Dauveilewai 2 - Vakavakadewa Makawa

Sa vunauci ira na Isireli na agilose mai Pokimi, 1-5. Era sa qaravi Jiova ni sa bula tiko ko Josua kei ira na qase erai tabatamata vata kaya, 6-9; era sa qai biuti Jiova, 10-13. A cudru kei na loloma i Jiova vei ira, 14-19. Sa qai sega ni vukei ira tale ko Jiova, 20-23.

¹ A sa lako cake ko koya na agilose i Jiova mai Kilikali ki Pokimi, ka kaya, Au a kauti kemudou cake mai Ijipita, ka kauti kemudou ki na vanua ka'u a bubului kina vei ira na nomudou qase; ia ka'u a kaya, Au na sega ni biuta na noqu veiyalayalati kei kemudou, ka sega ni mudu:

² ia koi kemudou, dou kakua ni ia na veiyalayalati kei ira na lewe ni vanua oqo; dou na talaraka sobu na nodra i cabocabo-ni-soro; ia dou sa sega ni muria na noqu vosa: a cava dou sa cakava kina na ka oqo?

³ Ia ka'u a kaya talega kina, Ka'u na sega ni vakasevi ira tani e na matamudou; ia era na vaka na voto ni kau ki na sarisarimudou, ia na nodra kalou dou na temaki kina.

⁴ Ia ni sa vosataka oti na vosa oqo ko koya na agilose i Jiova, kivei ira kecega na Isireli, era sa qai tabalaka cake na domodra ko ira na tamata, ka tagi.

⁵ A ra sa vakatoka na yaca ni tikina ko ya ko Pokimi [Ko ira era sa tagi]: a ra sa vakacabora maikea eso nai soro kivei Jiova.

⁶ Ia ni sa vakatalai ira na tamata ko Josua, era sa dui lako ko ira na Isireli ki na nonai votavota me ra taukena na vanua.

⁷ A ra sa qaravi Jiova ko ira na tamata e na gauna kecega sa bula kina ko Josua, kei na nodra gauna kecega na qase era sa bula tiko ni sa mate ko Josua, era sa raica oti na cakacaka levu kecega sa kitaka ko Jiova e na vukudra na Isireli.

⁸ A sa ciba nai talatala i Jiova ko Josua, na luve i Nuni, ni sa dua na drau ka tini na nona yabaki.

⁹ A ra sa buluti koya e nai yalayala ni nonai votavota mai Timinaca-eresi, mai na ulu-ni-vanua ko Ifireimi, e na ulu-ni-vanua ko Keasi vaka ki na tokalau.

¹⁰ A ra sa toki kivei ira na nodra qase ko ira kece talega nai tabatamata ko ya. A sa tubu cake e dua tani nai tabatamata emuri, era sa sega ni kilai Jiova, se na cakacaka ka kitaka ko koya e na vukudra na Isireli.

¹¹ A ra sa kitaka na ka ca e na mata i Jiova ko ira na Isireli, ka qaravi ira na Peali:

¹² ia era sa biuti Jiova, na Kalou ni nodra qase, o koya ka kauti ira mai na vanua ko Ijipita, a ra sa muria eso na kalou tani mai na nodra veikalou na tamata era tiko vakavolivoliti ira, a ra sa cuva vei ira, ka vakacudrui Jiova.

¹³ Ia era sa biuti Jiova, ka qaravi Peali kei Aseteroci.

¹⁴ A sa waqa vei ira na Isireli na cudru i Jiova, ka sa soli ira ko koya ki na ligadra na dauvakacaca, ka ra vakacacani ira, a sa volitaki ira ko koya ki na ligadra na nodra meca era sa tiko vakavolivoliti ira; a ra sa sega tale ni tu rawa kina e matadra na nodra meca.

¹⁵ E na yasana kecega e ra sa lako yani kina, sa veimecaki kei ira na liga i Jiova me ra ca kina, me vaka ka kaya ko Jiova, ia me vaka ka bubului kina vei ira ko Jiova: a ra sa vakaloloma sara.

¹⁶ Ia sa vakatubura vei ira ko Jiova eso na dauveilewai, era vakabulai ira mai na ligadra era sa dauvakacacani ira.

¹⁷ Ia era sa sega ga ni vakarorogo kivei ira na nodra dauveilewai, ka ra sa lako vakatani ga ka muria eso na kalou tani, a ra sa cuva vei ira: era sa vuki kusarawa mai na sala era a lako kina ko ira na nodra qase, era a talairawarawa ki na vunau i Jiova: ia era sa sega ni cakacaka vakakina.

¹⁸ Ia ni sa vakatubura vei ira ko Jiova eso na dauveilewai, sa tiko vata kaya na dauveilewai ko Jiova, ka sa vakabulai ira mai na ligadra na nodra meca e na gauna kecega ni dauveilewai: ni sa veivutuni ko Jiova e na vuku ni nodra vuturi e na matadra era dauvakacacani ira ka dauvakararawataki ira.

¹⁹ Ia ni sa mate na dauveilewai, era sa qai vuki tale, ka uasivi ira na nodra qase e na ca, ni ra muria eso na kalou tani me ra qaravi ira, ka cuva vei ira; era sa sega ni vakacegu mai na nodra i valavala, kei na nodra i tovo vakalomaqa.

²⁰ A sa waqa vei ira na Isireli na cudru i Jiova, ka sa kaya ko koya, Ni ra sa vakacataka na noqu veiyalayalati na tamata oqo, o koya ka'u a vakaroti ira kina na nodra qase, ka sa sega ni vakarorogo ki na noqu vosa,

²¹ au na sega talega ni vakaseva tani e matadra e dua vei ira na veimatanitu ka vo tiko ni sa mate ko Josua:

²² me'u vakatovolei ira kina na Isireli, se ra na vakabauta nai vakaro i Jiova ka muria, me vaka era vakabauta ko ira na nodra qase, se segai.

²³ Ia sa vosota na veimatanitu oqori ko Jiova, ka sa sega ni vakasevi ira vakusarawa; sa sega talega ni soli ira ki na liga i Josua.