Dauveilewai 13 - Vakavakadewa Makawa

Sai valavala ca ko ira na Isireli, ka ra qai qali vei ira na kai Filisitia, 1. Sa dua na agilose sa tukuna na sucu i Samisoni, 2-7. Sa rairai tale mai na agilose vei Manoa, 8-23. Sa sucu ko Samisoni, 24,25.

¹ A ra sa daucaka ca tale e na mata i Jiova, ko ira na Isireli; a sa soli ira ko Jiova ki na ligadra na kai Filisitia ka yabaki vasagavulu.

² A sa dua na tagane mai Sora, e na mataqali i Tani, na yacana ko Manoa; a sa yava na watina, ka sega ni vakaluvea.

³ A sa rairai vua na yalewa na Agilose i Jiova, ka kaya vua, Raica mada; ko sa yava, ka sega ni vakaluvea: ia ko na kunekune ga, ka vakasucuma e dua na gonetagane:

⁴ ia mo qarauni iko mada, mo kakua ni gunu waini se na yaqona, kakua talega ni kania e dua na ka sa sega ni savasava:

⁵ ia raica, ko na kunekune, ka vakasucuma e dua na gonetagane; ia ena sega ni tasi na uluna: ka ni na tawase me nona na Kalou ko koya na gone ni sa qai sucu: ia ena vakatekivu me vakabulai ira na Isireli mai na ligadra na kai Filisitia.

⁶ A sa lako na yalewa ka tukuna vua na watina, ka kaya, Sa lako mai vei au e dua na tamata ni Kalou, ia sa ka rerevaki sara na kenai rairai, sa vaka nai rairai ni agilose ni Kalou: ia ka'u a sega ni tarogi koya se sa lako maivei, ka sa sega ni tukuna vei au na yacana ko koya:

⁷ ia sa kaya vei au ko koya, Raica, ko na kunekune, ka vakasucuma e dua na gonetagane; ia mo kakua ni gunu waini se na yaqona, kakua talega ni kania e dua na ka sa sega ni savasava: ni na tawase me nona na Kalou ko koya na gone ni sa qai sucu, ka yacova na siga ena mate kina.

⁸ A sa vakamasuti Jiova ko Manoa, ka kaya, Au masuti kemuni, noqu Turaga, me lako tale mada mai vei keirau ko koya na tamata ni Kalou ko ni a tala mai eliu, me mai vakavulici keirau e na ka me caka vua na gone ena sucu mai.

⁹ A sa vakarogoca na vosa i Manoa na Kalou; a sa lako tale mai na agilose ni Kalou vua na yalewa ni sa tiko e na were: ia sa sega ni tiko kaya ko Manoa na watina.

¹⁰ A sa cici kusarawa na yalewa, ka tukuna vua na watina, ka kaya vua, Raica, sa rairai mai vei au ko koya na tamata ka lako mai vei au e na siga ko ya.

¹¹ A sa cavu tu ko Manoa, ka muri watina, ka lako vua na tamata, ka kaya vua, O iko beka na tamata ka vosa vua na yalewa? A sa kaya ko koya, Koi au ga.

¹² A sa kaya ko Manoa, Me yaco ga na nomu vosa: ia me na vakaevei na neirau i valavala vua na gone, ka cava na ka me caka vua?

¹³ A sa kaya vei Manoa na Agilose i Jiova, Na ka kecega ka'u a kaya vua na yalewa, me muria ga ko koya:

¹⁴ me kakua ni kania ko koya e dua na ka sa tubu mai na vaini, me kakua talega ni gunu waini se na yaqona, se kania e dua na ka sa sega ni savasava: me vakabauta ko koya na ka kecega ka'u a vakarota vua.

¹⁵ A sa kaya vua na Agilose i Jiova ko Manoa, Me keirau tarovi kemuni mada me keirau vakarautaka e dua na kemuni luve ni me.

¹⁶ A sa kaya vei Manoa na Agilose i Jiova, Kevaka ko sa tarovi au, ka'u na sega ni kania na nomu kakana, ia kevaka ko sa cakava e dua nai soro kama, mo vakacabora vei Jiova ga. Ni sa sega ni kila ko Manoa ni sai koya na Agilose i Jiova.

¹⁷ A sa kaya vua na Agilose i Jiova ko Manoa, Ko cei na yacamuni, me keirau vakarokoroko vei kemuni ni na yaco na nomuni vosa?

¹⁸ A sa kaya vei koya na Agilose i Jiova, A cava ko sa taroga kina na yacaqu, ni sa vuni?

¹⁹ A sa kauta ko Manoa na luve ni me kei nai madrali laukana, ka vakacabora vei Jiova e na dela ni vatu. A sa cakacaka vakidacala ko koya na agilose; ka sa vakaraica tiko ko Manoa kei na watina:

²⁰ Ka ni sa lako cake tiko na yameyame ni bukawaqa mai nai cabocabo-ni-soro vaka ki lomalagi, sa qai lako cake na Agilose i Jiova e na yameyame ni bukawaqa mai nai cabocabo-ni-soro. A sa raica ko Manoa kei na watina, ka rau sa cuva vakatoboicu ki na qele.

²¹ A sa sega ni rairai tale mai na Agilose i Jiova vei Manoa se vua na watina. Sa qai kila ko Manoa ni sai koya na Agilose i Jiova.

²² A sa kaya vua na watina ko Manoa, Edaru na mate vakaidina, ni daru a raici koya na Kalou.

²³ Ia sa kaya vua na watina, Kevaka sa via vakamatei kedaru ko Jiova, ke sa sega ni vakadonuya na nodaru i soro kama, kei nai madrali laukana, ka sa sega ni vakatakila vei kedaru na ka kecega oqo, ka sega ni tukuna mai vei kedaru edaidai na ka vakaoqo.

²⁴ A sa vakasucuma na gonetagane na yalewa, ka vakatoka na yacana ko Samisoni: a sa tubu cake na gone, ka sa vakalougatataki koya ko Jiova.

²⁵ A sa vakatekivu me vakauqeti koya na Yalo i Jiova mai Meene-tani e na macawa i Sora kei Esitaoli.