Dauveilewai 17 - Vakavakadewa Makawa

Ai tukutuku kei Maika, kei na nona matakau.

¹ Sa dua na tamata mai na ulu-ni-vanua ko Ifireimi na yacana ko Maika.

² A sa kaya vua na tinana ko koya, A tiki ni siliva e dua na udolu ka dua na drau, sa kau tani mai vei iko, na ka ko a bubului kina, ka vosa talega kina vei au, raica, sa tu vei au na siliva; sai au ga ka kauta. A sa kaya ko tinana, Me vakalougatataki iko na luvequ ko Jiova.

³ Ia sa vakasuka ko koya vei tinana na tiki ni siliva io e dua na udolu ka dua na drau, a sa kaya ko tinana, Au sa vakacabora oti vakaidina na siliva vei Jiova mai na ligaqu me nei luvequ, me caka kina e dua na matakau ceuceu ka dua na matakau vakawaicalataki: ia oqo, au na vakasuka tale vei iko.

⁴ Ia ni sa vakasuka ko koya na siliva vua na tinana, sa taura ko tinana e rua na drau na tiki ni siliva, ka solia vua na kena matai, a sa cakava kina ko koya e dua na matakau ceuceu ka dua na matakau vakawaicalataki: a sa tu ga e na vale i Maika.

⁵ A sa dua na nona bure kalou na tamata ko ya ko Maika, a sa cakava ko koya e dua na efoti, ka so na matakau, a sa bulia e dua na luvena me nona bete ko koya.

⁶ E na gauna ko ya sa sega na tui vei ira na Isireli; era sa dui cakava ko ira na tamata yadua na ka sa vinakata ko koya.

⁷ A sa dua na cauravou mai Pecileema nei Juta, e na mataqali i Juta; e dua vei ira na Livai ko koya, a sa tiko vulagi maikea.

⁸ A sa lako na tamata ko ya mai na koro ko Pecileema nei Juta me la'ki tiko vulagi e na dua na vanua ena kunea: ia ni sa lako tu sa yaco ki na ulu-ni-vanua ko Ifireimi, ki na vale i Maika.

⁹ A sa kaya vua ko Maika, O sa lako maivei? A sa kaya vua ko koya, Koi au na Livai mai Pecileema nei Juta, ia ka'u sa lako tu me'u tiko vulagi e na dua na vanua ka'u na kunea.

¹⁰ A sa kaya vua ko Maika, Mo tiko ga kei au, mo tamaqu ka mo noqu bete, ia ka'u na solia vei iko e tini na tiki ni siliva e na veiyabaki, kei nai sulu me rauti iko, kei na kemu. A sa tiko na Livai.

¹¹ A sa vinakata na Livai me tiko kaya na tamata; a sa vaka e dua na luvena ko koya na cauravou.

¹² A sa bulia na Livai ko Maika, a sa yaco na cauravou me nona bete, a sa tiko e na vale i Maika.

¹³ Sa qai kaya ko Maika, Au sa qai kila, ni na caka vinaka vei au ko Jiova, ni sa noqu bete e dua na Livai.