupeali.