Dauveilewai 5 - Vakavakadewa Makawa

A nodrau sere ko Tepora kei Peraki, ni ra sa qai mate ko ira na nodra meca.

¹ Sa qai ia na sere e na siga ko ya ko Tepora kei Peraki na luve i Epinoami, ka kaya,

² Ni sa liutaki ira na Isireli ko ira na turaga, Ka ni ra sa gu ko ira na tamata, Dou vakavinavinaka vei Jiova.

³ Mo ni rogoca, na tui; dou vakatu daligamudou, na goneturaga; Au na sere vei Jiova, io koi au; Au na sere vei Jiova na Kalou ni Isireli.

⁴ I Jiova, ni kemuni a lako tani mai Sia, Ni kemuni a lako tani vakaturaga mai na vanua ko Itomi, Sa tavuki ko vuravura, a sa vakatautau ko lomalagi, Io, sa vakatauca talega na uca na veio.

⁵ Sa waicala na veiulu-ni-vanua e na mata i Jiova, Io, ko Saineai ko ya e na mata i Jiova na Kalou ni Isireli.

⁶ E na gauna i Samikari na luve i Anaci, E na gauna i Jaeli, sa sega ni lakovi na veisalatu, A ra sa lako vakatikitiki tani ko ira era dauveilakoyaki tu.

⁷ Sa sega e dua me lewa e Isireli, sa sega ga, Ka yacova na noqu tubu, koi au ko Tepora, Ka yacova na noqu tubu me'u dua na tinadra na Isireli.

⁸ Era digitaka eso na kalou vou; Sa qai kabai na matamata-ni-koro: Sa kune li e dua nai sasabai se moto Vei ira na le oba vakava ni Isireli?

⁹ Au sa lomani ira na turaga ni Isireli, O ira era sa gu maivei ira na tamata. Dou vakavinavinaka vei Jiova.

¹⁰ Dou vakarogoya, oi kemudou sa dauvodoka na asa vulavula, Oi kemudou sa dautiko me ia na veilewai, Oi kemudou talega sa daulako tu e na sala;

¹¹ Ni ra sa sega ni rorogo ko ira na dauvanavana e na tikina sa dautaki kina na wai; Era na veitukutukunitaka maikea na cakacaka loloma i Jiova, Io, na nona cakacaka loloma sa lewai ira na Isireli: Era sa qai lako sobu ki na veimatamata-ni-koro na tamata nei Jiova.

¹² Yadra mai, yadra mai, i Tepora: Yadra mai, yadra mai, lagata na sere: I Peraki, mo ia, ka vakabobulataki ira na nomu bobula, ko iko na luve i Epinoami.

¹³ E na gauna ko ya sa lako sobu mai ko ira na turaga sa vo: Sa lako sobu mai e na vukuqu ko ira na tamata i Jiova, me vorati ira na qaqa:

¹⁴ Era sa lako sobu maivei ira na Ifireimi, ko ira era sa tiko mai Amaleki; Sa muri kemudou, ko ira na Penijamini, e na kedra maliwa na nomudou tamata; Maivei ira na Mekiri, era sa lako sobu era sa daulewa; Ka maivei ira na Sepuloni, ko ira sa taura nai titoko i koya sa dauia na wiliwili.

¹⁵ Ia sa to vata kei Tepora ko ira na turaga maivei ira na Isakari, Sa tautauvata ko ira na Isakari, kei Peraki: Era sa cici yani me ra muri koya ki na buca. Mai na nodra veisoniwai na Rupeni, Sa ka levu nai naki ni lomadra.

¹⁶ O sa tiko e na cava mai na bai ni sipi, Mo rogoca kina na tagi ni qele ni sipi: Mai na nodra veisoniwai na Rupeni, sa ka levu na nodra dikeva na lomadra.

¹⁷ Sa tiko mai tai kadua ni Joritani ko ira na Kiliati: A cava sa tiko kina e na veiwaqa ko ira na Tani? Sa tiko mai matasawa ko ira na Aseri, Ka tiko ga e na nodra toba.

¹⁸ Era sa bolea na mate ko ira na Sepuloni, Kei ira talega na Nafitalai, e na veitiki-ni-vanua cecere.

¹⁹ Era sa lako mai na tui, era sa vala, Era sa qai vala na tui Kenani Mai Teenaki ki na wai mai Mikito; Era sa sega ni taura nai lavo me kenai sau.

²⁰ Era sa vala ko ira mai lomalagi; Era sa veivala kei Sisira na kalokalo e na nodra lako tu e na nodra gaunisala.

²¹ Sa daveni ira yani na uciwai ko Kisoni, Na uciwai makawa ko ya, na uciwai ko Kisoni. O iko na yaloqu, ko sa buturaka sobu na kaukauwa.

²² Sa qai mavoa sara na ququ ni ose, Ni ra sa cici kusakusa, ni ra sa cici kusakusa ko ira na nodra qaqa.

²³ Dou kaya, Me rusa ko Merosi, sa kaya na Agilose i Jiova: Dou kaya, Me rusa sara ko ira na lewe ni koro ko ya; Ni ra sa sega ni lako mai me veivuke kei Jiova, Me veivuke kei Jiova ka me ra veivala kei ira na qaqa.

²⁴ Sa na kalougata vei ira na yalewa ko Jaeli Na wati i Eperi na Kenaiti Sa kalougata vei ira na yalewa era sa tiko e na vale laca:

²⁵ Sa kere wai ko koya; Sa solia vua ko koya na wai-ni-sucu; Sa kauta mai ko koya na kena pata e na bilo vakaturaga:

²⁶ Sa dodoka na ligana ki nai vakadei, Kei na ligana i matau ki na nodra i tukituki na matai; Sa tukilaka nai vako ki na ulu i Sisira, ka sovuta, Io, sa coka me basika na nona kanavalavala.

²⁷ Sa cuva ko koya ki yavana, sa bale, sa koto no: Sa cuva ki na yavana ko koya, sa bale: E na tikina ka cuva kina, sa bale mate kina.

²⁸ Sa iro yani e nai sogo cicila ko koya Sa kaci mai nai sogo cicila, na tina i Sisira, A cava sa berabera kina na nona qiqi-ni-valu? A cava sa berabera kina na yava ni nona qiqi-ni-valu?

²⁹ Era sa kaya vua ko ira na kena marama vuku, Sa kaya talega ko koya,

³⁰ Era sa sega li ni kunea nai toki ni valu? era sa sega li ni vota? Io e le dua e le rua na goneyalewa vei ira na tamata yadua; Kivei Sisira e dua nai toki ni valu veivolavolai, E dua nai toki ni valu veivolavolai, O koya sa cula vakamatai e na yasana ruarua, me ra taubena ko ira sa gumatua?

³¹ I Jiova, me ra rusa vakakina, ko ira na nomuni meca kecega: Ia ko ira era sa lomani koya me ra vaka ga na mata-ni-siga ni sa lako cake e na nona lagilagi. A sa vakacegu na vanua ka yabaki vasagavulu.