Dauveilewai 8 - Vakavakadewa Makawa

Sa cudru ko ira na Ifireimi, ka sa vakayalovinakataki ira ko Kitioni, 1-3, ka muri ira na kai Mitiani, 4-12. Sa cudruvi ko ira na kai Sukoci kei Penueli, 13-17. Sa mokuti rau na turaga lelevu ni Mitiani, 18-21. Sa sega ni via lewai ira na Isireli, 22,23. Sa cakava e dua na efoti, 24-27. Sa vakacegu na vanua ka yabaki vasagavulu; sa le vuqa na luvena, a sa ciba ko koya, 32. Sa vuki ko ira na Isireli me ra ca, ka sega ni nanumi Kitioni, 33-35.

¹ A ra sa kaya vua ko ira na Ifireimi, A cava na ka oqo ko sa cakava vei keimami, ni ko a sega ni kacivi keimami ni ko a la'ki vala kei ira na kai Mitiani? A ra sa veileti kaya vakaukauwa.

² A sa kaya vei ira ko koya, A cava ka'u a cakava me vakataki kemuni? Sa sega beka ni vinaka na tomitomika na vua ni vaini nei Ifireimi, ka ca na vetivetia na vua ni vaini nei Epieseri?

³ Sa solia ki na ligamuni na Kalou na turaga ni Mitiani ko Orepi kei Siepi: ia ka cava ka'u a cakava rawa me vakataki kemuni? Sa qai malumu na nodra cudru vei koya, ni sa vosa oti vakaoqo ko koya.

⁴ A sa lako ki na Joritani ko Kitioni, ka vutokosova, ko koya kei ira na tamata e lewe tolu na drau era tiko vata kaya, era sa malumalumu, ka ra cici muri ga.

⁵ A sa kaya ko koya vei ira na kai Sukoci, Mo dou solia mada eso nai buli madrai vei ira na tamata sa muri au, ni ra sa malumalumu, ia ka'u sa cici muri rau tiko na tui Mitiani, ko Sepa kei Salimuna.

⁶ A ra sa kaya na turaga ni Sukoci, Sa tiko beka oqo e ligamu na ligadrau ko Sepa kei Salimuna, me keitou soli madrai kina vei ira na nomu i valu?

⁷ A sa kaya ko Kitioni, E na vuku ni ka oqo, ni sa soli rau oti ko Sepa kei Salimuna ki na ligaqu ko Jiova, ka'u na kadrulaka na yagomudou e na kau karokaroa kei na kau gadrogadroa ni veikau.

⁸ A sa lako cake maikea ki Penueli, ka vosa vakakina vei ira: a ra sa vosa vua ko ira na kai Penueli me vaka na nodra vosa na kai Sukoci.

⁹ A sa vosa ko koya vei ira talega na kai Penueli, ka kaya, Ni'u sa lesu tale mai e na vakacegu, ka'u na basuka sobu na vale-cecere oqo.

¹⁰ A sa tiko mai Karikori ko Sepa kei Salimuna, kei ira kece na nodraui valu era le tinikalima beka na udolu, ko ira ga oqo era sa vo vei ira kecega na nodra i valu ko ira mai na tu-i-cake; ni sa bale oti e le tinikarua na oba na tamata sa vakaiyaragi e nai seleiwau.

¹¹ A sa lako cake ko Kitioni vaka kivei ira era dautiko e na vale laca vaka ki na tu-i-cake ki Nopa kei Jokipa, ka sa mokuti ira nai valu; ni ra sa tiko wele ga ko ira nai valu.

¹² Ia sa dro ko Sepa kei Salimuna, a sa cici muri rau ko koya, ka sa tauri rau na tui ni Mitiani, ko Sepa kei Salimuna, ka vakadomobulataki ira kecega nai valu.

¹³ A sa lesu mai nai valu ko Kitioni na luve i Joasi, ni sa bera ni cadra na mata-ni-siga,

¹⁴ a sa taura ko koya e dua na cauravou vei ira na kai Sukoci, a sa tarogi koya; a sa tukuna vakavinaka vua ko koya na turaga ni Sukoci, kei ira na qase era tiko kina, e lewe vitusagavulu ka vitu na tamata.

¹⁵ A sa lako mai vei ira na kai Sukoci ko koya, ka kaya, Raici rau mada ko Sepa kei Salimuna, oi rau dou a vosavakacaca kina vei au, ni dou a kaya, Sa tiko li e ligamu na ligadrau ko Sepa kei Salimuna, me keitou solia kina na madrai vei ira na nomu tamata sa malumalumu?

¹⁶ A sa tauri ira na qase ni koro ko ya, kei na kau karokaroa, kei na kau gadrogadroa ni veikau, ka sa vakatavulici ira kina na kai Sukoci.

¹⁷ A sa basuka sobu na vale cecere mai Penueli, ka vakamatei ira na lewe ni koro.

¹⁸ A sa kaya ko koya vei Sepa kei Salimuna, Era tamata vakacava ko ira drau a vakamatea mai Tepori? A rau sa kaya, Era sa vakataki iko sara; sa rairai yadua vaka na luve ni tui.

¹⁹ A sa kaya ko koya, Era sa taciqu, na luve i tinaqu: me vaka sa bula ko Jiova, kevaka drau a vakabulai ira ka'u sa qai sega ni vakamatei kemudrau.

²⁰ A sa kaya vei Jica na nona ulumatua, Mo ia mada, mo vakamatei rau. A sa sega ni ucuna na nonai seleiwau na cauravou; ni sa rere, ni sa gone ga ko koya.

²¹ A sa kaya ko Sepa kei Salimuna, Mo ia mada ko iko, ka yaviti keirau, ni sa vaka na matua ni tamata na nona kaukauwa. A sa ia ko Kitioni, ka vakamatei Sepa kei Salimuna; sa taura talega na ka sa vakaiukuuku kina na domo ni nodrau kameli.

²² A ra sa kaya vei Kitioni ko ira na Isireli, Mo lewai keimami ko iko kei na luvemu, kei na makubumu: ni ko sa vakabulai keimami mai na ligadra na kai Mitiani.

²³ A sa kaya vei ira ko Kitioni, Au na sega ni lewai kemudou, ena sega talega ni lewai kemudou na luvequ: ena lewai kemudou ko Jiova ga.

²⁴ A sa kaya vei ira ko Kitioni, E dua na ka ka'u na kerea vei kemudou; ia mo dou solia vei au na tamata yadua na sau sa nonai toki ni valu, (sa nodra na sau koula, ni ra sa kawa i Isimeli).

²⁵ A ra sa kaya, Keimami vinakata me keimami solia. A ra sa tevuka e dua nai sulu, ka ra sa dui biuta kina na tamata yadua na sau ni nonai toki ni valu.

²⁶ Ia na kena bibi ni sau koula sa kerea ko koya, sa dua na udolu ka vitu na drau na sikeli koula; ia ka sega ni wili na veika vakaiukuuku, kei na taube, kei nai sulu lokaloka erau sa vakaisulutaki kina na tui Mitiani, kei na sinucodo sa tu e na domo ni nodrau kameli.

²⁷ A sa cakava kina e dua na efoti ko Kitioni, ka vakatikora e na nona koro ko Ofira: a ra sa dau lako kina kai valavala vakatani ko ira kecega na Isireli, ka sa yaco mei cori vei Kitioni kei ira na nona mataqali.

²⁸ A sa vakamalumalumutaki ko ira na kai Mitiani vei ira na Isireli, a ra sa sega tale ni gumatua. A sa vakacegu na vanua ka yabaki vasagavulu e na gauna i Kitioni.

²⁹ A sa lako ko Jerupeali na luve i Joasi, ka tiko e na nona vale.

³⁰ A ra sa le vitusagavulu na luve i Kitioni, era tagane sa vakatubura ko koya, ni sa lewe vuqa na watina.

³¹ Ia na watina lailai, o koya ka tiko mai Sikemi, sa vakasucuma e dua na luvedrau tagane; a sa vakayacani koya ko Apimeleki.

³² A sa ciba ko Kitioni na luve i Joasi, ni sa qase sara, a sa bulu e nai bulubulu i Joasi na tamana, mai Ofira sa nodra na luve i Epieseri.

³³ Ia ni sa mate ko Kitioni, era sai valavala vakatani tale ko ira na Isireli, ka ni ra muri ira na Peali, ka vakabauti Peali-pirici me nodra kalou.

³⁴ Ia ko ira na Isireli era sa sega ni nanumi Jiova na nodra Kalou, o koya ka vakabulai ira mai na nodra meca kecega era tiko vakavolivoliti ira:

³⁵ a ra sega talega ni lomani ira na mataqali i Jerupeali, o koya ko Kitioni, me vaka na ka vinaka kecega sa cakava ko koya vei ira na Isireli.