Dauveilewai 14 - Vakavakadewa Makawa

Sa via vakawati kaya e dua na yalewa ni Filisitia ko Samisoni, 1-4. Sa vakamatea e dua na laioni, 5-7. Sa kunea emuri na oni e na yago ni laioni, 8,9. A nona vatavatairalago, 10-14; sa kilai maivua na watina na kenai balebale, 15-18. Sa vakamatea e le tolusagavulu na kai Filisitia ko koya, a sa biuta na watina, 19,20.

¹ A sa lako sobu ko Samisoni ki Timinaca, a sa kunea e dua na yalewa mai Timinaca, a luve ni kai Filisitia.

² A sa lako cake ka tukuna vei tamana kei tinana, ka kaya, Au sa kunea e dua na yalewa mai Timinaca, a luve ni kai Filisitia, ia mo drau la'ki rawata me watiqu.

³ A sa kaya vua ko tamana kei tinana, Sa sega beka e dua na yalewa vei ira na nodra goneyalewa na wekamu, se vei ira kecega na kai noqu, ko sa lako kina mo vakawati kei na dua na yalewa maivei ira na kai Filisitia sa sega ni cili? A sa kaya ko Samisoni vei tamana, Mo rawata mada oqo me noqu, ni'u sa vinakati koya sara.

⁴ Ia sa sega ni kila ko tamana kei tinana ni sa vakavuna ko Jiova, ni sa vakananuma ko koya e dua na ka me ra cudruvi kina ko ira na kai Filisitia: ia sa lewai ira na Isireli ko ira na kai Filisitia e na gauna ko ya.

⁵ A ratou sa lako sobu vata ko Samisoni kei na tamana kei tinana, ki Timinaca; a sa yaco ki na veiwere-ni-vaini kei Timinaca, ka raica, sa dua na laioni sa tagi ni sa tavaki koya.

⁶ A sa curumi koya vakaukauwa na Yalo i Jiova, a sa basuraka ko koya me vaka sa basuraka e dua na luve ni me, ka sa sega e dua na ka e ligana: ia sa sega ni tukuna vei tamana se tinana na ka ka cakava.

⁷ A sa lako sobu, ka rau sa veivosaki kaya na yalewa; a sa vinakati koya sara ko Samisoni.

⁸ Emuri sa lako tale ko koya me kauti koya mai, a sa lako vakatikitiki tani me raica na yago ni laioni: ka raica, sa dua na qele ni pi, kei na oni, e na yago ni laioni.

⁹ A sa kauta e ligana, ka kana lako, ka lako mai vei tamana kei tinana, ka solia vei rau, a rau sa kania: a sa sega ni tukuna vei rau ko koya ni sa kauta mai, na yago ni laioni na oni ko ya.

¹⁰ A sa lako sobu na tamana vei koya na yalewa: a sa cakava maikea e dua na solevu ko Samisoni; ni sa dau kenai valavala oqo vei ira na cauravou.

¹¹ Ia ni ra sa raici koya, era sa kauta e tolusagavulu me nonai tokani me ra tiko kaya.

¹² A sa kaya vei ira ko Samisoni, Me'u cavuta mada vei kemudou e dua na vatavatairalago: kevaka dou na vakamacalataka vakadodonu vei au, e na bogi vitu ni sa ia tiko na solevu, ka dou sa dina, au na qai solia vei kemudou e tolusagavulu nai sulu lineni kei nai sulu me rauta vakatolusagavulu:

¹³ ia kevaka dou sa sega ni vakamacalataka rawa vei au, dou na qai solia mai vei au e tolusagavulu nai sulu lineni, kei nai sulu me rauta vakatolusagavulu. A ra sa kaya vua, Cavuta mai na nomu vatavatairalago, me keitou rogoca.

¹⁴ A sa kaya vei ira ko koya, Sa tubu na kakana maivei koya na daukana, A sa tubu na kamikamica mai na kaukauwa. A sa oti e tolu na bogi, ka ra sa sega ni vakamacalataka rawa na vatavatairalago.

¹⁵ Ia e na kenai kavitu ni siga, era sa kaya vua na wati i Samisoni, Mo temaka na watimu, me vakamacalataka vei keitou na vatavatairalago, de keitou vakamai iko kei na vale i tamamu e na bukawaqa: dou sa kacivi keitou beka me vakadravudravuataki keitou? sa sega li ni vakakina?

¹⁶ A sa tagi vei Samisoni na watina, ka kaya, Ko sa cati au ga, ka sega ni lomani au: ko sa cavuta na vatavatairalago vei ira na gonetagane ni kai noqu, ka sa sega ni vakamacalataka vei au. A sa kaya vua ko koya, Raica, au sa sega ni vakamacalataka vei tamaqu se tinaqu, ia me'u vakamacalataka li vei iko?

¹⁷ A sa tagi vua ko koya ka bogi vitu, ni sa ia tiko na nodra so levu: ka sa yaco e na kenai kavitu ni siga, sa vakamacalataka vua ko koya, e na vuku ni nona vakasosataki koya: a sa vakamacalataka ko koya na vatavatairalago vei ira na nodra gonetagane na kai nona.

¹⁸ A ra sa kaya vua na lewe ni koro ko ya e na kenai kavitu ni siga, ni sa bera ni dromu na mata-ni-siga, A cava sa uasivia na kena kamikamica na oni? ka cava sa uasivia na kena kaukauwa na laioni? A sa kaya vei ira ko koya, Kevaka dou a sega ni osivi kei na noqu pulumokau yalewa, Dou a sega ni kilakila rawa na noqu vatavatairalago.

¹⁹ A sa curumi koya vakaukauwa na Yalo i Jiova, a sa lako sobu ko koya ki Asikiloni, ka mokuta e le tolusagavulu na tamata vei ira, ka kauta na nodra i sulu, ka solia me rauti ira era a vakamacalataka na vatavatairalago. A sa tubu na nona cudru, ka sa lako cake ki na vale i tamana.

²⁰ A sa soli na wati i Samisoni vua na nonai tokani, o koya ka nonai tau.