Dauveilewai 21 - Vakavakadewa Makawa

Sa tagicaki na mataqali i Penijamini, 1-7. Sa moku na kai Jepesi-kiliati, ka sa soli na nodra goneyalewa me watidra na Penijamini, 8-15. Sa soli talega ko ira na goneyalewa ka meke e na so levu mai Sailo, me watidra na Penijamini, 16-25.

¹ Ia sa bubului oti mai Misipe ko ira na Isireli, ka kaya, Ena sega e dua vei keda me solia na luvena yalewa vei ira na Penijamini me watidra.

² A ra sa lako mai na tamata ki na vale ni Kalou, ka tiko kina e na mata ni Kalou, ka yakavi mai, a ra sa tagi vakadomoilevu sara,

³ ka ra kaya, I Jiova na Kalou ni Isireli, sa yaco mei cavai na ka oqo e Isireli, me yali e na siga oqo e dua na nodra mataqali na Isireli?

⁴ Ia sa sou e na mataka ko ira na tamata, ka cakava maikea e dua nai cabocabo-ni-soro, ka vakacabora eso nai soro kama ka so nai soro ni veivinakati.

⁵ A ra sa kaya na Isireli, O cei e na mataqali kecega ni Isireli sa sega ni lako cake kei ira nai soqosoqo kivei Jiova? Ni sa dua na nodra bubului bibi e na vuku i koya sa sega ni lako cake kivei Jiova ki Misipe, ka vaka, Ena mate vakaidina ko koya.

⁶ A sa veivutuni ko ira na Isireli e na vukudra na Penijamini na wekadra, ka kaya, Sa muduki edaidai e dua na mataqali mai Isireli:

⁷ a cava me da kitaka me ra vakawati kina ko ira sa vo, ni da sa bubului oti vei Jiova, ni da na sega ni soli ira na noda goneyalewa me watidra?

⁸ A ra sa kaya, O cei vei ira na veimataqali ni Isireli sa sega ni lako cake vei Jiova ki Misipe? Ka raica, sa sega e dua sa lako mai Jepesi-kiliati ki nai tikotiko ni sa ia na soqoni vata.

⁹ Ia ni ra sa wili na tamata, sa sega vei ira na kai Jepesi-kiliati sa tiko kina.

¹⁰ Ia ko ira nai soqosoqo, era sa tala e le tinikarua na udolu na tamata maivei ira na tamata qaqa, ka vakarota vei ira, ka kaya, Dou la'ki yaviti ira na kai Jepesi-kiliati e nai seleiwau, ko ira vata kei na yalewa kei na gone:

¹¹ ia na ka oqo mo dou cakava, Dou na vakamatea sara na tagane kecega, kei na yalewa kecega sa veiyacovi kei na tagane.

¹² A ra sa kunea vei ira na kai Jepesi-kiliati e le va na drau na goneyalewa era sa sega ni veiyacovi kei na tagane: a ra sa kauti ira ki nai tikotiko ki Sailo, mai na vanua ko Kenani.

¹³ Ia sa talatala ko ira nai soqosoqo taucoko vei ira na Penijamini era tiko mai na uluvatu ko Rimoni, ka kacivaka vei ira na sautu.

¹⁴ A sa lesu tale mai ko ira na Penijamini e na gauna ko ya; a ra sa solia vei ira na yalewa, era a vakabula maivei ira na yalewa ni Jepesi-kiliati: ia sa sega ga ni rauti ira.

¹⁵ A ra sa veivutuni ko ira na tamata e na vukudra na Penijamini, ni sa vakalutuya sobu na veimataqali ni Isireli ko Jiova.

¹⁶ Sa qai kaya ko ira na nodra qase nai soqosoqo, A cava me da cakava e na vukudra sa vo, me ra vakawati, ka ni sa yali na yalewa vei ira na Penijamini?

¹⁷ A ra sa kaya, Nai votavota i Penijamini me sa nodra tiko era sa dro bula, me kakua ni kawaboko e dua na mataqali maivei ira na Isireli:

¹⁸ ia koi keda, eda sa sega ni solia rawa me watidra na noda goneyalewa; ni ra sa bubului oti ko ira na Isireli, ka kaya, Me ca ko koya sa solia e dua me watina na Penijamini.

¹⁹ Era sa qai kaya, Raica sa dua na soqoni levu vei Jiova mai Sailo e na veiyabaki, mai na yasa i Peceli ki na tokalau, e na batina ki na tu-i-cake ni salatu sa lako cake mai Peceli ki Sikemi, ka vaka ki na ceva ki Lipona.

²⁰ A ra sa vakaroti ira na Penijamini, ka kaya, Dou la'ki lawa koto e loma ni veiwere-ni-vaini;

²¹ ka raica mada se ra sa lako mai ki nai bili na goneyalewa ni Sailo me ra ia na meke, ia dou qai lako mai na veiwere-ni-vaini, ka taura yadua na watina maivei ira na goneyalewa ni Sailo, ka lako yani ki na nodra vanua na Penijamini.

²² Ia ni ra na lako mai na tamadra, se na ganedra, me beitaki kemudou kina vei keimami, keimami na qai kaya vei ira, Dou yalololoma ga vei ira, e na vukuimami: ni keimami a sega ni taura bula e nai valu na yalewa, me watidra yadua; ka ni dou sa sega ni solia na luvemudou vei ira, mo dou cala kina.

²³ A ra sa kitaka vakakina ko ira na Penijamini, ka ra kauta me watidra me rauti ira, maivei ira era sa meke, o ira era a drotaka: a ra sa lesu tale ki na nodra i votavota, ka tara na koro eso, ka tiko kina.

²⁴ A ra sa lako tani maikea ko ira na Isireli e na gauna ko ya, na tamata yadua ki na nona mataqali, kei na nona vuvale, a ra sa lako tani maikea na tamata yadua ki na nonai votavota.

²⁵ E na gauna ko ya sa sega na tui vei ira na Isireli: era sa dui kitaka na tamata yadua na ka sa vinakata ko koya.