Dauveilewai 18 - Vakavakadewa Makawa

Sa qara e dua na vanua me nodra ko ira na mataqali i Tani, 1-10. Sa lako na nodra i valu, ka butakoca na ka nei Maika, ka kaba na koro ko Leisi, 11-28. Era sa qarava na matakau i Maika, 30,31.

¹ Ena gauna ko ya sa sega na tui vei ira na Isireli. Ia e na gauna ko ya sa qara e dua nai votavota me nodra me ra tiko kina ko ira na mataqali i Tani; ni sa sega ni rawa vei ira na nodra i votavota e na kedra maliwa na veimataqali i Isireli, ka yacova na gauna ko ya.

² A ra sa tala ko ira na Tani e le lima na tamata e na nodra mataqali mai na nodra i yalayala, eratou sa tamata qaqa, mai Sora, kei Esitaoli, me ratou la'ki rai vanua, ka kila vakavinaka; a ra sa kaya vei iratou, Dou la'ki raica vakavinaka na vanua: a ratou sa lako yani ki na ulu-ni-vanua ko Ifireimi, ki na vale i Maika, a ratou sa moce kina.

³ Ni ratou sa voleka ki na vale i Maika, eratou sa kila na domo ni cauravou, o koya na Livai: a ratou sa curu kina, ka kaya vua, O cei sa kauti iko mai ki ke? ka cava ko sa kitaka eke? ka cava sa rawa vei iko eke?

⁴ A sa kaya vei iratou ko koya, Sa kitaka vakaoqo ga vei au ko Maika, a sa voli au me'u tiko kaya, ia ka'u sa nona bete.

⁵ A ratou sa kaya vua, Mo taroga mada vei koya na Kalou, me keitou kila kina se na vinaka na ka keitou sa lako kina, se segai.

⁶ A sa kaya vei iratou ko koya na bete, Dou lako ga e na vakacegu: sa tu e na mata i Jiova na sala dou sa lako kina.

⁷ Eratou sa qai lako na tamata e lewe lima, a ratou sa lako mai ki Leisi; a ratou sa kunea na tamata era sa tiko kina, ni ra sa tiko wele ga, me vaka na nodra tiko na kai Saitoni, era tiko vakacegu ka wele ga; a sa sega e dua sa kaukauwa me vakacacana e dua e na dua na ka; a ra sa tiko veiyawaki kei ira na kai Saitoni, ka ra sa sega ni veilakovi kei ira na tamata tani.

⁸ A ratou sa lesu mai vei ira na wekadra ki Sora kei Esitaoli: a ra sa kaya vei iratou ko ira na wekadra, Sa vakaevei koi kemudou?

⁹ A ratou sa kaya, Tou ia, me da lako cake ka vala kei ira: ni keitou sa raica oti na vanua, ka sa vinaka sara: ia dou sa wele tiko? mo dou kakua ni vucesa mo dou lako mo dou taukena na vanua.

¹⁰ Ni dou sa lako kina, dou na yaco vei ira na tamata era tiko wele ga, ia sa dua na vanua levu: ni sa solia ki na ligamudou ko koya na Kalou; a vanua sa sega ni dravudravua e na dua na ka sa tiko e vuravura.

¹¹ A ra sa cavu tu maikea e le ono na drau na tamata e na mataqali i Tani, mai Sora, kei Esitaoli, era sa vakaiyaragi tu me ia nai valu.

¹² A ra sa lako cake, ka tiko mai Kiriaci-jiarimi mai Juta; o koya era sa vakatoka kina na yasana ko ya ko Meene-tani, ka yacova na siga oqo: raica, sa koto mai na daku i Kiriaci-jiarimi.

¹³ A ra sa lako yani maikea ki na ulu-ni-vanua ko Ifireimi, ka yaco ki na vale i Maika.

¹⁴ A ratou sa vosa ko iratou na tamata limalima, eratou a la'ki raica na vanua ko Leisi, ka kaya vei ira na wekadratou, Dou sa kila beka ni sa tiko e na veivale oqo e dua na efoti, ka so na matakau, ka dua na matakau ceuceu, ka dua na matakau vakawaicalataki? ia oqo, dou lewa mada na ka mo dou cakava.

¹⁵ A ra sa gole kina, ka lako ki na nona vale na cauravou, na Livai, io ki na vale i Maika, a ra sa veikidavaki kaya.

¹⁶ Ia sa tu mai na matamata-ni-koro ko ira na tamata e lewe ono na drau vei ira na mataqali i Tani, o ira era sa vakaiyaragi tu e nai yaragi ni valu.

¹⁷ Ia eratou sa lako cake na tamata limalima, eratou a la'ki raica na vanua; ka ratou sa curu kina; ka kauta na matakau ceuceu, kei na efoti, kei na veimatakau tani kei na matakau vakawaicalataki; ia sa tu mai na matamata-ni-koro na bete, kei ira na tamata e lewe ono na drau era sa vakaiyaragi tu e nai yaragi ni valu.

¹⁸ Ia ko iratou oqo, eratou sa curu ki na vale i Maika, ka kauta maikina na matakau ceuceu, na efoti, kei na matakau vakawaicalataki, kei na veimatakau tani. Sa qai kaya vei iratou ko koya na bete, A cava dou sa cakava?

¹⁹ A ratou sa kaya vua, Mo tiko lo, mo tabonaka na gusumu e na ligamu, ka mo lako vata kei keimami, mo neimami qase, kei na neimami bete: sa vinaka li vei iko mo bete ki na vale ni tamata e le dua ga, se mo bete ki na dua na mataqali, ka dua na matavuvale, vei ira na Isireli?

²⁰ A sa reki na yalona na bete, a sa kauta ko koya na efoti, kei na matakau ceuceu, kei na veimatakau tani, ka lako e na kedra maliwa na tamata.

²¹ A ra sa lesu ka lako yani, ka lewa me liu vei ira na gone lalai kei na manumanu e yavai va kei na kamunaga.

²² Ia ni ra sa veiyawaki sara kei na vale i Maika, era sa soqoni vata na tamata era sa tiko e na veivale sa voleka ki na vale i Maika, a ra sa la'ki vauci ira na Tani.

²³ A ra sa kaci yani vei ira na Tani. A ra sa rai vuki, ka kaya vei Maika, Ko sa vakaevei ni dou sa soqoni vata mai?

²⁴ A sa kaya ko koya, Dou sa kauta tani na noqu kalou ka'u a cakava, kei na bete, ka dou sa lako tani; ka cava tale sa tu vei au? ia ka cava dou sa taroga kina vei au, A cava sa manati iko?

²⁵ A ra sa kaya vua ko ira na Tani; Me kakua ni rogo vei keimami na domomu, de so na tamata cudru sa cici yani vei kemudou, ka dou mate kina ko iko kei ira na nomu lewe-ni-vale.

²⁶ A ra sa lako ga yani ko ira na Tani: ia ni sa raica ko Maika era sa kaukauwa ka sa malumalumu ko koya, sa lesu tale ko koya ki na nona vale.

²⁷ A ra sa kauta na ka ka cakava ko Maika, kei na nona bete talega; a ra sa lako ki Leisi, kivei ira na lewe ni vanua era sa vakacegu, ka tiko wele ga: a ra sa yaviti ira e nai seleiwau, ka vakama na koro.

²⁸ A sa sega e dua me vakabula, ni rau sa veiyawaki kei Saitoni, a ra sa sega ni veilakovi kei ira na tamata tani; a sa koto oqori e na buca mai Peci-riopi. A ra sa tara na koro, ka tiko kina.

²⁹ A ra sa vakatoka na yaca ni koro ko Tani, me vaka na yaca i Tani na nodra qase o koya ka luve i Isireli: ia na yaca ni koro koya eliu ko Leisi.

³⁰ A ra sa vakaduria cake me nodra, na matakau ceuceu ko ira na Tani: ia ko Jonacani, na luve i Kerisomi, na luve i Mosese, o koya kei ira na luvena, era sa bete ki na mataqali i Tani ka yacova na siga sa vakabobulataki kina na vanua.

³¹ A ra sa vakaduria cake na matakau ceuceu i Maika, ko ya ka cakava ko koya, me nodra e na gauna kecega sa tiko kina mai Sailo na vale ni Kalou.