Dauveilewai 7 - Vakavakadewa Makawa

Sa vakaroti Kitioni ko Jiova e na nonai valu, 1-8. Na tadra ni kai Mitiani, 9-14. Nai valavala ni valu, 15-20: era sa moku na kai Mitiani, 21-25.

¹ A sa sou e na mataka ko Jerupeali, sai koya ko Kitioni, kei ira na tamata kecega era tiko vata kaya, ka ra la'ki tiko mai na mata-ni-wai ko Eroti: a sa toka na nodra i tikotiko na kai Mitiani vaka ki na tokalau e na buca ka voleka ki na vanua-cecere ko More.

² A sa kaya vei Kitioni ko Jiova, Na kedra lewe levu na tamata era tiko vata kei iko sa tarovi kina na noqu soli ira na kai Mitiani ki na ligadra, de ra yalolevu vei au ko ira na Isireli, ka kaya, A ligaimami ga sa vakabulai keimami.

³ Ia oqo, mo kacivaka vei ira na tamata, ka kaya, O koya sa rere ka yalolailai me lesu yani ko koya mai na ulu-ni-vanua ko Kiliati. A ra sa lesu yani e le ruasagavulu ka rua na udolu vei ira na tamata; ka sa vo ga e le tini na udolu.

⁴ A sa kaya vei Kitioni ko Jiova, Era sa rui lewe vuqa tiko na tamata; kauti ira sobu ki na wai, kau na vakatovolei ira maikeri mo kila: ia ko koya ka'u na kaya kina vei iko, Me lako vata kei iko ko koya oqo, ena lako vata kei iko ko koya; ia ko koya yadua ka'u na kaya kina vei iko, Me kakua ni lako vata kei iko ko koya oqo, ena sega ni lako ko koya.

⁵ A sa kauti ira sobu na tamata ko koya ki na wai: a sa kaya vei Kitioni ko Jiova, Ko koya yadua sa dramica na wai e na yamena, me vaka sa dramica na koli, mo kauta me tu tani; me tu tani talega ko ira kece era cuva e durudra me ra gunu.

⁶ Ia na kedrai wiliwili era sa gunusevusevu, ni ra sa kauta na ligadra ki na gusudra, era sa le tolu na drau na tamata; ia ko ira kece na tamata sa vo, era sa cuva e durudra me gunu wai.

⁷ A sa kaya vei Kitioni ko Jiova, Ko ira na lewe tolu na drau na tamata sa gunusevusevu ka'u na vakabulai kemudou kina, ka soli ira na kai Mitiani ki na ligamu: ia me ra dui lako ki na nodra tikina ko ira kecega na tamata yadua.

⁸ A ra sa kauta e ligadra nai vaqa ko ira na tamata, kei na nodra davui: a sa talai ira kecega na Isireli ko koya, na tamata yadua ki na nona vale laca, ka tauri ira ga na lewe tolu na drau na tamata. A sa no yani ki ra e na buca na nodra i tikotiko na kai Mitiani.

⁹ A sa kaya vua e na bogi ko ya ko Jiova, Mo cavu tu, mo lako sobu ki na nodra i tikotiko, ni'u sa solia oti ki na ligamu:

¹⁰ ia kevaka ko sa rere ni lako sobu, mo drau lako sobu vata kei Fura, na nomu tamata, ki na nodra i tikotiko:

¹¹ ko na rogoca kina na ka era sa kaya, ia emuri ena vakaukauwataki na ligamu, ko na qai lako sobu ki na nodra i tikotiko. Erau sa qai lako sobu ko koya kei Fura, na nona tamata, ki na nodra i yalayala na tamata sa vakaiyaragi e na nodra i tikotiko.

¹² A ra sa koto e na buca me vaka na vodre na kedrai wiliwili ko ira na kai Mitiani, kei ira na Amalekaiti, kei ira kecega mai na tu-i-cake; kei na nodra kameli sa sega ni wili rawa, na kedrai wiliwili sa vaka na nuku sa no mai matasawa.

¹³ Ia ni sa yaco kina ko Kitioni, sa tukuna tiko e dua na tamata e dua na tadra vua na kai nona, ka sa kaya, Raica, au sa tadrataka e dua na tadra, ka raica, sa dua nai buli madrai parile sa vakatatoqitoqi ki na nodra i tikotiko na kai Mitiani, ka sa yacova na vale laca, ka lauta, a sa bale kina, a sa vukica sara, ka sa bale no kina na vale laca.

¹⁴ A sa vosa mai na kai nona, ka kaya, Sa sega ni ka tani, nai seleiwau ga i Kitioni na luve i Joasi, e dua vei ira na Isireli; sa soli ira na kai Mitiani ki na ligana na Kalou, kei na nodra i tikotiko taucoko.

¹⁵ Ia ni sa rogoca oti ko Kitioni nai tukutuku ni tadra, kei na kenai balebale, sa ia na lotu ko koya; a sa lesu tale ki nai tikotiko ni Isireli, ka kaya, Dou ia; ni sa solia ki na ligamudou ko Jiova na nodra i tikotiko na kai Mitiani.

¹⁶ A sa wasea ko koya e le tolu na drau na tamata me tolu na mataivalu, ka solia vei ira yadua na davui; kei na veibilo sa lala, kei na cina me tu e loma ni bilo.

¹⁷ A sa kaya vei ira, Dou raici au mada ka kitaka me vaka ka'u sa kitaka: ka raica, ni'u sa yaco ki nai bili ni nodra i tikotiko, na ka ka'u na kitaka, dou kitaka vakakina:

¹⁸ ia ni'u sa uvuca na davui, ko au kei ira kece sa tiko vata kei au, mo dou uvuca talega na davui koi kemudou, ni dou sa vakavolivolita na nodra i tikotiko taucoko, ia dou kaya, Ai seleiwau i Jiova kei Kitioni.

¹⁹ A sa lako mai ko Kitioni, kei ira na tamata e le dua na drau era tiko vata kaya, ki nai bili ni nodra i tikotiko e nai vakatekivu ni vakatawa e na lomaloma-ni-bogi; era sa qai lesi ira oti ga nai vakatawa: a ra sa uvuca na davui, ka vorolaka na bilo era sa taura e na ligadra.

²⁰ Ia era sa uvuca na davui ko ira na matai valu tolutolu, a ra sa vorolaka na bilo, ka taura na cina e na ligadra i mawi, kei na davui e na ligadra i matau me ra uvuca, ka ra kailavaka, Ai seleiwau i Jiova kei Kitioni.

²¹ A ra sa tu na tamata yadua e na nona tikina, ni ra sa volita na nodra i tikotiko: a ra sa cici nai valu kece, ka tagi, ka dro.

²² Ia era sa uvuca tiko na davui ko ira na lewe tolu na drau, a sa vakauqeti ira na tamata yadua na Kalou me ra ravusebetaki ira na kai nodra e nai seleiwau, io, ko ira nai valu taucoko: a ra sa dro nai valu ki Peci-sita mai Sireraci, ka yaco ki nai yalayala i Epelimeola, ki Tapaci.

²³ A ra sa vakasoqoni vata na Isireli maivei ira na Nafitalai, kei ira na Aseri, kei ira kecega na Manasa, ka ra sa cici muri ira na kai Mitiani.

²⁴ A sa tala eso na tamata ko Kitioni ki na ulu-ni-vanua taucoko ko Ifireimi, ka kaya, Dou lako sobu me tavaki ira na kai Mitiani, ka la'ki vakatawa eliu na wai ka yaco ki Peci-para, kei na Joritani. A ra sa vakasoqoni vata ko ira kecega na Ifireimi, a ra sa vakatawa na wai ka yaco ki Peci-para, kei na Joritani.

²⁵ A ra sa tauri rau na turaga ni Mitiani, ko Orepi kei Siepi, a ra sa vakamatei Orepi e na dela ni uluvatu ko Orepi, ka ra sa vakamatei Siepi mai nai butubutu ni waini nei Siepi; a ra sa qai cici muri ira na kai Mitiani; ka kauta na uludrau ko Orepi kei Siepi kivei Kitioni mai tai kadua ni Joritani.