Dauveilewai 4 - Vakavakadewa Makawa

Sai valavala ca tale ko ira na Isireli, a sa rawai ira ko ira na nodra meca, 1-3. Sa vakaroti Peraki ko Tepora na parofita yalewa me la'ki veivala kei ira na meca, 4-16. Sa vakamatei Sisira na turaga ni valu ko Jaeli, e dua na yalewa, 17-22. Sa qai malumalumu ko ira na nodra meca, 23,24.

¹ Ia ni sa mate ko Eute, era sa kitaka tale na ka ca e na mata i Jiova ko ira na Isireli.

² A sa soli ira ko Jiova ki na liga i Japini na tui Kenani, o koya sa lewa mai Asori; ia na kapiteni ni nonai valu ko Sisira, o koya sa dautiko mai Eroseci mai na veimatanitu tani.

³ A ra sa tagi vei Jiova ko ira na Isireli; ni sa tu vua e ciwa na drau na qiqi-ni-valu kaukamea, a sa vakasaurarataki ira vakaukauwa na Isireli ka yabaki ruasagavulu.

⁴ A sa lewai ira na Isireli e na gauna ko ya ko Tepora, e dua na parofita yalewa, na wati Lapitoci.

⁵ A sa tiko ko koya e ruku ni balabala i Tepora, e na macawa i Rama kei Peceli, mai na ulu-ni-vanua ko Ifireimi; ka sa daulako cake vei koya ko ira na Isireli me lewa na nodra ka ni veileti.

⁶ A sa talaki ko koya, ka kacivi Peraki na luve i Epinoami mai Ketesa nei Nafitalai, ka kaya vua, Sa sega li ni vakarota ko Jiova na Kalou ni Isireli, Mo la'ki taucavutaka na matai valu vaka ki na ulu-ni-vanua ko Tepori, ka kauta vata kei iko e lewe tini na udolu na tamata maivei ira na mataqali i Nafitalai kei ira na mataqali i Sepuloni?

⁷ Ia ka'u na vakayarayarataki Sisira kivei iko ki na uciwai ko Kisoni, o koya na kapiteni ni valu nei Japini, kei na nona qiqi-ni-valu, kei ira na nona tamata era lewe vuqa, ia ka'u na soli koya ki na ligamu.

⁸ A sa kaya vua ko Peraki, Kevaka ko na lako vata kei au, au na lako: ia kevaka ko na sega ni lako vata kei au, ka'u na sega ni lako.

⁹ A sa kaya ko koya, Au na lako vakaidina kei iko: ia ko na sega ni dokai e na vuku ni ka ko sa lako kina; ni na soli Sisira ko Jiova ki na liga ni dua na yalewa. A sa cavu tu ko Tepora, ka rau sa lako kei Peraki ki Ketesa.

¹⁰ A sa kacivi ira na Sepuloni kei ira na Nafitalai ko Peraki me ra lako ki Ketesa; a sa lako cake ka muri koya e le tini na udolu na tamata: a sa lako vata kaya ko Tepora.

¹¹ Ia ko Eperi na Kenaiti sa tawasei koya eliu maivei ira na kai Kenai era luve i Opapi na vugo i Mosese, ka birika na nona vale laca vaka ki na oki mai Seeneimi, Oqori sa voleka ki Ketesa.

¹² A ra sa tukuna vei Sisira ni sa lako cake ki na ulu-ni-vanua ko Tepori ko Peraki na luve i Epinoami.

¹³ A sa vakasoqona vata ko Sisira na nona qiqi-ni-valu kecega, e ciwa na drau na qiqi-ni-valu kaukamea, kei na tamata kecega era tiko vata kaya, mai Eroseci mai na veimatanitu tani, me ra lako ki na uciwai ko Kisoni.

¹⁴ A sa kaya vei Peraki ko Tepora, Mo ia; ni sa kena siga oqo, ena soli Sisira kina ki na ligamu ko Jiova: sa sega li ni liutaki iko ko Jiova? A sa lako sobu ko Peraki mai na ulu-ni-vanua ko Tepori, a sa muri koya e lewe tini na udolu na tamata.

¹⁵ Ia ko Jiova sa vakubutaki Sisira, kei na nona qiqi-ni-valu kecega, kei ira na nonai valu kecega, e nai seleiwau, e na mata i Peraki; a sa sobu yani ko Sisira mai na nona qiqi-ni-valu, ka dro e na yavana.

¹⁶ A sa cicimuria na qiqi-ni-valu kei ira nai valu ko Peraki, ka yaco ki Eroseci mai na veimatanitu tani: a sa bale kecega nai valu i Sisira e nai seleiwau; sa sega ni vo bula e dua na tamata.

¹⁷ Ia sa dro ko Sisira e na yavana, ka yaco ki na vale laca nei Jaeli, na wati i Eperi na Kenaiti: ni ra sa tiko veisaututaki ko Japini na tui Asori kei na mataqali i Eperi na Kenaiti.

¹⁸ A sa curu ki tuba Ko Jaeli me tavaki Sisira, a sa kaya vua, Ni curu mai, noqu turaga, curu mai kivei au; kakua ni rere. A sa curu vua ko koya ki loma ni vale laca, a sa tutuvitaki koya ko koya e nai tutuvi:

¹⁹ A sa kaya vua na yalewa ko koya, Mo vagunuvi au mada e na dua na wai lailai, ni'u sa viagunu. A sa sereka ko koya e dua na tavaya wai-ni-sucu, ka vagunuvi koya kina, ka tutuvitaki koya.

²⁰ A sa kaya vua ko koya, Mo tu mai na katuba ni vale laca, ia kevaka sa na lako mai e dua na tamata ka tarogi iko, Sa tiko li eke e dua na tamata? mo qai kaya, E segai.

²¹ A sa taura ko Jaeli na wati i Eperi e dua nai vakadei ni vale laca, a sa taura e ligana e dua nai tukituki, ka lako lo vua, ka tukia nai vakadei ki na nona kanavalavala, ka cokavaka ki na qele: ni sa moce lutu bibi ko koya ka oca. A sa mate sara kina.

²² Ka raica, ni sa cicimuri Sisira tiko ko Peraki, sa curu ki tuba ko Jaeli me tavaki koya, ka sa kaya vua, Mo lako mai, au na vakatakila vei iko na tamata ko sa qara. Ia ni sa curu vua, raica, sa davo no ka sa mate ko Sisira, a sa tiko e na nona kanavalavala nai vakadei.

²³ A sa vakamalumalumutaki Japini na tui Kenani na Kalou e na siga ko ya, e matadra na Isireli.

²⁴ A sa kaukauwa cake tiko na ligadra na Isireli, ni ra vala kei Japini na tui Kenani, ka me ra vakarusai Japini na tui Kenani.