Dauveilewai 12 - Vakavakadewa Makawa

Sa ra veileti ka veivala ko Jefica kei ira na Ifireimi, 1-6. Sa ciba ko Jefica, 7. A kedrai tukutuku na turaga-ni-lewa eso, 8-15.

¹ A ra sa kacivi vata na kai Ifireimi, ka lako yani vaka ki na tokalau, a ra sa kaya vei Jefica, A cava ko a lako yani kina me veivala kei ira na luve i Amoni, ka sega ni kacivi keimami me lako vata kei iko? keimami na vakama e na bukawaqa na nomu vale, kei iko talega.

² A sa kaya vei ira ko Jefica, Koi au kei ira na noqu tamata, keimami sa veidre sara kei ira na luve i Amoni; ia ka'u a kacivi kemudou, ia dou a sega ni vakabulai au mai na ligadra.

³ Ia ni'u a raica dou a sega ni ia na veivakabulai, ka'u a bolea sara na mate ka lako yani vei ira na luve i Amoni, a sa soli ira ko Jiova ki na ligaqu: ia ka cava dou sa lako mai kina vei au edaidai, mo dou vala kei au?

⁴ A sa vakasoqoni ira vata kecega na kai Kiliati ko Jefica, ka vala kei ira na Ifireimi: a ra sa mokuti ira na Ifireimi ko ira na kai Kiliati, ni ra sa kaya, Koi kemudou na Kiliati ka se: ka tiko ga e na kedra maliwa na Ifireimi, kei na Manasa, koi kemudou.

⁵ A ra sa rawa eliu na veivutovuto ni Joritani, ko ira na kai Kiliati, era bera ko ira na Ifireimi: ia ni ra sa kaya ko ira na Ifireimi era a dro, Me'u lako yani ki tai kadua, era sa qai taroga vua ko ira na kai Kiliati, Na Ifireimi ko iko, se segai? ia kevaka sa kaya, E segai;

⁶ era sa qai kaya vua, Mo cavuti Jiboleta: a sa cavuti Siboleta ko koya: ni sa gato ko koya: era sa qai tauri koya, ka vakamatea mai na veivutovuto ni Joritani: a sa bale vei ira na Ifireimi e na gauna ko ya e le vasagavulu ka rua na udolu.

⁷ A sa lewai ira na Isireli ko Jefica ka yabaki ono. Sa qai mate ko Jefica na kai Kiliati, a sa bulu e na dua na koro mai Kiliati.

⁸ A sa taravi koya ko Ipisani na kai Pecileema, a sa lewai ira na Isireli.

⁹ A sa le tolusagavulu na luvena tagane, ka sa le tolusagavulu na luvena yalewa, o ira sa tala tani ko koya; a sa kauta mai e le tolusagavulu na goneyalewa me watidra na luvena tagane. A sa lewai ira na Isireli ko koya ka yabaki vitu.

¹⁰ Sa qai mate ko Ipisani, a sa bulu mai Pecileema.

¹¹ A sa taravi koya ko Eloni, e dua vei ira na Sepuloni, me lewai ira na Isireli: a sa lewai ira na Isireli ko koya ka yabaki tini.

¹² A sa mate ko Eloni, e dua vei ira na Sepuloni, a sa bulu mai Eijaloni e na vanua nei Sepuloni.

¹³ A sa taravi koya me lewai ira na Isireli ko Apitoni na luve i Ileli, na kai Piraconi.

¹⁴ A sa le vasagavulu na luvena na tagane, a sa le tolusagavulu na makubuna tagane, a ra sa dauvodoka na asa tagane e vitusagavulu: a sa lewai ira na Isireli ko koya ka yabaki walu.

¹⁵ A sa mate ko Apitoni na luve i Ileli, na kai Piraconi, a sa bulu mai Piraconi e na vanua nei Ifireimi, mai na nodra ulu-ni-vanua na Amalekaiti.