Dauveilewai 3 - Vakavakadewa Makawa

A veimatanitu sa vo tiko me ra vakatovolei kina ko ira na Isireli, 1-4. Sa vakawati kei ira ko ira na Isireli, ka ra ca kina, ka ra sa soli vei ira na nodra meca, 5-8. Sa vakabulai ira ko Ocinieli, 9-11. Era sai valavala ca tale, ka ra sa soli tale vei ira na nodra meca, 12-14. Sa vakabulai ira ko Eute, ka mokuti ira na nodra meca, 15-30. Sa vakabulai ira ko Samikari talega e na dua na gauna, 31.

¹ Ia ko ira oqo na veimatanitu ka laiva ko Jiova, me vakatovolei ira kina na Isireli, io ko ira kece era a sega ni kila nai valu kecega mai Kenani;

² me ra kila ga kina ko ira na nodra veitabatamata na Isireli, ka me ra vuli e nai valu ko ira era a sega ni kila eliu:

³ E lewe lima na nodra turaga na kai Filisitia, kei ira kecega na kai Kenani, kei ira na kai Saitoni, kei ira na Aivaiti era tiko mai na ulu-ni-vanua ko Lepanoni, mai na ulu-ni-vanua ko Peali-erimoni ka yaco ki nai curucuru ki Emaci.

⁴ Ia ko ira oqo me ra vakatovolei kina na Isireli, me kilai se ra na vakarorogo, se segai, ki nai vakaro i Jiova, sa vakarota ko koya vei ira na nodra qase e na gusu i Mosese.

⁵ Ia ko ira na Isireli era sa tiko ga e na kedra maliwa na kai Kenani, kei ira na Itaiti, kei ira na Amoraiti, kei ira na Perisaiti, kei ira na Aivaiti, kei ira na Jepusaiti,

⁶ ka ra sa vakawati kei ira na nodra goneyalewa, ka ra musuki ira na nodra goneyalewa kivei ira na luvedra, a ra sa qarava na nodra kalou.

⁷ Ia era sa kitaka na ka ca e na mata i Jiova ko ira na Isireli, ka guilecavi Jiova na nodra Kalou, ka qaravi ira na Peali kei ira na kalouyalewa ni veikau.

⁸ A sa waqa kina na cudru i Jiova vei ira na Isireli, a sa volitaki ira ko koya ki na liga i Kusani-risaceimi na tui Mesopotemia: a ra sa qali kivei Kusani-risaceimi ko ira na Isireli ka yabaki walu.

⁹ Ia ni ra sa tagi vei Jiova ko ira na Isireli, sa vakatubura vei ira na Isireli e dua nai vakabula ko Jiova, ka vakabulai ira, io ko Ocinieli na luve i Kinasi, na taci i Kelepi.

¹⁰ A sa tiko vei koya na Yalo i Jiova, a sa lewai ira na Isireli ko koya, ka la'ki veivala: a sa soli Kusani-risaceimi na tui Mesopotemia ko Jiova ki na ligana; a sa gumatua na ligana vei Kusani-risaceimi.

¹¹ A sa vakacegu na vanua ka yabaki vasagavulu. A sa mate ko Ocinieli na luve i Kinasi.

¹² A ra sa kitaka tale na ka ca e na mata i Jiova ko ira na Isireli: a sa vakaukauwataki Ekiloni na tui Moapi ko Jiova, me veivala kei ira na Isireli, ni ra sa caka ca e na mata i Jiova.

¹³ A sa kauti ira na luve i Amoni kei Amaleki ko koya me nonai to, ka sa la'ki mokuti ira na Isireli, ka ra sa mai taukena na koro ni veibalabala.

¹⁴ A ra sa qali vei Ekiloni na tui Moapi ko ira na Isireli ka yabaki tinikawalu.

¹⁵ Ia ni ra sa tagi vei Jiova ko ira na Isireli, sa vakatubura ko Jiova e dua na nodra i vakabula ko Eute na luve i Kira, e na mataqali i Penijamini, a tamata sa ligai mawi: a sa talai koya ko ira na Isireli me kauta e dua na ka ni loloma vei Ekiloni na tui Moapi.

¹⁶ A sa cakava ko Eute e dua na nonai seleiwau bati rua e dua na kiupiti na kena balavu, a sa vauca ki na dibina i matau, e ruku ni nonai sulu.

¹⁷ A sa kauta ko koya na ka ni loloma vei Ekiloni na tui Moapi: a sa tamata levulevu sara ko Ekiloni.

¹⁸ Ia ni sa solia oti ko koya na ka ni loloma, sa talai iratou yani na tamata eratou a kauta mai na ka ni loloma.

¹⁹ Ia sa lesu tale ko koya mai na veimatakau sa tu mai Kilikali, ka sa kaya, Kemuni na tui, sa dua na ka vei au me'u tukuna vuni vei kemuni; sa qai kaya ko koya, Dou tiko lo. A ra sa lako tani ki tautuba ko ira kecega era tu vata kaya.

²⁰ A sa toro vei koya ko Eute; a sa tiko duaduaga ko koya e na nona vale vakamudremudre. A sa kaya ko Eute, Sa tu vei au na vosa ni Kalou me'u tukuna vei kemuni. A sa tu cake ko koya mai na nonai tikotiko vakaturaga.

²¹ A sa taura e na ligana i mawi ko Eute, nai seleiwau mai na dibina i matau, ka suaka na ketena:

²² a sa yali ki loma na yamena kei na kena dia, ni sa bulu na yamena e na uro, ka sa sega ni cavuta rawa ko koya nai seleiwau mai na ketena: a sa basika yani ki muna.

²³ A sa curu yani e na varada ki tautuba ko Eute, ka sogota na katuba ni vale, ka vakitaki koya ki loma.

²⁴ Ia ni sa lako yani ko koya, era sa lako mai na nona tamata, a ra sa raica, sa vakitaki tu na katuba ni vale; a ra sa kaya, Sa vakara beka ko koya e na vale vakamudremudre.

²⁵ Ia era sa madua ni ra wawa vakadede; ka raica, sa sega ni dolava ko koya na katuba ni vale; era sa qai taura e dua nai dola, ka dolava: ka raica, sa bale koto na nodra turaga ki na qele, a sa mate.

²⁶ Ia ni ra sa berabera tiko, sa dro ko Eute, ka sivia na veimatakau, ka dro ki Seiraci.

²⁷ Ia ni sa yaco kina ko koya, sa uvuca na davui e na ulu-ni-vanua ko Ifireimi, a sa lako sobu kaya ko ira na Isireli mai na ulu-ni-vanua, a sa liutaki ira ko koya.

²⁸ A sa kaya vei ira ko koya, Dou muri au mai, ni sa soli ira na nomudou meca na Moapi ki na ligamudou ko Jiova. A ra sa muri koya sobu, ka rawata na veivutovuto ni Joritani vaka ki Moapi, ka sega ni laiva e dua na tamata me vutokosova.

²⁹ A ra sa mokuti ira na Moapi, e na gauna ko ya, e le tini beka na udolu na tamata, era tamata bula sara kecega, ka tamata qaqa kecega, ia ka sega ni dro bula e dua na tamata.

³⁰ A sa vakamalumalumutaki ko ira na Moapi e na ligadra na Isireli e na siga ko ya. A sa vakacegu na vanua ka yabaki walusagavulu.

³¹ A sa taravi koya ko Samikari na luve i Anaci, ia sa mokuta ko koya e le ono na drau vei ira na kai Filisitia, e na moto ni pulumokau: ia ko koya talega sa vakabulai ira na Isireli.