Dauveilewai 16 - Vakavakadewa Makawa

Ai valavala i Samisoni mai Kesa, 1-3. A nodra vere na kai Filisitia, era sa rawai koya kina, 4-21. Sa kaukauwa tale ko Samisoni, ka sa mate vata kei ira na kai Filisitia, 22-31.

¹ Sa qai lako ki Kesa ko Samisoni, ka raica kina e dua na yalewa dautagane, ka sa curu vua.

² Sa tukuni vei ira na kai Kesa, Sa curu mai ki ke ko Samisoni. A ra sa vakavolivolita, ka lawa koto vua e na bogi ka sigavaka, mai na matamata-ni-koro, a ra sa tiko lo e na bogi, ka kaya, Ni sa rarama e na mataka, eda na vakamatei koya.

³ A sa davo koto ko Samisoni ka lomaloma-ni-bogi; ia ni sa lomaloma-ni-bogi sa cavu tu, ka taura nai sogo ni matamata-ni-koro, kei na kena duru ruarua, ka cavuta tani, kei nai samugakagaka talega, ka viria ki na nonai colacola, ka colata cake ki na dela ni ulu-ni-vanua sa donui Epironi.

⁴ Ia emuri, sa lomana ko koya e dua na yalewa, na yacana ko Tilaila, mai na buca ko Soreki.

⁵ A ra sa lako cake mai vua ko ira na turaga ni kai Filisitia, ka kaya vua, Mo temaki koya, mo kila kina se cava na vuna na nona kaukauwa levu, ka cava na ka keitou na rawai koya kina, me keitou vesuki koya ka vakamalumalumutaka: ia koi keitou yadua keitou na solia vei iko e dua na udolu ka dua na drau na tiki ni siliva.

⁶ A sa kaya vei Samisoni ko Tilaila, Mo tukuna mada vei au, se cava ka vu ni nomu kaukauwa levu, ka cava ko na vesuki rawa kina mo malumalumu mai.

⁷ A sa kaya vua ko Samisoni, Kevaka era sa vesuki au e na dali vau drokadroka e vitu, sa segai ni sigani oti, au na qai malumalumu, ka'u na tautauvata kei na tamata walega.

⁸ A ra sa kauta vua ko ira na turaga ni kai Filisitia e vitu na dali vau drokadroka, sa sega ni sigani oti, a sa vesuki koya kina ko koya.

⁹ Ia sa tiko kaya e na vale ni moce eso era lawa koto. A sa kaya vua ko koya, I Samisoni, era sa sikiti iko na kai Filisitia. A sa drutia na dali vau ko koya, me vaka sa drutilaki na wavulovulo ni sa coroga na bukawaqa. A sa sega ni kilai tu na nona kaukauwa.

¹⁰ A sa kaya vei Samisoni ko Tilaila, Raica, ko sa vakalialiai au ga, ka vosa lasu vei au: mo tukuna mada mai vei au oqo se cava ko na vesuki rawa kina.

¹¹ A sa kaya vua ko koya, Kevaka era sa vesuki au e na dali vou eso, sa sega ni taurivaki oti, au na qai malumalumu, ka'u na tautauvata kei na tamata walega.

¹² A sa kauta eso na dali vou ko Tilaila, ka vauci koya kina, ka kaya vua, I Samisoni, era sa sikiti iko na kai Filisitia. A sa tiko e na vale ni moce ko ira sa lawa koto. A sa drutilaka ko koya mai na ligana me vaka na wa ni culacula.

¹³ A sa kaya vei Samisoni ko Tilaila, O sa vakalialiai au tikoga, ka yacova na siga oqo, ka vosa lasu vei au: mo tukuna mada vei au se cava ko na vauci rawa kina. A sa kaya vua ko koya, Kevaka ko sa talia vata kei na vulovulo na tobe vituvitu ni uluqu.

¹⁴ A sa vakataudeitaka ko koya e nai vakadei, ka kaya vua, I Samisoni, era sa sikiti iko na kai Filisitia. A sa yadra mai na nona moce ko koya, ka lako yani kei nai vakadei ka tali kina kei na vulovulo.

¹⁵ A sa kaya vua na yalewa, O sa kaya vakacava, Au sa lomani iko, ni sa sega ni tiko dina vei au na yalomu? o sa vakalialiai au vakatolu, ka sa sega ni tukuna mai vei au se cava ka vuna na nomu kaukauwa levu.

¹⁶ Ia ni sa vakasosataki koya e na veisiga kecega ko koya e na nona vosa, ka cikevi koya matua sara, me sa voleka ni ciba kina ko koya;

¹⁷ sa qai tukuna vua ko koya na yalona taucoko, ka kaya vua, Sa sega nai tasi sa tara na uluqu, ni'u sa tawase me nona na Kalou mai na kete i tinaqu; kevaka ka'u sa tasivori, ena qai yali kina vei au na noqu kaukauwa, ia ka'u na malumalumu mai, ka'u na qai tautauvata kei na tamata walega.

¹⁸ Ia ni sa kunea ko Tilaila, ni sa tukuna vua ko koya na yalona taucoko, sa talaki me kacivi ira na turaga ni kai Filisitia, ka kaya, Dou lako vakadua mai oqo, ni sa tukuna vei au ko koya na yalona taucoko. A ra sa lako cake vua ko ira na turaga ni kai Filisitia, ka kauta nai lavo e na ligadra.

¹⁹ A sa vakamoceri koya e na duruna ko koya, a sa kaciva e dua na tamata, ka tasia na tobe vituvitu ni uluna, ka sa vakatekivu me vakamalumalumutaki koya, ka sa lako tani vua na nona kaukauwa.

²⁰ A sa kaya ko koya, I Samisoni, era sa sikiti iko na kai Filisitia. A sa yadra mai na nona moce ko koya, ka kaya, Au na curu yani oqo me vaka ka'u sa daukitaka, ka'u na vakurekure au mada. Ia sa sega ni kila ni sa lako tani vua ko Jiova.

²¹ A ra sa tauri koya ko ira na kai Filisitia; ka leuta na matana, ka kauti koya sobu ki Kesa, ka vesuka e nai vesu parasa; a sa dauqaqi sila ko koya e na vale ni veivesu.

²² A sa tubu tale na drau ni uluna, ni sa tasivori oti.

²³ Ia sa soqoni vata ko ira na turaga ni kai Filisitia, me ra vakacabora e dua nai madrali levu vei Tekoni na nodra kalou, ka me ra reki; a ra sa kaya, Sa solia na noda kalou na noda meca ko Samisoni ki na ligada.

²⁴ Ia ni ra sa kunei koya ko ira na tamata, era sa vakacaucautaka na nodra kalou, ka kaya, A noda kalou sa solia na noda meca ki na ligada, o koya ka vakacacana talega na noda vanua, ka mokuti ira e lewe vuqa vei keda.

²⁵ Ia ni sa reki na yalodra, era sa kaya, Me kacivi ko Samisoni, me mai vakadredretaki keda. A ra sa kacivi Samisoni mai na vale ni veivesu; a ra sa dredrevaka ni sa tu e matadra ko koya; a ra sa vakatikora e na tadrua ni bou.

²⁶ A sa kaya ko Samisoni vua na cauravou sa tubera na ligana, Laivi au mada me'u tara na veibou sa tu kina na vale, me'u vakararavi mada kina.

²⁷ Ia sa oso na vale e na tagane kei na yalewa; a ra sa tiko kina na turaga kecega ni kai Filisitia; a sa tiko talega e dela ni vale e lewe tolu beka na udolu na tagane kei na yalewa, era sa sarasara tiko ni sa vakavuna na dredre ko Samisoni.

²⁸ A sa masu vei Jiova ko Samisoni, ka kaya, I Jiova na Turaga, mo ni nanumi au, ka vakaukauwataki au mada vakadua ga oqo, na Kalou, me'u cudrutaka vakadua ga na mataqu ruarua vei ira na kai Filisitia.

²⁹ A sa taura ko Samisoni na bou ruarua eloma sa tu kina na vale, a sa mokota e dua na ligana i matau, ka dua e na ligana i mawi.

³⁰ A sa kaya ko Samisoni, Me'u mate vata kei ira na kai Filisitia. A sa cuva vakaukauwa ko koya; ia na vale sa ovaci ira na turaga, kei ira kecega na tamata era tiko kina. A sa lewe lailai sa vakamatea ko koya ni sa bula tiko ka lewe levu sa vakamatea ko koya e na nona mate.

³¹ A ra sa lako sobu na tacina kei ira kece na lewe-ni-vale i tamana, ka colati koya, ka kauta yani, ka buluta e na macawa Sora kei Esitaoli, e nai bulubulu nei Manoa na tamana. A sa lewai ira na Isireli ko koya, ka yabaki ruasagavulu.